Ο Πρώτος Γράμμας σο Μπουτσσάντιλο κο Θεσσαλονικείς

1 Με ο Παύλος, ο Σιλουανός* ντα ο Τιμόθεος μπουτσσαβάσα ανταβά γράμμας ι κχανγκιριάκε κι Θεσσαλονίκη σο ισί ι Ντεβλέσκι, αμαρέ Νταντέσκι, ντα ι Κυριόσκι, ι Ιησού Χριστόσκι:

Προσευχίντιβαβα τι τθερέν μπαρό λατσσιπέ ντα ειρήνη.

2 Βακεράσα πάντα ευχαριστώ κο Ντεβέλ κάνα τσσουβάσα-τουμέν σαριλέν αμαρέ προσευχιέντε. 3 Ντα πάντα ντάσα-αμέν γκοντί ανγκλάλ κο Ντεβέλ αμαρέ Νταντέστε ι υπηρεσία σο κερένα επειδή τθερένα πίστη, ο προσπάθειες σο κερένα επειδή τθερένα αγάπη ντα ι υπομονή σο σικαβένα επειδή τθερένα ελπίδα αμαρέ Κυριόστε, κο Ιησούς Χριστός. 4 Πφραλάλεν, σο μανγκέλα-τουμέν μπουτ ο Ντεβέλ, τζανάσα ότι βοβ τραμπιντάς-τουμέν, 5 σόσκε ο λατσσέ αμπέρια σο μουτθαβάσα να ερεσλέ τουμέντε σάντε λαφίντζαρ, αλλά εμ ζοριάσαρ εμ άγιε πνευμάσαρ. Ισινάμας σίγουροι ότι οντουβά σο μουτθαντάμ τουμένγκε ισινέ μπαγιά, ντα τουμέν τζανένα ότι οντουλά σο κερντάμ ισινέ τουμαρέ λατσσιμάσκε. 6 Τουμέν μοιάζενα αμέντε ντα κο Κύριος, σόσκε δεχτιντέν ο λάφι χαράσαρ σο αβέλα κατά άγιος πνεύμας παρόλο σο νακχλέν μπουτ στεναχώριες. 7 Ντα αντικάς σαρέ ο πιστοί κι Μακεδονία ντα κι Αχαΐα λιντέ παράδειγμας τουμένταρ.

8 Να μουτθαντέν ο λάφι ι Ιεχωβάσκο* σάντε κι Μακεδονία ντα κι Αχαΐα, αλλά σαρέ κο τθανά ο τζενέ ασουντέ ότι τουμέν τθερένα πίστη κο Ντεβέλ, οτθάρ αμέν να χρειαζίντιβελα τι βακεράς λένγκε τίποτα. 9 Βον βακερένα σαρ αβιλάμ πρώτη φαρ τουμέντε ντα σαρ μουκχλέν τουμαρέ είδωλα για τι υπηρετίνεν σαρ δούλοι ι τζουβντέ ντα αληθινέ Ντεβλές 10 ντα για τι μπεκλεντίνεν λέσκε Τσσαβέσκε κατά ουρανός σο τζουβντιαρντάς-λες κατά μουλέ. Βοβ ισί ο Ιησούς σο σώνελα-αμέν κατά μπαρί χολί σο αβέλα.