Ο Ευαγγέλιος σο Γραφιντάς ο Λουκάς

11 Εκ ντιβές ισινέ εκχέ τθανέστε ντα προσευχίντιβελας. Κάνα μπιτισκιαρντάς, εκ μαθητής λέσκο βακερντάς λέσκε: «Κύριε, σίκλιαρ-αμέν σαρ τι προσευχίντιβας, σαρ ο Ιωάννης-ντα σικλιαρντάς πι μαθητέν».

2 Οτθάρ, βοβ βακερντάς λένγκε: «Κάνα-ντα προσευχίντιβενα, τι βακερέν: “Ντάντε, τι αγιάντιβελ το ναβ.* Τι αβέλ τι Βασιλεία. 3 Ντε-αμέν κάθε ντιβές ο μαντρό σο χρειαζίντιβασα ι ντιβεσέσκε. 4 Ντα συγχώρινε αμαρέ αμαρτίες,* σόσκε αμέν-ντα συγχωρίνασα σαρέ οντουλέν σο αμαρτιντέ κόντρα αμέντε.* Ντα μα μουκχ τι περάς* κο πειρασμός”».

5 Σοράν βακερντάς λένγκε: «Βακερέν ότι εκ τουμένταρ τθερέλα εκχέ αμαλές* ντα τζάλα λέστε αντρέ κι ιράτ ντα βακερέλα λέσκε: “Αμάλα, ντε-μαν τριν μαντρέ, 6 σόσκε αβιλό ακανά εκ αμάλ μιρό ντουράλ ντα να τθεράβα τίποτα τι νταβ-λες”. 7 Αλλά βοβ βακερέλα λέσκε αντράλ: “Μουκχ-μαν. Η πόρτα ισί πφαντί ντα μο χουρντέ ισί μάντζαρ κο κρεβάτι. Ναστί ιστιάβα τι νταβ-τουτ”. 8 Βακεράβα τουμένγκε ότι, ατζέ-ντα άμα να κα ιστίλ τι ντελ-λες κάτι σαρ αμάλ λέσκο σο ισί, σίγουρα επειδή να τσσιναβέλα τι επιμίνελ, κα ιστίλ ντα κα ντελ-λες σο-ντα χρειαζίντιβελα. 9 Οτθάρ, βακεράβα τουμένγκε: Μα τσσιναβέν τι μανγκέν κατά Ντεβέλ ντα κα ντιντιόλ-τουμέν, μα τσσιναβέν τι ρόντεν ντα κα αρακχέν, μα τσσιναβέν τι μπασκιαρέν ντα κα πουτάρντιβελ τουμένγκε. 10 Σόσκε κον μανγκέλα κατά Ντεβέλ λέλα, ντα κον ρόντελα αρακχέλα, ντα οντουλέσκε σο μπασκιαρέλα κα πουτάρντιβελ. 11 Καβά ντατ τουμένταρ κα ντελ σαπές πι τσσαβέστε άμα κα μανγκέλ ματσσό; 12 Ή κα ντελ σκορπιός λέστε άμα κα μανγκέλ βαντρό; 13 Άρα, άμα τουμέν, σο ισινέν πφιρνέ,* τζανένα τι ντεν λατσσέ δώρα τουμαρέ τσσαβέντε, ο Ντατ σο ισί κο ουρανός να κα ντελ άγιος πνεύμας οντουλέντε σο μανγκένα-λες λέσταρ;»

