Ο Ευαγγέλιος σο Γραφιντάς ο Ματθαίος
13 Οντουβά ντιβές ο Ιησούς νασλό κατά κχερ ντα μπεσέλας πασέ κι ντεριάβ. 2 Ντα γκιντισάλε αζόμ μπουτ τζενέ πασέ λέστε σο τσσουντάς-πες εκχέ βαρκάτε, μπεσλό ντα σαρέ ο τζενέ ισινέ πασέ κι ντεριάβ. 3 Ντα σικλιαρντάς-λεν μπουτ πράγματα παραδειγματέντζαρ.* Βακερντάς: «Εκ τζενό γκιλό τι σπειρίνελ. 4 Οτθέ σο σπειρίνελας, μερικοί σπόροι πελέ κο ντρομ, αβιλέ ο τσιρικλέ ντα χαλέ-λεν. 5 Γιαβερά πελέ κο μπαρά. Οτθέ να ισινέ μπουτ τσικ ντα μπαριλέ μπουτ σουγκό, σόσκε η τσικ να ισινέ αχόρτ. 6 Αλλά κάνα νικίστιλο ο κχαμ, πφαμπιλέ ντα σουκιλέ σόσκε να τθερένας ρίζα. 7 Γιαβερά πελέ αντρέ κο καντρέ, ντα ο καντρέ μπαριλέ ντα τασαντέ-λεν. 8 Ντα γιαβερά πελέ κι λατσσί τσικ ντα νικαντέ πο μπουτ σπόροι οντουλένταρ σο τσσουβντιλέ, ο εκ 100 φαρ πο μπουτ, ο γιαβέρ 60 ντα ο γιαβέρ 30. 9 Κον τθερέλα κανά για τι ασουνέλ, τι ασουνέλ».
10 Ο μαθητές γκιλέ πασέ λέστε ντα πουτσλέ-λες: «Σόσκε σικλιαρέσα-λεν παραδειγματέντζαρ;» 11 Βοβ βακερντάς: «Τουμέν μουκχλάς ο Ντεβέλ τι αγαβέν ο γκεραντέ πράγματα* ι ουρανόσκε Βασιλειάκε, αλλά λεν να μουκχλάς-λεν. 12 Κον τθερέλα, κα ντιντιόλ-λες πο μπουτ ντα κα τθερέλ μπερεκέτι. Αλλά κον να τθερέλα, ατζέ-ντα ανταβά σο τθερέλα κα λιντιόλ λέσταρ. 13 Βον ντικχένα αλλά σινανέ ντικχένα, ασουνένα αλλά σινανέ ασουνένα, ντα ιτς να αγαβένα. Άκ’ σόσκε σικλιαράβα-λεν παραδειγματέντζαρ. 14 Λέντε νικιόλα μπαγιά η προφητεία σο γραφιντάς ο Ησαΐας, σο βακερέλα: “Τουμέν κα ασουνέν αλλά ιτς να κα αγαβέν, ντα κα ντικχέν αλλά να κα αγαβέν σο ντικχλέν. 15 Ο γκι ανταλέ λαόσκο αβιλό σουκό σαρ μπαρ. Πφαντέ πουμαρέ κανά ντα πουμαρέ γιακχά για μα τι ντικχέν ντα μα τι ασουνέν τίποτα. Οτθάρ λένγκο γκι να αγαβέλα ντα να βουρτίνενα μάντε για τι κεράβ-λεν λατσσές”.
16 »Αλλά τουμαρέ γιακχά ισί ευτυχισμέ σόσκε ντικχένα, ντα τουμαρέ κανά σόσκε ασουνένα. 17 Μπαγιά βακεράβα τουμένγκε: Μπουτ προφήτες ντα δίκαια τζενέ μανγκλέ τι ντικχέν οντουλά σο ντικχένα τουμέν αλλά να ντικχλέ-λεν, ντα τι ασουνέν οντουλά σο ασουνένα τουμέν αλλά να ασουντέ-λεν.
18 »Ασουνέν ακανά σο μανγκέλα τι βακερέλ ο παράδειγμας ι τζενέσαρ σο σπειριντάς. 19 Κάνα εκ τζενό ασουνέλα ι Βασιλειάκε λάφια αλλά να αγαβέλα, αβέλα ο Μπενγκ* ντα καπτίνελα ο σπόρος σο τσσουβντιλό λέσκε γκίστε. Ανταβά μανγκέλα τι βακερέλ ο σπόρος σο πελό κο ντρομ. 20 Ο σπόρος σο πελό κο μπαρά ισί οντουβά σο ασουνέλα ο λάφια ντα μπουτ σουγκό πακιάλα-λεν χαράσαρ. 21 Όμως, να τθερέλα ρίζα αντρέ πι γκίστε. Ατσσόλα για χάνικ, αλλά κάνα αβέλα στεναχώρια ή τζάνα λέσαρ κόντρα ιτιρί κατά Βασιλειάκε λάφια, μπουτ σουγκό τσσιναβέλα τι πακιάλ-λεν.* 22 Ο σπόρος σο πελό αντρέ κο καντρέ ισί οντουβά σο ασουνέλα ο λάφια. Αλλά ο άγχος κατά προβλήματα σο ισί ανταλέ ντουνιάστε* ντα η ζορ σο τθερέλα ο χουλανιπέ τι χουχαβέλ, τασαβένα ο λάφια ντα αντικάς να νικαβένα καρπός. 23 Αλλά ο σπόρος σο πελό κι λατσσί τσικ, ισί οντουβά σο ασουνέλα ο λάφια, αγαβέλα ντα νικαβέλα μπαγιά πο μπουτ σπόροι οντουλένταρ σο τσσουβντιλέ, ο εκ 100 φαρ πο μπουτ, ο γιαβέρ 60 ντα ο γιαβέρ 30».
