Ο Ευαγγέλιος σο Γραφιντάς ο Ματθαίος
8 Κάνα γουλίστιλο κατά βες, γκιλέ παλά-λέστε μπουτ τζενέ. 2 Ντα εκ λεπρός γκιλό πασέ, πελό κοτσίντζαρ ανγκλά-λέστε ντα βακερντάς: «Κύριε, άμα μανγκέσα τούι, μπορίνεσα τι κερές-μαν λατσσές».* 3 Ο Ιησούς τσσουντάς πο βας οπρά-λέστε ντα βακερντάς λέσκε: «Μανγκάβα! Τι αβές λατσσές».* Ντα οντιά στιγμή νασλί λέσταρ η λέπρα.* 4 Αζομάν ο Ιησούς βακερντάς λέσκε: «Ντικχ μα τι βακερές-λες καεκχέσκε, αλλά τζα τι σικαβές-τουτ κο ιερέας* ντα ντε ο δώρος σο βακερντάς ο Μωυσής. Αντικάς κα σικάντιβελ κο ιερείς ότι αβιλάν λατσσές».
5 Κάνα γκιλό κι Καπερναούμ, αβιλό λέστε εκ αρχηγός ι στρατόσκο ντα μολίνελας-λες 6 ακαλέ λαφίντζαρ: «Κύριε, μο υπηρέτης ισί κχερέ κο κρεβάτι. Ισί μπανγκό ντα τσσίντελα μπουτ ταλαιπωρία». 7 Ο Ιησούς βακερντάς λέσκε: «Κάνα κα αβάβ οτθέ, κα κεράβ-λες λατσσές». 8 Οντουβά αρχηγός ι στρατόσκο βακερντάς: «Κύριε, κον ισινόμ με για τι αβές μι κχερέστε; Σάντε εκ λάφι βάκερ ντα μο υπηρέτης κα αβέλ λατσσές. 9 Σόσκε μαν-ντα κερένα-μαν κουμάντος γιαβερά, ντα με τθεράβα στρατιωτέν σο ντάβα-λεν διαταγές, ντα βακεράβα κο εκ: “Τζα!” ντα τζάλα, ντα κο γιαβέρ: “Έλα!” ντα αβέλα, ντα μι δουλόσκε: “Κερ ακαβά!” ντα κερέλα-λες». 10 Κάνα ο Ιησούς ασουντάς-λες ανταβά, σαστισάλο ντα βακερντάς οντουλένγκε σο τζάνας παλά-λέστε: «Μπαγιά βακεράβα τουμένγκε, καεκχέστε κο Ισραήλ να αρακχλόμ αζόμ μπαρί πίστη. 11 Ντα βακεράβα τουμένγκε ότι μπουτ τζενέ κα αβέν μπουτέ τθεμένταρ* ντα κα μπεσέν κο τραπέζι τι χαν* ι Αβρααμίσαρ, ι Ισαακίσαρ ντα ι Ιακωβίσαρ κι Βασιλεία κι ουρανόσκι. 12 Αλλά ο τσσαβέ ι Βασιλειάκε κα φουρτίντιβεν αβρί κο καρανίκι. Οτθέ κα ροβέν ντα κα σικίνεν πουμαρέ ντανά».* 13 Αζομάν ο Ιησούς βακερντάς κο αρχηγός κι στρατόσκο: «Τζα τούκε. Τι αβέλ-πες οντουβά σο μανγκλάν σόσκε σικαντάν πίστη». Ντα οντουβά σαάτι ο υπηρέτης αβιλό λατσσές.
14 Ντα κάνα ο Ιησούς αβιλό κο κχερ κι Πετρόσκο, ντικχλάς λέσκε σασά κο κρεβάτι τι τθερέλ πυρετός. 15 Ασταρντάς λάκο βας ντα ο πυρετός μουκχλάς-λα, ντα βόι ιστίντιλι ντα αρχισάλι τι κερέλ λένγκε χαμπέ. 16 Κάνα αράτιλο, αντέ λέσκε μπουτέ δαιμονισμέ τζενέν, ντα βοβ νικαντάς ι δαιμονέν εκχέ λαφίσαρ ντα κερντάς λατσσές σαρέ ι νασφαλέν. 17 Αντικάς νικίστιλο μπαγιά οντουβά σο βακέρντιλοας αντράλ κατά προφήτης Ησαΐας: «Βοβ νασκιαρντάς αμαρέ νασφαλίματα ντα λιντάς οπρά-πέστε αμαρί ντουκχ».
