Γράμμας σο Μπουτσσάντιλο κο Κολοσσαείς

1 Ανταβά γράμμας μπουτσσάντιβελα μάνταρ κατά Παύλος, σο ισινόμ απόστολος ι Χριστόσκο, ι Ιησούσκο, αντικάς σαρ μανγκέλα ο Ντεβέλ, ντα κατά Τιμόθεος αμαρέ πφραλέσταρ. 2 Γραφίναβα ι αγιόνγκε κο Κολοσσές σο ισί πιστά πφραλά ντα μαθητές ι Χριστόσκε:

Προσευχίντιβαβα τι τθερέν μπαρό λατσσιπέ ντα ειρήνη κατά Ντεβέλ αμαρέ Νταντέσταρ.

3 Βακεράσα πάντα ευχαριστώ κο Ντεβέλ, σο ισί ο Ντατ αμαρέ Κυριόσκο, ι Ιησού Χριστόσκο, κάνα προσευχίντιβασα τουμένγκε. 4 Κεράσα-λες ανταβά επειδή ασουντάμ ότι τθερένα πίστη κο Χριστός Ιησούς ντα μανγκένα σαρέ ι αγιόν. 5 Τθερένα ανταγιά πίστη ντα αγάπη σόσκε μπεσένα τι λεν ι ευλογία σο τθερέλα τουμένγκε ο Ντεβέλ κο ουρανός. Σικλιλέν ανταλέ ευλογιάκε κάνα ασουντέν ι αλήθεια σο ισί κο λατσσέ αμπέρια 6 σο ερεσλέ τουμέντε. Ανταλά λατσσέ αμπέρια μουτθάντιβενα σαρό κο ντουνιάς ντα ανένα λατσσέ αποτελέσματα. Ανένα λατσσέ αποτελέσματα τουμένγκε-ντα οντουλέ ντιβεσέσταρ σο ασουντέν-λεν ντα σικλιλέν ντιπ λατσσές ι αλήθεια σο τθερέλα τι κερέλ ι Ντεβλέσκε μπαρέ λατσσιμάσαρ. 7 Σικλιλέν ι Ντεβλέσκε μπαρέ λατσσιμάσκε κατά Επαφράς, σο μανγκάσα-λες μπουτ ντα κερέλα πιστά ανταγιά υπηρεσία ι Χριστόσκε, σο κα κεράας-λα αμέν, άμα ισινάμας οτθέ τουμέντζαρ. 8 Ντα βοβ βακερντάς αμένγκε ότι σικαβένα αγάπη σο αβέλα κατά πνεύμας ι Ντεβλέσκο.

9 Άκ’ σόσκε να τσσιναντάμ τι προσευχίντιβας τουμένγκε οντουλέ ντιβεσέσταρ σο ασουντάμ-λες ανταβά. Προσευχίντιβασα τι σικλιόν ντιπ λατσσές οντουβά σο μανγκέλα ο Ντεβέλ, τι αβέν μπαγιά γκοντιαβέρ ντα τι αγαβέν ο πράγματα ι Ντεβλέσκε. 10 Προσευχίντιβασα τι τζουβντιόν αντικάς σαρ μανγκέλα ο Ιεχωβά* για τι κερέν λέσκο γκι σαρέ κο πράγματα, τι κερέν σο-ντα ισί λατσσό ντα τι σικλιόν ατζέ πο λατσσές ι Ντεβλές. 11 Ντα προσευχίντιβασα τι ντελ-τουμέν ο Ντεβέλ πι μπαρέ* ζοριάσαρ σαρί ι ζορ σο χρειαζίντιβενα για τι νταϊντίνεν-λεν σαρέ με υπομονή ντα χαρά. 12 Μα τσσιναβέν τι βακερέν ευχαριστώ κο Ντατ σο ετοιμαντάς-τουμέν για τι λεν ι κληρονομιά. Ανταγιά κληρονομιά ισί ι αγιόνγκι σο πφιρένα κο φως.

