Πράξεις ι Αποστολόνγκε
16 Ερεσλό κι Δέρβη ντα σοράν γκιλό κο Λύστρα. Οτθέ ισινέ εκ μαθητής σο βακέρντιβελας Τιμόθεος. Λέσκι ντάι ισινέ πιστή Ιουδαία αλλά λέσκο ντατ ισινέ Μπαλαμό. 2 Βοβ τθερέλας λατσσό ναβ κο πφραλά σο ισινέ κο Λύστρα ντα κο Ικόνιος. 3 Ο Παύλος βακερντάς ότι μανγκέλας παλά-πέστε ι Τιμοθεός, ντα λιντάς-λες ντα κερντάς λέσκε περιτομή, σόσκε σαρέ o Ιουδαίοι οντουλέ τθανέντε τζανένας ότι λέσκο ντατ ισινέ Μπαλαμό. 4 Καζόμ νακχένας κατά πόλεις, βακερένας κο πφραλά οντουλά σο αποφασιντέας ο απόστολοι ντα ο πρεσβύτεροι κι Ιερουσαλήμ, για τι κερέν-λεν. 5 Ντα αντικάς ο πφραλά κο κχανγκιριά αβένας πο ζουρανέ κι πίστη ντα αβγατίντιβενας κάθε ντιβές.
6 Νακχλέ εμ κατά Φρυγία ντα κατά Γαλατία, σόσκε ο άγιος πνεύμας να μουκχλάς-λεν τι βακερέν ο λάφι ι Ντεβλέσκο κι Ασία.* 7 Ντα κάνα ερεσλέ κι Μυσία, προσπαθιντέ τι τζαν κι Βιθυνία, αλλά ο πνεύμας ι Ιησούσκο να μουκχλάς-λεν. 8 Οτθάρ, νακχαντέ ι* Μυσία ντα γουλίστιλε κι Τρωάδα. 9 Ντα αντρέ κι ιράτ ο Παύλος ντικχλάς εκχέ φαντασιάτε εκχέ μουρσές κατά Μακεδονία τι ατσσόλ οτθέ ντα τι μολίνελ-λες ακαλέ λαφίντζαρ: «Νακχ κι Μακεδονία ντα βοήθινε-αμέν». 10 Κάνα βοβ ντικχλάς ι φαντασία, προσπαθιντάμ τι τζας κι Μακεδονία, σόσκε αγαντάμ ότι ο Ντεβέλ βακερντάας αμένγκε τι μουτθαβάς λένγκε ο λατσσέ αμπέρια.
11 Οτθάρ, νασλάμ καραβίσαρ κατά Τρωάδα ντα γκιλάμ σουγκό κι Σαμοθράκη, ντα ο γιαβέρ ντιβές κι Νεάπολη. 12 Σοράν γκιλάμ κο Φίλιπποι, σο ισί ρωμαϊκή πόλη ντα η πο σημαντική πόλη κι Μακεδονία. Μπεσλάμ οτθέ χάνικ ντιβεσά. 13 Κο Σάββατος νικίστιλαμ αβρί κατά μπαρί πόρτα, πασέ εκχέ λενιάτε, σο πακιάας ότι οτθέ ισινέ τθαν προσευχιάκο, ντα μπεσλάμ ντα κεράας λάφι κο τζουβλιά σο ισινέ γκιντιμέ οτθέ. 14 Ντα εκ τζουβέλ κατά Θυάτειρα σο βακέρντιβελας Λυδία ντα μπικινέλας μοβ σέα ντα ντέλας λατρεία ι Ντεβλές, ασουνέλας, ντα ο Ιεχωβά* πουταρντάς ντιπ λάκο γκι για τι ντελ προσοχή οντουλέντε σο βακερέλας ο Παύλος. 15 Κάνα μπολντιλί βόι ντα ο τζενέ σο ισινέ λάκε κχερέστε, μολιντάς-αμέν ακαλέ λαφίντζαρ: «Άμα πακιάνα ότι ισινόμ πιστή κο Ιεχωβά,* ελάν τι μπεσέν μι κχερέστε». Ντα κερντάς-αμέν τι τζας.
16 Καζόμ τζάας κο τθαν κι προσευχιάκο, ντικχλάς-αμέν εκ τερνί υπηρέτρια σο τθερέλας εκχέ δαιμονάς σο κερέλας-λα τι ντορικιαρέλ. Βόι νικαβέλας μπουτ λοβέ πι αφεντικόνγκε κάνα βακερέλας σο κα αβέλ-πες.* 17 Αβέλας παλάλ κο Παύλος ντα αμέντε ντα ντέλας βίκος ακαλέ λαφίντζαρ: «Ακαλά τζενέ υπηρετίνενα ι Ντεβλές σο Ισί Πο Οπρέ Σαριλένταρ ντα μουτθαβένα τουμένγκε σαρ τι σώντιβεν». 18 Κερέλας-λες ανταβά μπουτ ντιβεσά. Ντα ο Παύλος πφαριλό-πες, οτθάρ μπολντιντάς-πες ντα βακερντάς κο δαίμονας: «Ντάβα-τουτ εντολή κο ναβ κι Ιησού Χριστόσκο τι νικιός λάταρ». Ντα ο δαίμονας νικίστιλο οντιά στιγμή.
