Γράμμας σο Μπουτσσάντιλο κο Ρωμαίοι
15 Αμέν όμως σο ισινάμ ζουρανέ πρέπει τι τθεράς αμαρέ γκοντιάτε οντουλέν σο ισί μπίζουρανε,* ντα μα τι κεράς σάντε αμαρό γκι. 2 Ο κάθε εκ αμένταρ τι κερέλ ο γκι ι γιαβερέσκο* ντα τι κερέλ ο λατσσιπέ λέσκε για τι ντελ-λες ζορ. 3 Ατζέ-ντα ο Χριστός να κερντάς πο γκι, αλλά σαρ ισί γραμμέ: «Ο πρασαΐματα οντουλένγκε σο πρασάνα-τουτ πελέ οπρά-μάντε». 4 Επειδή σαρέ οντουλά σο γραφισάλε κο πουρανέ μπρεσά γραφισάλε αμαρέ σικλιαριμάσκε, ντα αντικάς τι τθεράς ελπίδα αντράλ κατά υπομονή σο κεράσα ντα κατά Γραφή σο λοκχιαρέλα αμαρό γκι.* 5 Ο Ντεβέλ τι ντελ-τουμέν υπομονή ντα τι λοκχιαρέλ τουμαρό γκι,* ντα προσευχίντιβαβα τι ντελ σαρέ τουμέντε ο ίδιος τρόπος σκέψης σο τθερέλας ο Χριστός Ιησούς, 6 ντα αντικάς σαρέ γιεκ, εκχέ μόσαρ, τι δοξάνεν ι Ντεβλές σο ισί ο Ντατ αμαρέ Κυριόσκο, ι Ιησού Χριστόσκο.
7 Οτθάρ, τι δεχτίνεν λατσσιμάσαρ* ο εκ ι γιαβερές, σαρ ο Χριστός-ντα δεχτιντάς λατσσιμάσαρ τουμέν. Ανταβά ντέλα δόξα κο Ντεβέλ. 8 Βακεράβα τουμένγκε ότι ο Χριστός αβιλό υπηρέτης οντουλένγκο σο κερντέ περιτομή για τι σικαβέλ ότι ο Ντεβέλ βακερέλα αλήθεια ντα ότι ισί μπαγιά οντουλά σο ντινάς πο λάφι Βοβ λένγκε παππουδέντε τι κερέλ. 9 Ανταβά αβιλό-πες εμ για τι δοξάνεν ο τθεμά ι Ντεβλές σο τζιτζίνελα* λένγκε. Σαρ ισί γραμμέ: «Άκ’ σόσκε κα δοξάναβ-τουτ αντρέ κο τθεμά, ντα κα ισαράβ το ναβ γκιλίντζαρ». 10 Ντα πάλι βακερέλα: «Χαιρίνεν μπουτ, τουμέν ο τθεμά, γιεκ λέσκε λαόσαρ». 11 Ντα πάλι: «Ισαρέν ι Ιεχωβάς,* σαρέ ο τθεμά, ντα σαρέ ο λαοί τι ισαρέν-λες». 12 Ντα πάλι ο Ησαΐας βακερέλα: «Κα αβέλ η ρίζα ι Ιεσσαίσκι, οντουβά σο κα σικάντιβελ για τι κερέλ κουμάντος τθεμέν. Λέστε κα ντεν μπέσα* τζενέ σαρέ κατά τθεμά». 13 Ο Ντεβέλ σο ντέλα ελπίδα τι πφερέλ-τουμέν μπουτ χαρά ντα ειρήνη αφού ντένα μπέσα λέστε, ντα αντικάς τι τθερέν μπερεκέτι ελπίδα ντα τι πφερντιόν ζορ κατά άγιος πνεύμας.
14 Πφραλάλεν, ισινόμ ντιπ σίγουρος ότι ισινέν πφερντέ λατσσιπέ ντα μπουτ σικλιαριπέ, ντα ότι μπορίνενα τι σικλιαρέν* ο εκ ι γιαβερές. 15 Όμως, μερικά πράγματα γραφιντόμ-λεν τουμένγκε ντιπ λατσσές για τι ανάβ-λεν πάλι τουμαρέ γκοντιάτε, αντράλ κατά μπαρό λατσσιπέ σο σικαντάς μάνγκε ο Ντεβέλ. 16 Ισινόμ υπηρέτης ι Χριστόσκο, ι Ιησούσκο, κο τθεμά. Κεράβα ο άγιος έργος για τι μουτθάντιβεν ο λατσσέ αμπέρια ι Ντεβλέσκερε, ντα αντικάς ανταλά τθεμά τι αβέν θυσία σο κερέλα ο γκι ι Ντεβλέσκο, θυσία σο ισί αγιασμέ λέσκε αντράλ κατά άγιος πνεύμας.