24 Βακερντάς λένγκε εκ γιαβέρ-ντα παράδειγμας: «Η Βασιλεία ι ουρανόσκι ισί σαρ εκ τζενό σο τσσουντάς λατσσό σπόρος πι χωραφίστε. 25 Καζόμ σοβένας ο τζενέ, αβιλό λέσκο ντουσμάνι,* τσσουντάς γκεραλέ σπόροι* οτθέ σο ισινέ ο γκιβ ντα νασλό. 26 Κάνα μπαριλό ο γκιβ ντα νικαντάς καρπός, ντικχίντιλε ο γκεραλέ τσαριά-ντα.* 27 Οτθάρ, ο δούλοι οντουλέ τζενέσκε γκιλέ ντα βακερντέ λέσκε: “Κύριε, να τσσουντάν λατσσό σπόρος τι χωραφίστε; Σαρ αβέλα-πες τι τθερέλ γκεραλέ τσαριά;” 28 Βοβ βακερντάς λένγκε: “Μο ντουσμάνι κερντάς-λες ανταβά”. Ο δούλοι βακερντέ λέσκε: “Μανγκέσα τι τζας τι γκίντας-λεν;” 29 Ντα βοβ βακερντάς: “Νάα, σόσκε αντικάς μπορεί τι νικαβέν ριζάσαρ ο γκιβ-ντα γιεκ ι γκεραλέ τσαργίντζαρ. 30 Μουκχέν-λεν τι μπαριόν ο ντούι-ντα μέχρι κο βακίτι κι γκιντιμάσκο, ντα αζομάν κα βακεράβ ι τζενένγκε σο κα γκίντεν: Πρώτα γκίντεν ο γκεραλέ τσαριά ντα πφάντεν-λεν για τι πφαμπαρέν-λεν. Σοράν γκίντεν ο γκιβ μι αποθηκιάτε”».
31 Βακερντάς λένγκε εκ γιαβέρ-ντα παράδειγμας: «Η Βασιλεία ι ουρανόσκι ισί σαρ εκ μπουτ χουρντό σπόρος* σο λιντάς εκ τζενό ντα τσσουντάς πι χωραφίστε. 32 Ανταβά ισί ο πο χουρντό σαρέ κατά σπόροι. Αλλά κάνα μπαριόλα, αβέλα αζόμ μπαρό φυτός σο ισί σαρ δέντρος ντα ο τσιρικλέ αβένα ντα κερένα πουμαρέ φωλιές λέσκε κλαδίντε».
33 Βακερντάς λένγκε εκ γιαβέρ-ντα παράδειγμας: «Η Βασιλεία ι ουρανόσκι ισί σαρ μαγιά σο λιντάς-λα εκ τζουβέλ, ναμιντάς-λα μπερεκέτι βαρέσαρ ντα σαρό ο χουμέρ φουσκωσάλο».
34 Σαρέ ανταλά βακερντάς-λεν παραδειγματέντζαρ ο Ιησούς κο μπουτ τζενέ σο ισινέ οτθέ. Ντα σάντε παραδειγματέντζαρ σικλιαρέλας-λεν, 35 για τι νικιόλ μπαγιά οντουβά σο βακέρντιλοας αντράλ κατά προφήτης: «Κα σικλιαράβ παραδειγματέντζαρ, κα μουτθαβάβ πράγματα σο ισί γκεραντέ οτθάρ μπερί σο μπιάντιλε τζενέ κι πφουβ».
