Πράξεις ι Αποστολόνγκε
20 Κάνα ηρεμισάλε ο τζενέ, ο Παύλος ντινάς βίκος πι μαθητέν, ντινάς-λεν ζορ ντα χαιρετιντάς-λεν. Σοράν νασλό για τι τζαλ κι Μακεδονία. 2 Κάνα νακχλό οντουλέ τθανένταρ, βακερντάς κο πφραλά σο ισινέ οτθέ μπουτ λάφια για τι ντελ-λεν ζορ ντα σοράν ερεσλό κι Ελλάδα. 3 Μπεσλό οτθέ τριν μασεκά, αλλά κάνα ισινέ τι νασέλ καραβίσαρ για τι τζαλ κι Συρία αγαντάς ότι ο Ιουδαίοι τθερένας πουμαρέ γκοντιάτε τι μουνταρέν-λες, οτθάρ λιντάς ι απόφαση τι νακχέλ κατά Μακεδονία για τι βουρτίνελ παλάλ. 4 Τζάνας παλά-λέστε ο Σώπατρος κατά Βέροια, σο λέσκο ντατ ισινέ ο Πύρρος, ο Αρίσταρχος ντα ο Σεκούνδος κατά Θεσσαλονίκη, ο Γάιος κατά Δέρβη, ο Τιμόθεος, ντα κατά Ασία,* ο Τυχικός ντα ο Τρόφιμος. 5 Βον γκιλέας ανγκλάλ ντα μπεσένας αμένγκε κι Τρωάδα, 6 αλλά αμέν νασλάμ καραβίσαρ κατά Φίλιπποι σοράν κατά Μπαρέ Ντιβεσά ι Μπι-μαγιάκε Μαντρένγκε, ντα αντρέ παντζέ ντιβεσέντε αρακχλάμ-λεν κι Τρωάδα ντα μπεσλάμ οτθέ εφτά ντιβεσά.
7 Ο πρώτος ντιβές ι εβδομαδάκο, σαρ ισινάμας γκιντιμέ για τι χας, ο Παύλος αρχισάλο τι κερέλ λέντζαρ λάφι, σόσκε ισινέ τι νασέλ ο γιαβέρ ντιβές. Ντα κερέλας λάφι μέχρι ντιπ αντρέ κι ιράτ. 8 Ισινέ μπουτ λυχνάρια κο οπραϊνό δωμάτιος σο ισινάμας γκιντιμέ. 9 Ντα εκχέ τερνές, ι Ευτυχός, σο μπεσέλας κο παράθυρος, λιντάς-λες πφαρί λίντρα καζόμ ο Παύλος κερέλας λάφι. Ντα οτθέ σο σοβέλας, πελό κατά τρίτος όροφος ντα βαντιντέ-λες μουλό. 10 Αλλά ο Παύλος γουλίστιλο τελέ, πελό οπρά-λέστε, λιντάς-λες ανγκάλι ντα βακερντάς: «Μα ντεν βίκος, σόσκε ισί τζουβντό».* 11 Σοράν νικλιντάς οπρέ ντα χαλέ. Κερέλας λέντζαρ λάφι μπουτ σαάτι, μέχρι κο ντίσιπε, ντα σοράν νασλό. 12 Ντα λιντέ ι τσσαβές τζουβντό ντα λοκχιλό μπουτ λένγκο γκι.*
13 Αμέν νικλιντάμ κο καράβι ντα νασλάμ για τι τζας κι Άσσος, αλλά ο Παύλος γκιλό οτθέ πφιριντός. Οντουλέ τθανέσταρ κα λάας-λες αντικάς σαρ βακερντάας αμένγκε. 14 Κάνα ερεσλάμ κι Άσσος, λιντάμ-λες ντα γκιλάμ κι Μυτιλήνη. 15 Ντα κάνα νασλάμ καραβίσαρ οτθάρ ο γιαβέρ ντιβές, ερεσλάμ οκιά μπάνταρ κατά Χίος, ο γιαβέρ ντιβές μπεσλάμ χάνικ κι Σάμος ντα οκουβά ντιβές ερεσλάμ κι Μίλητος. 16 Ο Παύλος λιντάας ι απόφαση μα τι τζαλ κι Έφεσος για μα τι χασαρέλ ιτς σαάτι κι Ασία,* σόσκε μανγκέλας τι ερεσαβέλ τι τζαλ κι Ιερουσαλήμ κο Μπαρό Ντιβές, κι Πεντηκοστή.
