Ο Ευαγγέλιος σο Γραφιντάς ο Ματθαίος
3 Οντουλά ντιβεσά, ο Ιωάννης σο μπολέλας* αβιλό κι έρημος κι Ιουδαία ντα μουτθαβέλας ι Ντεβλέσκε λάφια. 2 Βακερέλας: «Μετανιώνεν, σόσκε η Βασιλεία ι ουρανόσκι ισί πασέ». 3 Λέσαρ τθερένα τι κερέν ο λάφια σο βακέρντιλε αντράλ κατά προφήτης Ησαΐας: «Εκ τζενό ντέλα βίκος ζουρανές κι έρημος: “Ετοιμάνεν ι Ιεχωβάσκο* ντρομ! Κερέν ίσια λέσκε ντρομά”». 4 Ο Ιωάννης ιρίλας σέα κερντέ γκαμηλάκε μπαλένταρ ντα τθερέλας δερμάτινη κουστίκ* πι ντουμέστε. Χάλας ακρίδες ντα αβγίν. 5 Αζομάν τζάνας λέστε τζενέ κατά Ιερουσαλήμ ντα σαρί κατά Ιουδαία ντα σαρέ κατά τθανά ντονταλάι κατά Ιορδάνης 6 ντα μπολντιόνας λέσταρ* κι Λεν Ιορδάνης, ντα μουτθαβένας πουμαρέ αμαρτίες ανγκλάλ κο γιαβερά.
7 Κάνα ντικχλάς μπουτέ Φαρισαιόν ντα Σαδδουκαιόν τι αβέν κο μπολντιπέ, βακερντάς λένγκε: «Τουμέν, σο ισινέν τσσαβέ οχιάκε, κον βακερντάς τουμένγκε ότι μπορίνενα τι νασέν κατά μπαρί χολί σο κα αβέλ; 8 Σικαβέν οντουλέντζαρ σο κερένα ότι μετανιωσάλεν.* 9 Μα αμντίνεν ότι μπορίνενα τι βακερέν αντρέ τουμέντε: “Αμαρό ντατ ισί ο Αβραάμ”. Σόσκε βακεράβα τουμένγκε ότι ο Ντεβέλ τθερέλα ι ζορ τι νικαβέλ τσσαβέν ι Αβρααμίσκε ακαλέ μπαρένταρ. 10 Ο τσεκούρι ισί ακανά κι ρίζα κι δεντρόνγκι. Οτθάρ, κάθε δέντρος σο να νικαβέλα λατσσό καρπός κα τσσιντιόλ ντα κα φουρτίντιβελ κι γιακ.* 11 Με μπολάβα-τουμέν πανίσαρ σόσκε μετανιωσάλεν, αλλά οντουβά σο αβέλα σοράν μάνταρ ισί πο ζουρανό μάνταρ, ντα με να ισινόμ άξιος ούτε λέσκε τεραχά* τι νικαβάβ. Βοβ κα μπολέλ-τουμέν άγιε πνευμάσαρ ντα γιακάσαρ.* 12 Τθερέλα πι βαστέστε ι τσουγκράνα για τι νασκιαρέλ ο πουσά ντα κα κερέλ ντιπ πάκι πο τθαν.* Κα γκίντελ πο γκιβ κι αποθήκη, αλλά ο πουσά κα πφαμπαρέλ-λεν γιακάσαρ σο να μερέλα».
13 Αζομάν ο Ιησούς αβιλό κατά Γαλιλαία κο Ιορδάνης για τι μπολντιόλ κατά Ιωάννης. 14 Αλλά βοβ προσπαθιντάς τι τσσιναβέλ-λες ακαλέ λαφίντζαρ: «Με πρέπει τι μπολντιάβ τούταρ, ντα τούι αβέσα μάντε;» 15 Ο Ιησούς βακερντάς λέσκε: «Μα τσσίναβ-μαν, σόσκε αντικάς πρέπει τι κεράς για τι νικιόν μπαγιά σαρέ οντουλά σο ισί δίκαια κο γιακχά κι Ντεβλέσκε». Σοράν ανταλέσταρ να τσσιναντάς-λες πάλι. 16 Ο Ιησούς μπολντιλό ντα σοράν νικλιντάς σουγκό κατά πανί. Αζομάν πουτάρντιλο ο ουρανός ντα ντικχλάς ο πνεύμας ι Ντεβλέσκο τι γουλίλ σαρ περιστέρι ντα τι αβέλ οπρά-λέστε. 17 Ντα ασούντιλε ακαλά λάφια κατά ουρανός: «Ακαβά ισί μο Τσσαβό σο μανγκάβα-λες μπουτ ντα κερέλα μο γκι».