14 Σοράν νικαντάς εκχέ λαλορέ δαιμονάς. Κάνα νικίστιλο ο δαίμονας, ο λαλορό τζενό κερντάς λάφι, ντα ο μπουτ τζενέ σο ισινέ οτθέ ατσσιλέ πουταρντέ μόσαρ. 15 Αλλά ισινέ τζενέ σο βακερντέ: «Ντέλα-λες ι ζορ τι νικαβέλ ι δαιμονέν ο Μπενγκ,* ο αρχηγός ι δαιμονένγκο». 16 Ντα γιαβερά, για τι δοκιμάνεν-λες, βακερένας λέσκε τι σικαβέλ λένγκε σημάδι κατά Ντεβέλ.* 17 Ο Ιησούς τζανέλας σο τθερένας πουμαρέ γκοντιάτε, οτθάρ βακερντάς λένγκε: «Άμα ο τζενέ εκχέ τθεμέσκε τζάνα κόντρα ο εκ ι γιαβερέσαρ, ο τθεμ κα καταστραφίντιβελ. Ντα άμα ο τζενέ εκχέ κχερέσκε τζάνα κόντρα ο εκ ι γιαβερέσαρ, ο κχερ κα περέλ. 18 Αντικάς-ντα, άμα ο Μπενγκ τζάλα κόντρα πέσαρ, σαρ αβέλα-πες τι ατσσόλ λέσκι βασιλεία; Επειδή τουμέν βακερένα ότι ντέλα-μαν ι ζορ τι νικαβάβ ι δαιμονέν ο Μπενγκ.* 19 Άμα με νικαβάβα ι δαιμονέν ι Μπενγκέσκε* ζοριάσαρ, τουμαρέ τσσαβέ κάσκε ζοριάσαρ νικαβένα-λεν; Άκ’ σόσκε βον κα σικαβέν ότι οντουλά σο βακερντέν ισί λάθος. 20 Αλλά άμα με νικαβάβα ι δαιμονέν ι Ντεβλέσκε δαχτυλόσαρ, η Βασιλεία ι Ντεβλέσκι μπαγιά αβιλί αλλά τουμέν ατζέ να αγαντέν-λες. 21 Κάνα εκ ζουρανό μουρς σο τθερέλα σαρέ πο όπλα,* αρακχαβέλα πο κχερ, λέσκε πράγματα ισί αρακχαντέ. 22 Αλλά κάνα εκ τζενό σο ισί πο ζουρανό λέσταρ τσσουβέλα-λεν λέσαρ ντα νικίνελα-λες, λέλα σαρέ ο όπλα σο τθερέλας πι μπέσα λέντε οντουβά μουρς ντα ιλιαβέλα ο πράγματα σο λιντάς λέσταρ. 23 Κον νανέ μάντζαρ τζάλα μάντζαρ κόντρα ντα κον να γκίντελα μάντζαρ τρουγίνελα.

24 »Κάνα εκ δαίμονας νικιόλα εκχέ τζενέσταρ, νακχέλα αντράλ σουκέ τθανένταρ ντα ρόντελα εκ τθαν τι μπεσέλ, αλλά αφού να αρακχέλα, βακερέλα: “Κα βουρτίναβ κο κχερ σο ισινόμας”. 25 Ντα κάνα ερεσέλα οτθέ, αρακχέλα-λες σουλαντό ντα ζουζιμέ.* 26 Οτθάρ, τζάλα ντα λέλα εφτά γιαβερέ δαιμονέν σο ισί πο πφιρνέ λέσταρ, τσσουβένα-πες αντρέ ντα μπεσένα οτθέ. Αντικάς, αβένα-πες οντουλέ τζενέσκε πο μπέτι πράγματα οντουλένταρ σο αβένας-πες ανγκλέ».

27 Καζόμ βακερέλας-λεν ανταλά, εκ τζουβέλ κατά μπουτ τζενέ σο ισινέ οτθέ ντινάς βίκος: «Ευτυχισμέ ισί η τζουβέλ σο τθερέλας-τουτ πι περέστε ντα ντινάς-τουτ τσουτσί!» 28 Αλλά βοβ βακερντάς: «Νάα, ευτυχισμέ ισί οντουλά σο ασουνένα ο λάφι ι Ντεβλέσκο ντα κερένα-λες!»