17 Τθεράβα μπαρί χαρά σο ισινόμ μαθητής ι Χριστόσκο, ι Ιησούσκο, ντα σο κεράβα ο έργος ι Ντεβλέσκο. 18 Να κα κεράβ λάφι καεκχέ πραγμάσκε αλλά σάντε οντουλένγκε σο κερντάς ντα βακερντάς ο Χριστός αντράλ μάνταρ για τι ντεν καν ο τθεμά. 19 Ντινέ καν αντράλ κατά ζουρανέ σημάδια ντα κατά θαύματα σο αβιλέ-πες κατά πνεύμας ι Ντεβλέσκο. Ντα αντικάς, κατά Ιερουσαλήμ μέχρι κο Ιλλυρικός, μουτθαντόμ ντιπ ο λατσσέ αμπέρια σο τθερένα τι κερέν ι Χριστόσαρ. 20 Κερντόμ ο πο λατσσό σο μπορίναβας για μα τι μουτθαβάβ ο λατσσέ αμπέρια οτθέ σο ασουντέ ι Χριστόσκε, επειδή να μανγκάβας τι χτίναβ οπράλ κο θεμέλιος εκχέ γιαβερέσκο, 21 αλλά σαρ ισί γραμμέ: «Οντουλά σο να βακέρντιλο λένγκε τίποτα λέσκε κα ντικχέν, ντα οντουλά σο να ασουντέ κα αγαβέν».
22 Οτθάρ-ντα, μπουτ φαρ να μπορισάλομ τι αβάβ τουμέντε. 23 Αλλά ακανά μπιτισκιαρντόμ μο έργος ανταλέ τθανέντε, ντα μπερεκέτι μπρεσά ακανά, μανγκάβα μπουτ τι αβάβ τουμέντε. 24 Οτθάρ, κάνα κα τζαβ κι Ισπανία, πακιάβα ότι κα ντικχάβ-τουμέν ντα ότι κα αβέν παλά-μάντε μέχρι εκχέ τθανέστε, αφού πρώτα κα λαβ χαρά χάνικ βακίτι σο κα αβάβ τουμέντζαρ. 25 Αλλά ακανά ισί τι τζαβ κι Ιερουσαλήμ για τι υπηρετίναβ ι αγιόν. 26 Ο πφραλά κι Μακεδονία ντα κι Αχαΐα ιλιαντέ χαράσαρ πουμαρέ πράγματα για τι βοηθίνεν ι τσορορέ αγιόν κι Ιερουσαλήμ. 27 Οντουλά πφραλά κερντέ-λες ανταβά χαράσαρ, σόσκε ισινέ υποχρεωμέ λέντε, επειδή ο πφραλά κι Ιερουσαλήμ ιλιαντέ πουμαρέ πνευματικά πράγματα λέντζαρ. Άρα, βον ισί υποχρεωμέ τι ντεν πουμαρέ πραγματένταρ κο πφραλά κι Ιερουσαλήμ για τι βοηθίνεν-λεν. 28 Αλλά ακανά γκεράβα κι Ιερουσαλήμ ο πράγματα σο μπουτσσαντέ ο πφραλά κο άγιοι. Κάνα κα μπιτισκιαράβ-λες ανταβά, κα νακχάβ τουμένταρ για τι τζαβ κι Ισπανία. 29 Ντα τζανάβα ότι, κάνα κα αβάβ τουμέντε, κα ανάβ τουμένγκε μπαρί ευλογία κατά Χριστός.
30 Βακεράβα τουμένγκε, πφραλάλεν, αντράλ αμαρέ Κυριόσταρ κατά Ιησούς Χριστός ντα αντράλ κατά αγάπη ι άγιε πνευμάσκι, τι προσευχίντιβεν αντράλ τουμαρέ γκίσταρ κο Ντεβέλ μάνγκε, σαρ κεράβα με-ντα. 31 Προσευχίντιβεν για τι γλιτώναβ οντουλένταρ σο ισί κι Ιουδαία ντα να τθερένα πίστη, ντα για τι αβέλ ο γκι ι αγιόνγκο κι Ιερουσαλήμ οντουλέ πραγματέντζαρ σο γκεράβα λένγκε. 32 Ντα άμα μανγκέλα ο Ντεβέλ, κα αβάβ τουμέντε χαράσαρ ντα σαρέ κα λας ζορ. 33 Ο Ντεβέλ σο ντέλα ειρήνη τι αβέλ σαρέ τουμέντζαρ. Αμήν.