36 Αζομάν μουκχλάς ι τζενέν ντα γκιλό κο κχερ. Ντα λέσκε μαθητές γκιλέ πασέ λέστε ντα βακερντέ: «Ντε-αμέν τι αγαβάς ο παράδειγμας ι γκεραλέ τσαργίνγκο σο μπαριλέ κο χωράφι». 37 Βοβ βακερντάς: «Ο τζενό σο τσσουντάς ο λατσσό σπόρος ισί ο Τσσαβό ι τζενέσκο. 38 Ο χωράφι ισί ο ντουνιάς. Ο λατσσό σπόρος ισί ο τσσαβέ ι Βασιλειάκε, αλλά ο γκεραλέ τσαριά ισί ο τσσαβέ ι Μπενγκέσκε.* 39 Ο ντουσμάνι σο τσσουντάς-λεν ισί ο Μπενγκ. Ο γκιντιπέ ισί ο τελευταία ντιβεσά ανταλέ ντουνιάσκε* ντα οντουλά σο γκίντενα ισί ο άγγελοι. 40 Σαρ ο γκεραλέ τσαριά γκιντίντιβενα ντα πφαμπόνα γιακάσαρ,* αντικάς κα αβέλ-πες κο τελευταία ντιβεσά-ντα ανταλέ ντουνιάσκε.* 41 Ο Τσσαβό ι τζενέσκο κα μπουτσσαβέλ πι αγγελόν ντα βον κα γκίντεν λέσκε Βασιλειάταρ σαρέ οντουλέν σο κερένα ι γιαβερέν τι αμαρτίνεν,* αλλά εμ οντουλέν σο κερένα γκεραλέ* πράγματα, 42 ντα κα τσσουβέν-λεν κι μπαρί γιακ. Οτθέ κα ροβέν ντα κα σικίνεν πουμαρέ ντανά.* 43 Οντουβά βακίτι ο δίκαιοι κα λεν-πες αζόμ μπουτ κι Βασιλεία πουμαρέ Νταντέσκι σαρ λέλα-πες ο κχαμ. Κον τθερέλα κανά για τι ασουνέλ, τι ασουνέλ.
44 »Η Βασιλεία ι ουρανόσκι ισί σαρ εκ θησαυρός γκεραντό κο χωράφι, σο αρακχλάς-λες εκ τζενό ντα γκεραντάς-λες. Ντα πι χαράταρ τζάλα ντα μπικινέλα σο-ντα τθερέλα ντα κινέλα οντουβά χωράφι.
45 »Η Βασιλεία ι ουρανόσκι ισί σαρ εκ έμπορας-ντα σο ρόντελας τι αρακχέλ λατσσέ μαργαριτάρια. 46 Κάνα αρακχλάς εκ μαργαριτάρι σο τθερέλας μπαρί αξία, νασλό, μπικιντάς σουγκό σαρέ οντουλά σο τθερέλας ντα κιντάς-λες.
47 »Η Βασιλεία ι ουρανόσκι ισί σαρ εκ μπαρό δίχτυ-ντα σο τσσουβντιλό κι ντεριάβ ντα γκιντιντάς σαβέ τι μανγκές ματσσέ. 48 Κάνα πφερντιλό, ταρτιντέ-λες αβρί, μπεσλέ τελέ ντα γκιντιντέ ο λατσσέ αντρέ κο σεβλιά,* αλλά οντουλά σο να χαλιόνας φουρτιντέ-λεν. 49 Αντικάς κα αβέλ-πες κο τελευταία ντιβεσά-ντα ανταλέ ντουνιάσκε.* Ο άγγελοι κα αβέν ντα κα νικαβέν ι πφιρνέν* αντράλ κατά δίκαιοι 50 ντα κα τσσουβέν-λεν κι μπαρί γιακ. Οτθέ κα ροβέν ντα κα σικίνεν πουμαρέ ντανά.*
51 »Αγαντέν σο μανγκένα τι βακερέν σαρέ ανταλά;» Βον βακερντέ λέσκε: «Βα». 52 Σοράν βακερντάς λένγκε: «Οτθάρ τι τζανέν ότι κάθε δάσκαλος* σο σικλιόλα ι ουρανόσκε Βασιλειάκε ισί σαρ ο σορό εκχέ φαμιλιάκο σο νικαβέλα πι θησαυρόσταρ εμ νεβέ εμ πουρανέ πράγματα».
53 Κάνα ο Ιησούς βακερντάς ανταλά παραδείγματα, νασλό οτθάρ. 54 Αβιλό πι τθεμέστε ντα σικλιαρέλας ι τζενέν κι συναγωγή. Βον ατσσόνας πουταρντέ μόσαρ ντα βακερένας: «Σαρ αβιλό ανταβά τζενό αζόμ γκοντιαβέρ ντα σαρ κερέλα ανταλά θαύματα; 55 Ανταβά νανέ ο τσσαβό ι ξυλουργόσκο; Να βακέρντιβελα λέσκι ντάι Μαρία ντα λέσκε πφραλά Ιάκωβος, Ιωσήφ, Σίμωνας ντα Ιούδας; 56 Ντα λέσκε πφενιά νανέ σαρέ ατθέ αμέντζαρ; Σαρ αβέλα-πες τι βακερέλ ντα τι κερέλ σαρέ ανταλά;» 57 Οτθάρ, να μανγκλέ τι πακιάν λέστε. Αλλά ο Ιησούς βακερντάς λένγκε: «Σαρέ κο τθεμά εκτιμίνενα ι προφητής εκτός λέσκε τθεμέσταρ ντα λέσκε κχερέσταρ». 58 Ντα να κερντάς μπουτ θαύματα οτθέ σόσκε να τθερένας πίστη.