29 Καζόμ γκιντίντιβενας ατζέ πο μπουτ τζενέ, αρχισάλο τι βακερέλ λένγκε: «Ο τζενέ σο τζουβντιόνα ανταλέ βακιτίστε* ισί πφιρνέ. Βον μανγκένα τι ντικχέν εκ σημάδι, αλλά να κα ντικχέν καέκ σημάδι εκτός κατά σημάδι ι Ιωνάσκο. 30 Σαρ ο Ιωνάς αβιλό σημάδι κο Νινευίτες, αντικάς κα αβέλ ο Τσσαβό ι τζενέσκο-ντα κο τζενέ σο τζουβντιόνα ανταλέ βακιτίστε.* 31 Κο Ντιβές σο κα Κρίνελ ο Ντεβέλ ι τζενέν, η βασίλισσα κατά νότος κα ιστίλ κατά μεριπέ γιεκ ι τζενέντζαρ σο τζουβντιόνα ανταλέ βακιτίστε* ντα κα σικαβέλ καζόμ λάθος ισινέ ανταλά τζενέ, σόσκε βόι αβιλί ντουράλ για τι ασουνέλ ο γκοντιαβέρ λάφια ι Σολομωντάσκε. Αλλά ατθέ ισί εκ τζενό πο μπαρό κατά Σολομώντας. 32 Κο Ντιβές σο κα Κρίνελ ο Ντεβέλ ι τζενέν, ο Νινευίτες κα ιστίν κατά μεριπέ γιεκ ι τζενέντζαρ σο τζουβντιόνα ανταλέ βακιτίστε* ντα κα σικαβέν καζόμ λάθος ισινέ ανταλά τζενέ, σόσκε ο Νινευίτες μετανιωσάλε κάνα ασουντέ ο λάφια ι Ιωνάσκε. Αλλά ατθέ ισί εκ τζενό πο μπαρό κατά Ιωνάς. 33 Κάνα εκ τζενό πφαμπαρέλα* λυχνάρι, να τσσουβέλα-λες γκεραντέ τθανέστε ούτε τελάλ κατά σεβλί,* αλλά εκχέ βουτσσέ τθανέστε, ντα αντικάς οντουλά σο ντένα αντρέ ντικχένα ο φως. 34 Ο λυχνάρι ι σωμάσκο ισί τι γιακχ. Κάνα τθερέσα τι γιακχ σάντε εκχέ πραγμάστε,* αζομάν σαρό το σώμας-ντα ισί κο φως.* Αλλά κάνα τθερέσα μπίτσαλι* γιακχ, αζομάν το σώμας-ντα ισί κο καρανίκι. 35 Οτθάρ, τι αβές τζανγκαντό για μα τι αβέλ ο φως αντρέ τούτε καρανίκι. 36 Άρα, άμα σαρό το σώμας ισί κο φως ντα να τθερέλα καρανίκι καεκχέ τθανέστε, κα λελ-πες σαρό αζόμ μπουτ σαρ εκ λυχνάρι σο ντέλα-τουτ φως».

