Ο Πρώτος Γράμμας σο Μπουτσσάντιλο κο Κορίνθιοι

13 Άμα κεράβα λάφι ο τσσιμπά ι τζενένγκε ντα ι αγγελόνγκε αλλά να τθεράβα αγάπη, ισινόμ σαρ καμπάνα σο μπασέλα ή σαρ μέταλλος* σο μπασκιαρένα-λες ζουρανές. 2 Άμα ντιντιλί-μαν η ικανότητα* τι βακεράβ προφητείες ντα αγαβάβα σαρέ ο γκεραντέ πράγματα* ντα τζανάβα-λεν σαρέ, ντα άμα τθεράβα αζόμ μπαρί πίστη για τι κουνιαβάβ βεσά,* αλλά να τθεράβα αγάπη, τίποτα να ισινόμ.* 3 Ντα άμα κα νταβ σαρέ μο πράγματα για τι χαν ο γιαβερά, ντα άμα κα νταβ μι ζωή για τι ισαράβ-μαν, αλλά να τθεράβα αγάπη, σινανέ κεράβα-λεν σαρέ.*

4 Η αγάπη κερέλα υπομονή ντα σικαβέλα λατσσιπέ. Η αγάπη να ζηλίνελα, να ισαρέλα-πες, να πφερντιόλα μπαρικανιπέ, 5 να κερέλα ι γιαβερέν τι λατζάν,* να ντικχέλα σάντε πιρό λατσσιπέ, να νευριάνελα. Να ατσσικιαρέλα χολί. 6 Να χαιρίνελα ι πραγματένγκε σο νανέ σωστά, αλλά χαιρίνελα ι πραγματέντζαρ σο ισί μπαγιά. 7 Αντιχίνελα-λεν σαρέ, πακιάλα-λεν σαρέ, τθερέλα ελπίδα σαρέ ι πραγματένγκε, νταϊντίνελα-λεν σαρέ.

8 Η αγάπη ποτές να χασάρντιβελα. Αλλά η ικανότητα σο ντινάς-μαν ο Ντεβέλ τι βακεράβ προφητείες ντα τι κεράβ λάφι γιαβερέ τσσιμπέντε κα σταματίνελ. Ντα η ικανότητα σο ντινάς-μαν ο Ντεβέλ τι τζανάβ πράγματα σο ναστί τζανένα ο γιαβερά κα σταματίνελ. 9 Τζανάσα σάντε χάνικ πράγματα ντα αμαρέ προφητείες νανέ σαστέ, 10 αλλά οντουβά σο νανέ σαστό κα σταματίνελ κάνα κα αβέλ οντουβά σο ισί σαστό. 11 Κάνα ισινόμας χουρντό, κεράβας λάφι σαρ χουρντό, σκεφτίναβας σαρ χουρντό, ντικχάβας ο πράγματα σαρ χουρντό. Ακανά όμως σο αβιλόμ σαστό μουρς, νασκιαρντόμ οπρά-μάνταρ σαρέ ο πράγματα σο κερέλα εκ χουρντό. 12 Ακανά να ντικχάσα λατσσές* σόσκε ισί σαρ τι ντικχάσα-αμέν εκχέ μεταλλικέ ανιάστε,* αλλά αζομάν κα ντικχάς λατσσές.* Ακανά τζανάβα χάνικ πράγματα, αλλά αζομάν κα τζανάβ ο πράγματα ντιπ λατσσές,* σαρ τζανέλα-μαν ντιπ λατσσές ο Ντεβέλ. 13 Ντα ακανά ατσσόνα ακαλά τριν: η πίστη, η ελπίδα, η αγάπη. Αλλά η πο μπαρί ανταλένταρ ισί η αγάπη.