18 Κάνα ο Ιησούς ντικχλάς τι γκιντίντιβεν μπουτ τζενέ ντονταλάι λέσταρ, βακερντάς πι μαθητένγκε τι νακχέν λέσαρ οκιά μπάνταρ. 19 Ντα εκ γραμματέας γκιλό πασέ ντα βακερντάς λέσκε: «Δάσκαλε, κα αβάβ παλά-τούτε κάι-ντα τι τζας». 20 Αλλά ο Ιησούς βακερντάς λέσκε: «Ο αλεπούδες τθερένα τθανά τι τσσουβέν-πες ντα ο τσιρικλέ τθερένα κάι τι μπεσέν, αλλά ο Τσσαβό ι τζενέσκο να τθερέλα κάι τι τσσουβέλ πο σορό». 21 Ντα εκ γιαβέρ κατά μαθητές βακερντάς λέσκε: «Κύριε, μουκχ-μαν πρώτα τι τζαβ τι πραχούναβ μι νταντές». 22 Ο Ιησούς βακερντάς λέσκε: «Μα τσσίναβ τι αβές παλά-μάντε ντα μουκχ ι μουλέν τι πραχούνεν πουμαρέ μουλέν».
23 Ντα ο Ιησούς τσσουντάς-πες εκχέ βαρκάτε πι μαθητέντζαρ. 24 Ντα αζομάν αβιλί εκ μπαρί μπαρμπάλ κι ντεριάβ ντα ο κύματα ιτσσαρένας ι βάρκα. Βοβ όμως σοβέλας. 25 Οτθάρ, τζανγκαντέ-λες ντα βακερντέ: «Κύριε, σώνε-αμέν, χασάρντιβασα!» 26 Αλλά βοβ βακερντάς λένγκε: «Σόσκε νταρένα αζόμ μπουτ; Σο χουρντί ισί τουμαρί πίστη!» Αζομάν ιστίντιλο ντα ντινάς βίκος οπράλ κι μπαρμπάλ ντα κι ντεριάβ, ντα αβιλί-πες μπαρί ηρεμία. 27 Οτθάρ, βον σαστισάλε ντα βακερντέ: «Σο τζενό ισί ανταβά; Ατζέ-ντα η μπαρμπάλ ντα η ντεριάβ ντένα-λες καν!»
28 Κάνα ερεσλό οκιά μπάνταρ, κο τθανά σο ισινέ ο Γαδαρηνοί, ντικχλάς ντουέ δαιμονισμέ τζενέν σο αβένας κατά μεζάρια.* Ισινέ αζόμ άγριοι σο νταρένας σαρέ τι νακχέν οντουλέ ντρομέσταρ. 29 Ντα βον βακερντέ μπαρέ βικόσαρ: «Σο μπουτί τθεράσα αμέν τούσαρ σο ισινάν Τσσαβό ι Ντεβλέσκο; Αβιλάν ατθέ για τι τιμωρίνες-αμέν πριν τι αβέλ ο βακίτι σο τραμπιντάς ο Ντεβέλ;» 30 Χάνικ πο ντουρ λένταρ ισινέ μπουτ γουρούνια σο χάνας. 31 Οτθάρ, ο δαίμονες μολίνενας-λες ακαλέ λαφίντζαρ: «Άμα κα νικαβές-αμέν λένταρ, μπούτσσαβ-αμέν κο γουρούνια». 32 Ντα βοβ βακερντάς λένγκε: «Τζαν!» Αζομάν βον νικίστιλε λένταρ ντα τσσουντέ-πες κο γουρούνια, ντα σαρέ ο γουρούνια γκιλέ ούρια κο γκρεμός, πελέ κι ντεριάβ ντα μουλέ κο πανιά. 33 Ο τσομπάνια νασλέ, γκιλέ κι πόλη ντα βακερντέ-λεν σαρέ, εμ οντουλά σο αβιλέ-πες ι δαιμονισμέ τζενέντζαρ. 34 Ντα σαρί η πόλη γκιλί τι αρακχέλ ι Ιησούς, ντα κάνα ντικχλέ-λες, μολιντέ-λες τι νασέλ οτθάρ.