37 Κάνα βακερντάας-λεν ανταλά, εκ Φαρισαίος μανγκλάς κατά Ιησούς τι χαλ λέσαρ. Οτθάρ, βοβ γκιλό αντρέ ντα μπεσλό* κο τραπέζι. 38 Όμως, ο Φαρισαίος σαστισάλο κάνα ντικχλάς ότι να τθοντάς-πες* πριν κατά χαμπέ. 39 Αλλά ο Κύριος βακερντάς λέσκε: «Τουμέν ο Φαρισαίοι κερένα πάκι αβριάλ ο ποτήρι ντα ο τσαρό, αλλά αντράλ ισινέν πφερντέ μελ, επειδή τουμαρί γιακχ ισί μπίτσαλι ντα ισινέν πφιρνέ. 40 Να τσσινέλα τουμαρί γκοντί! Οντουβά σο κερντάς ο αβραϊνό να κερντάς ο αντραϊνό-ντα; 41 Κερέν όμως λατσσιπέ ι τσορορένγκε αντράλ τουμαρέ γκίσταρ, ντα αζομάν κα αβέν πάκι σαρέ κο πράγματα. 42 Αλλά τιμωρία κα τσσίντεν τουμέν, Φαρισαίοι, σόσκε ντένα χάνικ* κατά δυόσμος ντα κατά πήγανος ντα σαρέ κατά γιαβερά βότανα,* αλλά κερένα πέρα ι δικαιοσύνη ντα ι αγάπη ι Ντεβλέσκι! Ισί μπαγιά ότι ισινένας υποχρεωμέ τι κερέν-λεν ανταλά, χωρίς όμως τι κερέν πέρα ο γιαβερά πράγματα. 43 Τιμωρία κα τσσίντεν τουμέν, Φαρισαίοι, σόσκε μπεϊντίνενα ο ανγκλαϊνέ* καρέκλες κο συναγωγές, ντα τι χαιρετίνεν-τουμέν ο γιαβερά κο αγορές! 44 Τιμωρία κα τσσίντεν τουμέν, σόσκε ισινέν σαρ ο μεζάρια σο να ντικχίντιβενα* ντα ο τζενέ πφιρένα οπρά-λέντε χωρίς τι τζανέν-λες!»

45 Εκ τζενό σο τζανέλας λατσσές ο Νόμος βακερντάς λέσκε: «Δάσκαλε, κάνα βακερέσα ανταλά λάφια λένγκε χαλαβέσα εμ αμαρό ναβ». 46 Αζομάν βοβ βακερντάς: «Τιμωρία κα τσσίντεν τουμέν-ντα, σο τζανένα λατσσές ο Νόμος, σόσκε λονταβένα ι τζενέν μπουτ πφαρέ πραγματέντζαρ, αλλά τουμέν να τσσουβένα ούτε εκ δάχτυλος για τι ασταρέν-λεν!

47 »Τιμωρία κα τσσίντεν τουμέν, σόσκε λατσσαρένα ι προφητένγκε μεζάρια, αλλά τουμαρέ παππούδες μουνταρντέ-λεν! 48 Σίγουρα τζανένα σο κερντέ τουμαρέ παππούδες, όμως αβέλα τουμαρό γκι ανταλέντζαρ, σόσκε βον μουνταρντέ ι προφητέν αλλά τουμέν λατσσαρένα λένγκε μεζάρια. 49 Οτθάρ, ο Ντεβέλ σο ισί γκοντιαβέρ βακερντάς: “Κα μπουτσσαβάβ λέντε προφητέν ντα αποστολόν, ντα κα μουνταρέν μερικέν λένταρ ντα κα τζαν λέντζαρ κόντρα. 50 Αντικάς, ο τζενέ σο τζουβντιόνα ανταλέ βακιτίστε* κα ποκινέν ο ρατ σαρέ ι προφητένγκο σο τσσορντιλό οτθάρ μπερί σο μπιάντιλε τζενέ κι πφουβ, 51 κατά Άβελ μέχρι κο Ζαχαρίας. Ο Ζαχαρίας μουλό πασέ κο θυσιαστήριος, ανγκλάλ κο ναός”. Βα, ο τζενέ σο τζουβντιόνα ανταλέ βακιτίστε* κα ποκινέν λένγκο ρατ.

52 »Τιμωρία κα τσσίντεν τουμέν, σο τζανένα λατσσές ο Νόμος, σόσκε λιντέν κατά τζενέ ο κλειδίς ι σικλιαριμάσκο. Τουμέν να τσσουντέν-τουμέν αντρέ, ντα τσσιναβένα οντουλέν σο τσσουβένα-πες!»

53 Ντα κάνα νικίστιλο οτθάρ, ο γραμματείς ντα ο Φαρισαίοι πελέ οπρά-λέστε ντα πουτσένας-λες ατζέ πο μπουτ πραγματένγκε, 54 για τι κερέν-λες τι βακερέλ κάτι λάθος.