13 Βοβ σωντάς-αμέν κατά καρανίκι σο κερέλας-αμέν κουμάντος ντα αντάς-αμέν κι βασιλεία πι αγαπημέ Τσσαβέσκι. 14 Λέσκο Τσσαβό ντινάς πι ζωή σαρ λύτρος, ντα αντικάς ελευθερώντιβασα ντα αμαρέ αμαρτίες συγχωρίντιβενα. 15 Βοβ μοιάζελα ντιπ κο Ντεβέλ σο ναστί ντικχάσα-λες. Ισί ο πρώτος* σαρέ κατά πράγματα σο λατσσάρντιλε. 16 Σαρέ ο γιαβερά πράγματα κο ουρανός ντα κι πφουβ λατσσάρντιλε αντράλ λέσταρ. Ανταλά ισί εμ οντουλά σο ντικχάσα εμ οντουλά σο ναστί ντικχάσα, είτε ισί οντουλά σο μπεσένα κο θρόνοι είτε οντουλά σο ισί βασιλιάδες είτε κυβερνήσεις είτε οντουλά σο κερένα κουμάντος. Σαρέ ο γιαβερά πράγματα λατσσάρντιλε αντράλ λέσταρ ντα λέσκε. 17 Βοβ ισινέ πριν σαρέ κατά γιαβερά πράγματα, ντα αντράλ λέσταρ κερντιλέ σαρέ ο γιαβερά πράγματα. 18 Βοβ ισί ο σορό ι σωμάσκο, ι κχανγκιριάκο. Βοβ ισί η αρχή, ο πρώτος σο ιστίντιλο κατά μουλέ, ντα αντικάς τι αβέλ πρώτος* σαρέ κο πράγματα. 19 Ο Ντεβέλ μανγκλάς τι αβέλ ο Χριστός ντιπ πφερντό σαρέ με το ιδιότητες Λέσκε. 20 Ντα αντράλ λέσταρ, ο Ντεβέλ κερέλα σαρέ ο πράγματα κο ουρανός ντα κι πφουβ τι τθερέν ειρήνη Λέσαρ. Ανέλα ανταγιά ειρήνη αντράλ κατά ρατ σο τσσορντάς ο Ιησούς οπράλ κι ντουκχένγκο κας.*

21 Τουμέν-ντα ισινένας ντουρ κατά Ντεβέλ ντα ντουσμάνια* λέσαρ, σόσκε τουμαρί γκοντί ισινέ πφιρνικανέ* πραγματέντε. 22 Αλλά ακανά ο Ντεβέλ κερντάς-τουμέν τι αβέν λέσκε αμαλά* αντράλ κατά Ιησούς σο ντινάς πο σώμας σαρ θυσία. Κερντάς-λες ανταβά για τι αβέν ανγκλά-λέστε άγιοι, ντιπ σωστοί ντα αθώοι. 23 Όμως, για τι αβέλ-πες ανταβά πρέπει τι ατσσόν κι πίστη ντα τι αβέν ζουρανέ ντα σταθεροί κο θεμέλιος. Μα μουκχέν τίποτα τι λελ τουμένταρ ι ευλογία σο μπεσένα τι αβέλ, σαρ ασουντέν κατά λατσσέ αμπέρια. Ανταλά λατσσέ αμπέρια μουτθάντιλε σαρό κο ντουνιάς.* Με, ο Παύλος, τραμπίντιλομ τι μουτθαβάβ ανταλά λατσσέ αμπέρια.

24 Χαιρίναβα σο τσσίνταβα μπουτ τουμαρέ λατσσιμάσκε. Τζανάβα ότι πρέπει τι συνεχίναβ τι τσσίνταβ μπουτ ι Χριστόσκε για τι αβέλ-πες λατσσιπέ κι κχανγκιρί, σο ισί λέσκο σώμας. 25 Υπηρετίναβα ι κχανγκιρί, σόσκε ο Ντεβέλ ντινάς-μαν ανταγιά ευθύνη τουμαρέ λατσσιμάσκε. Οντουλέσκε μουτθαβάβα ο λάφι ι Ντεβλέσκο σαρέ μι γκίσαρ. 26 Ο γκεραντό πράγμας* να μουτθάντιλοας κο ντουνιάς* ντα κο τζενέ σο τζουβντιόνας ανγκλέ. Αλλά ακανά μουτθάντιλο λέσκε αγιόνγκε. 27 Ο Ντεβέλ μανγκλάς τι σικαβέλ κο τθεμά ο γκεραντό πράγμας* σο ισί πφερντό δόξα ντα πνευματικός χουλανιπέ. Ανταβά γκεραντό πράγμας ισί ότι ο Χριστός ισί ενωμέ τουμέντζαρ ντα ότι τθερένα ελπίδα τι δοξάντιβεν λέσαρ. 28 Λέσκε βακεράσα αμέν. Προειδοποιήνασα ντα σικλιαράσα σαρέ ι τζενέν κάθε γκοντιαβέρ λαφίσαρ για τι βοηθίνας σαρέ ι Χριστόσκε μαθητέν τι αβέν πνευματικά ζουρανέ.* 29 Οτθάρ-ντα κεράβα σο νακχέλα μι βαστένταρ λέσκε ζοριάσαρ, σο κερέλα μπαρί μπουτί αντρέ μάντε.