19 Οτθάρ, κάνα λάκε αφεντικά αγαντέ ότι να κα νικαβέλας λένγκε λοβέ, ασταρντέ ι Παυλός ντα ι Σιλάς ντα τσσιντιντέ-λεν μέχρι κι αγορά, κο άρχοντες. 20 Γκερντέ-λεν οντουλέντε σο κερένας κουμάντος κι πόλη ντα βακερντέ: «Ανταλά τζενέ ανένα μπουτ μπαρί βαβούρα κι πόλη. Ισί Ιουδαίοι 21 ντα σικλιαρένα πράγματα σο αμέν νανέ σωστός τι κεράς-λεν, σόσκε ισινάμ Ρωμαίοι». 22 Ντα ο μπουτ τζενέ σο ισινέ οτθέ γκιλέ σαρέ γιεκ ούρια οπρά-λέντε, ντα οντουλά σο κερένας κουμάντος κι πόλη πφαραντέ λένγκε σέα ντα ντινέ διαταγή τι νταπέν-λεν καστέντζαρ. 23 Αφού νταπλέ-λεν μπουτ, τσσουντέ-λεν κι φυλακή ντα βακερντέ κο φύλακας τι αρακχαβέλ-λεν μπουτ λατσσές για μα τι νασέν. 24 Βοβ, επειδή λιντάς ασακί διαταγή, τσσουντάς-λεν κι αντραϊνί φυλακή ντα πφαντάς λένγκε πιντρέ αντρέ κο κας.*
25 Αντρέ κι ιράτ, ο Παύλος ντα ο Σίλας προσευχίντιβενας ντα ισαρένας ι Ντεβλές γκιλίντζαρ, ντα ο φυλακισμέ ασουνένας-λεν. 26 Αζομάν αβιλό μπαρό σεισμός, ντα ο θεμέλια ι φυλακιάκε κουνιάντιλε. Ντα οντιά στιγμή πουτάρντιλε σαρέ ο πόρτες ντα ο τζαντζιριά* σαριλένγκε. 27 Κάνα ο φύλακας τζανγκάντιλο ντα ντικχλάς ο πόρτες ι φυλακιάκε πουταρντέ, νικαντάς αβρί πι τσσουρί ντα τζάλας τι μουνταρέλ-πες, σόσκε αμντίνελας ότι ο φυλακισμέ νασλέας. 28 Αλλά ο Παύλος ντινάς βίκος ζουρανές: «Μα κερ τούκε ζιάνι! Σαρέ ατθέ ισινάμ!» 29 Αζομάν βοβ μανγκλάς φως, γκιλό αντρέ σουγκό ντα πελό ανγκλάλ κο Παύλος ντα κο Σίλας ιζραϊμάσαρ. 30 Σοράν νικαντάς-λεν αβρί ντα βακερντάς λένγκε: «Σο πρέπει τι κεράβ για τι σώντιβαβ;» 31 Βον βακερντέ: «Τι πακιάς κο Κύριος Ιησούς ντα κα σώντιβες, τούι ντα οντουλά σο ισί τι κχερέστε». 32 Σοράν βακερντέ εμ λέσκε ο λάφι ι Ιεχωβάσκο* εμ σαρέ οντουλένγκε σο ισινέ λέσκε κχερέστε. 33 Ντα λιντάς-λεν αντρέ κι ιράτ ντα τθοντάς λένγκε πληγές. Σοράν, βοβ ντα σαρέ ο τζενέ σο ισινέ λέσκε κχερέστε μπολντιλέ χωρίς τι χασαρέν σαάτι. 34 Σοράν αντάς-λεν πι κχερέστε ντα κερντάς λένγκε τραπέζι ντα χαιρισάλο μπουτ γιεκ σαρέ οντουλέντζαρ σο ισινέ λέσκε κχερέστε ακανά σο πακιαντάας κο Ντεβέλ.
35 Κάνα ντισιλό, οντουλά σο κερένας κουμάντος κι πόλη μπουτσσαντέ οντουλέν σο αρακχαβένας τι βακερέν κο φύλακας: «Μουκχ οντουλέ τζενέν τι νασέν». 36 Ο φύλακας βακερντάς κο Παύλος λένγκε λάφια: «Οντουλά σο κερένα κουμάντος κι πόλη μπουτσσαντέ μουρσέν για τι μουκχάβ-τουμέν τι νασέν. Οτθάρ, νικιόν ακανά ντα τζαν τουμένγκε λατσσιμάσαρ». 37 Ο Παύλος όμως βακερντάς λένγκε: «Νταπλέ-αμέν ανγκλάλ σαριλέντε χωρίς τι αβέλ-πες δικαστήριος αμένγκε, παρόλο σο ισινάμ Ρωμαίοι, ντα τσσουντέ-αμέν κι φυλακή. Ακανά πάλντενα-αμέν αποτσοράλ; Να αβέλα-πες γιαβέρ! Τι αβέν βον τι νικαβέν-αμέν αβρί». 38 Οντουλά σο αρακχαβένας βακερντέ-λεν ανταλά οντουλένγκε σο κερένας κουμάντος κι πόλη. Βον νταρασάλε κάνα ασουντέ ότι ο τζενέ ισινέ Ρωμαίοι. 39 Οτθάρ, αβιλέ τι λεν-λεν λατσσιμάσαρ, ντα κάνα νικαντέ-λεν αβρί, μανγκλέ λένταρ τι νασέν κατά πόλη. 40 Αλλά βον νικίστιλε κατά φυλακή ντα γκιλέ κο κχερ κι Λυδιάκο. Ντα κάνα ντικχλέ ι πφραλέν, ντινέ-λεν ζορ ντα νασλέ.