Ο Δεύτερος Γράμμας σο Μπουτσσάντιλο κο Κορίνθιοι
4 Αφού ο Ντεβέλ τζιτζισάλο* αμένγκε ντα ντινάς-αμέν ανταγιά υπηρεσία, να κα τσσιναβάς τι κεράς-λα. 2 Οκιά μπάνταρ, τζουνγκάσα κατά μπίλατζανε πράγματα σο αβένα-πες αποτσοράλ ντα να χουχαβάσα ι γιαβερέν ούτε αλλάνασα ο λάφι ι Ντεβλέσκο. Αλλά κάνα μουτθαβάσα ι αλήθεια, σικαβάσα κο κάθε τζενό* ότι κεράσα ο σωστός κο γιακχά κι Ντεβλέσκε. 3 Άμα ο λατσσέ αμπέρια σο μουτθαβάσα ισί γκεραντέ, ισί γκεραντέ για μα τι σικλιόν-λεν οντουλά σο κα χασάρντιβεν, 4 οντουλά σο να πακιάνα. Ο ντεβέλ ανταλέ ντουνιάσκο* κοριαρντάς-λεν* για μα τι λελ-πες σαρ φως η δόξα σο τθερένα ο λατσσέ αμπέρια ι Χριστόσκε, σο βοβ μοιάζελα ντιπ κο Ντεβέλ. 5 Κάνα μουτθαβάσα ο λατσσέ αμπέρια, να κεράσα λάφι αμαρέ νεαυτόσκε, αλλά βακεράσα ότι ο Ιησούς Χριστός ισί Κύριος ντα ότι αμέν ισινάμ τουμαρέ δούλοι μάξους ι Ιησούσκε. 6 Ο Ντεβέλ ισί οντουβά σο βακερντάς: «Οτθέ σο ισί καρανίκι τι λελ-πες φως». Ντα βοβ κερντάς πο φως τι λελ-πες αντρέ αμαρέ γκίστε κάνα σικλιλάμ αντράλ κατά Χριστός* ο μπουτ σουκάρ πράγματα σο τθερένα τι κερέν ι Ντεβλέσαρ.
7 Παρόλο σο ισινάμ σαρ σκεύη* κερντέ τσικάταρ, τθεράσα αντρ’ αμέντε ανταβά θησαυρός για τι σικάντιβελ ότι η ζορ σο ναστί τθερένα-λα ο τζενέ αβέλα κατά Ντεβέλ ντα όχι αμένταρ. 8 Ο προβλήματα πφαντέ-αμέν κατάρ-ντα τι μανγκές, αλλά όχι αζόμ μπουτ σο ναστί κουνιαβάσα-αμέν. Να τζανάσα σο τι κεράς, αλλά ο Ντεβέλ πουτρέλα αμένγκε ντρομ.* 9 Ο τζενέ τζάνα αμέντζαρ κόντρα, αλλά ο Ντεβέλ να μουκχλάς-αμέν. Περαβένα-αμέν τελέ, αλλά να καταστραφίντιβασα. 10 Κάι-ντα τζάσα τσσίντασα ο βάσανα σο τσσιντιντάς ο Ιησούς για τι ντικχέν ο τζενέ ότι τθεράσα εκ ζωή σαρ ι Ιησούσκι. 11 Αμαρέ ζωγιάτε ισί πάντα ο μεριπέ ανγκλ’ αμέντε μάξους ι Ιησούσκε. Ανταβά αβέλα-πες για τι ντικχέν ο τζενέ ότι τθεράσα εκ ζωή σαρ ι Ιησούσκι. 12 Άρα, αμέν τθεράσα ανγκλ’ αμέντε ο μεριπέ, αλλά ανταβά ανέλα ζωή τουμένγκε.
13 Ισί γραμμέ ακαβά: «Σικαντόμ πίστη, οτθάρ-ντα κερντόμ λάφι». Αμέν-ντα σικαβάσα ασακί πίστη, οτθάρ-ντα κεράσα λάφι. 14 Επειδή τζανάσα ότι Οντουβά σο τζουβντιαρντάς ι Ιησούς κα τζουβντιαρέλ αμέν-ντα για τι αβάς γιεκ ι Ιησούσαρ ντα κα ανέλ-αμέν ανγκλά-λέστε τουμέντζαρ. 15 Σαρέ ανταλά αβένα-πες μάξους τουμένγκε, ντα αντικάς τι λεν ατζέ πο μπουτ τζενέ ο μπαρό λατσσιπέ ι Ντεβλέσκο. Αντράλ ανταλέσταρ, ατζέ πο μπουτ τζενέ κα βακερέν ευχαριστώ κο Ντεβέλ ντα αντικάς κα δοξάνεν-λες.
16 Οτθάρ, να τσσιναβάσα τι κεράς ο πο λατσσό κι υπηρεσία. Αλλά ατζέ-ντα άμα αμαρό σώμας χασαρέλα πι ζορ, αμαρό γκι λέλα νεβί ζορ κάθε ντιβές. 17 Παρόλο σο η στεναχώρια ατσσικιαρέλα χάνικ ντα ισί χουρντί, ανέλα αμένγκε ευλογίες* σο καζόμ τζάλα τθερένα ατζέ πο μπαρί αξία ντα κα ατσσικιαρέν για πάντα. 18 Οτθάρ, αμέν να τθεράσα αμαρέ γιακχά οντουλέντε σο ντικχίντιβενα αλλά οντουλέντε σο να ντικχίντιβενα. Επειδή οντουλά σο ντικχίντιβενα ατσσικιαρένα χάνικ, οντουλά όμως σο να ντικχίντιβενα κα ατσσικιαρέν για πάντα.