Ο Δεύτερος Γράμμας σο Γραφιντάς ο Πέτρος
1 Με ο Σίμωνας Πέτρος, σο ισινόμ δούλος ντα απόστολος ι Ιησού Χριστόσκο, γραφίναβα οντουλένγκε σο λένγκι πίστη τθερέλα αζόμ μπαρί αξία σαρ αμαρί αντράλ κατά δικαιοσύνη αμαρέ Ντεβλέσκι ντα κατά Ιησού Χριστόσκι σο Σώνελα-αμέν:
2 Προσευχίντιβαβα τι τθερέν ατζέ πο μπουτ μπαρό λατσσιπέ ντα ειρήνη αντράλ κατά πράγματα σο σικλιόνα ντιπ λατσσές ι Ντεβλέσκε ντα ι Ιησούσκε σο ισί αμαρό Κύριος. 3 Η ζορ ι Ντεβλέσκι ντινάς-αμέν* σαρέ οντουλά σο χρειαζίντιβασα για τι σικάντιβελ αμαρέ ζωγιάσαρ ότι τθεράσα αφοσίωση κο Ντεβέλ, σόσκε τζανάσα-λες ντιπ λατσσές. Βοβ ντινάς-αμέν βίκος επειδή ισί μπαρό ντα λατσσό Ντεβέλ.* 4 Οτθάρ, ντινάς πο λάφι τι ντελ-αμέν μπαρέ δώρα σο τθερένα μπουτ αξία. Ντα αντικάς, αντράλ ανταλέ λαφίσταρ τι λεν ζορ σαρ οντιά σο τθερέλα ο Ντεβέλ. Ντινάς-αμέν πο λάφι σόσκε νασλάμ ντουρ κατά μπέτι πράγματα ι ντουνιάσκε σο αβένα κατά λάθος πράγματα σο μανγκέλα ο γκι.*
5 Οντουλέσκε, κερέν σο νακχέλα τουμαρέ βαστένταρ για τι τθερέν πίστη ντα για τι κερέν ο λατσσιπέ. Κερέν σο νακχέλα τουμαρέ βαστένταρ για τι σικλιόν ι αλήθεια 6 ντα για τι ατσσικιαρέν τουμαρό νεαυτός. Κερέν σο νακχέλα τουμαρέ βαστένταρ για τι τθερέν υπομονή ντα για τι αβέν αφοσιωμέ κο Ντεβέλ. 7 Κερέν σο νακχέλα τουμαρέ βαστένταρ για τι μανγκέν σαρέ ι πφραλέν ντα σαρέ ι τζενέν. 8 Άμα κερένα σαρέ ανταλά πράγματα ντα συνεχίνενα τι κερέν-λεν ατζέ πο μπουτ, κα τζαν ανγκλάλ ντα να κα αβέν τζενέ σο να κερένα τίποτα, σόσκε κα χρησιμοποιήνεν οντουλά σο τζανένα ντιπ λατσσές ντα σο τθερένα τι κερέν αμαρέ Κυριόσαρ, ι Ιησού Χριστόσαρ.
9 Κον να κερέλα ανταλά πράγματα ισί κορορό σόσκε πφάντελα πο γιακχά κο φως* ντα μπισταρντάς ότι καθαρισάλο πι πουρανέ αμαρτιένταρ. 10 Οτθάρ, πφραλάλεν, κερέν ο πο λατσσό σο μπορίνενα για τι αβέν σίγουροι ότι ισινέν πιστοί ντα αντικάς τι συνεχίνεν τι αβέν αντρέ οντουλέντε σο ο Ντεβέλ ντινάς βίκος ντα τραμπιντάς, σόσκε άμα να κα τσσιναβέν τι κερέν ανταλά πράγματα, να κα νασέν ποτές κατά πίστη. 11 Ανταλέ τροπόσαρ κα λεν ι μπαρί ευλογία τι νακχέν κι Βασιλεία σο ατσσόλα για πάντα ντα ισί αμαρέ Κυριόσκι, ι Ιησού Χριστόσκι, σο Σώνελα-αμέν.
12 Οτθάρ, κα αβάβ πάντα έτοιμος τι ανάβ τουμαρέ γκοντιάτε ανταλά πράγματα, παρόλο σο τζανένα-λεν ντα ισινέν μπουτ σταθεροί κι αλήθεια σο σικλιλέν. 13 Αλλά πακιάβα ότι ισί σωστός, καζόμ ισινόμ ανταλέ σωμάστε σο ισί σαρ τσαντίρι, τι ανάβ τουμαρέ γκοντιάτε ανταλά πράγματα, 14 σόσκε τζανάβα ότι ατζεχάνικ κα μουκχάβ ανταβά τσαντίρι, σαρ σικαντάς μάνγκε αμαρό Κύριος-ντα, ο Ιησούς Χριστός. 15 Κα κεράβ πάντα ο πο λατσσό σο μπορίναβα για τι ντεν-τουμέν γκοντί ανταλά πράγματα* από κορκορέ σοράν μι μεριμάσταρ.
16 Κάνα βακερντάμ τουμένγκε ι ζοριάκε σο τθερέλα αμαρό Κύριος, ο Ιησούς Χριστός, ντα λέσκε βουρτιμάσκε, να κερντάμ-λες ανταβά ψεύτικε ιστοριέντζαρ σο νικαβένα-λεν ο τζενέ πουμαρέ γκοντιάταρ πφιρνικανέ τροπόσαρ. Αλλά ντικχλάμ αμαρέ γιακχίντζαρ καζόμ μπαρό ισί. 17 Ο δοξασμέ Ντεβέλ, αμαρό Ντατ, κερντάς ι Ιησούς τι τθερέλ δόξα κάνα βακερντάς λέσκε ακαλά λάφια: «Ακαβά ισί μο Τσσαβό σο μανγκάβα-λες μπουτ με ντα κερέλα μο γκι». 18 Βα, ανταλά λάφια αμέν ασουντάμ-λεν τι αβέν κατά ουρανός καζόμ ισινάμας λέσαρ κο άγιος βες.
19 Άκ’ σόσκε ισινάμ ατζέ πο σίγουροι ότι σο-ντα βακερντάς ο Ντεβέλ κα νικιόλ μπαγιά.* Ντα κερένα λατσσές σο ντένα προσοχή σαρέ ανταλέ πραγματέντε. Αντρέ τουμαρέ γκίστε, ανταλά λάφια πρέπει τι αβέν σαρ λυχνάρι σο λέλα-πες εκχέ τθανέστε σο ισί καρανίκι. Συνεχίνεν τι ντεν προσοχή ανταλέντε μέχρι τι ντισιόλ ντα τι νικιόλ εκ τσεργάν* κο ντίσιπε. 20 Τζανένα ακαβά σημαντικός πράγμας: Καέκ προφητεία ι Γραφιάκι να νικαντέ-λα ο τζενέ πουμαρέ γκοντιάταρ. 21 Ποτές να βακέρντιλι προφητεία επειδή μανγκλάς-λες τζενό, αλλά ο άγιος πνεύμας τσσίντελας ι τζενέν* τι βακερέν ι Ντεβλέσκε λάφια.