17 Όμως, κατά Μίλητος μπουτσσαντάς αμπέρι κι Έφεσος ντα ντινάς βίκος ι κχανγκιριάκε πρεσβυτερόν. 18 Κάνα γκιλέ λέστε, βακερντάς λένγκε: «Τουμέν τζανένα λατσσές σο πράγματα κερντόμ τουμέντε κατά πρώτος ντιβές σο αβιλόμ κι Ασία,* 19 καζόμ υπηρετίναβας σαρ δούλος ι Κυριός ντιπ ταπεινέ τροπόσαρ ντα ροϊμάσαρ ντα ι δυσκολιέντζαρ σο νακχλόμ κάνα ο Ιουδαίοι μανγκένας τι μουνταρέν-μαν. 20 Να σακιντισάλομ τι βακεράβ τουμένγκε σο-ντα ισινέ τουμαρέ λατσσιμάσκε ντα τι σικλιαράβ-τουμέν ανγκλάλ σαριλέντε ντα κχερ κχερέστε. 21 Αλλά εμ κο Ιουδαίοι εμ κο Μπαλαμέ μουτθαντόμ λένγκε ντιπ λατσσές ότι πρέπει τι μετανιώνεν ντα τι πακιάν κο Ντεβέλ ντα αμαρέ Κυριόστε κο Ιησούς. 22 Ντα ακανά, τζάβα κι Ιερουσαλήμ αντικάς σαρ σικαβέλα μάνγκε ο άγιος πνεύμας, παρόλο σο να τζανάβα σο κα αβέλ-πες μάνγκε οτθέ, 23 αλλά τζανάβα ότι καζόμ τζάβα τθαν τθανέστε ο άγιος πνεύμας σικαβέλα μάνγκε παλάλ γιαβερέστε ότι κα πφάντεν-μαν φυλακή ντα κα νακχάβ στεναχώριες. 24 Όμως, πακιάβα ότι μι ζωή* νανέ ιτς σημαντική* μάνγκε, σόσκε οντουβά σο μανγκάβα ισί τι μπιτισκιαράβ μι μπουτί ντα ο έργος σο ντινάς-μαν ο Κύριος Ιησούς, τι μουτθαβάβ ντιπ κο τζενέ ο λατσσέ αμπέρια σο τθερένα τι κερέν ι Ντεβλέσκε μπαρέ λατσσιμάσαρ.
25 »Ντα ακανά τζανάβα ότι σαρέ τουμέν σο μουτθαντόμ τουμένγκε ι Βασιλειάκε, να κα ντικχέν-μαν ατζέκ φαρ. 26 Οτθάρ, μανγκάβα τουμένταρ τι βακερέν αντιβές ότι μπαγιά να τθεράβα οπρά-μάντε καεκχέσκο ρατ, 27 σόσκε να σακιντισάλομ τι βακεράβ τουμένγκε σο-ντα τθερέλα πι γκοντιάτε τι κερέλ ο Ντεβέλ. 28 Τθερέν τουμαρί γκοντί τουμέντε ντα σαρέ κι Ντεβλέσκε μπρακέ, σο τσσουντάς-τουμέν ο άγιος πνεύμας τι αρακχαβέν-λεν, για τι αβέν τσομπάνια κι κχανγκιρί κι Ντεβλέσκι σο κιντάς-λα πι Τσσαβέσκε ρατέσαρ. 29 Τζανάβα ότι κάνα κα νασάβ κα τσσουβέν-πες αντρέ κι κχανγκιρί πφιρνέ ρουβά* σο να κα σικαβέν ιτς λατσσιπέ κι Ντεβλέσκε μπρακέ, 30 τουμένταρ-ντα κα νικιόν μουρσά σο κα βακερέν λάθος πράγματα για τι κερέν ι μαθητέν τι τζαν παλά-λέντε.
31 »Οτθάρ, τι ατσσόν τζανγκαντέ ντα τι ντεν-τουμέν γκοντί ότι τριν μπρεσά, ντισάρα ντα ιράτ, να τσσιναντόμ τι νταβ συμβουλές ι κάθε εκχές τουμένταρ ροϊμάσαρ. 32 Ντα ακανά μουκχάβα-τουμέν κο βαστά κι Ντεβλέσκε ντα κο λάφι σο τθερέλα τι κερέλ λέσκε μπαρέ λατσσιμάσαρ. Ανταβά λάφι μπορίνελα τι ντελ-τουμέν ζορ ντα τι πουτρέλ τουμένγκε ο ντρομ για τι λεν οντουβά* σο ντέλα ο Ντεβέλ σαρέ κο άγιοι. 33 Να μανγκλόμ τι λαβ καεκχέσκο ασήμι ή χρυσάφι ντα καεκχέσκε σέα. 34 Τουμέν τζανένα ότι ακαλά βαστά κερντέ μπουτί για τι τθεράβ με ντα ο τζενέ σο ισινέ μάντζαρ οντουλά σο χρειαζίντιβαας. 35 Σικαντόμ τουμένγκε σαρέ κο πράγματα ότι αντικάς πρέπει τι μαρέν-τουμέν για τι βοηθίνεν οντουλέν σο ισί μπίζουρανε ντα ότι πρέπει τι ντεν-τουμέν γκοντί ο λάφια ι Κυριόσκε, ι Ιησούσκε σο βακερντάς: “Ισί πο ευτυχισμέ εκ τζενό κάνα ντέλα παρά κάνα λέλα”».
36 Ντα κάνα βακερντάς-λεν ανταλά, πελό κο κοτσά γιεκ σαριλέντζαρ ντα προσευχισάλο. 37 Αζομάν σαρέ ροντέ ζουρανές ντα ντινέ ανγκάλι ι Παυλός ντα τσσουμίντενας-λες μανγκιμάσαρ,* 38 σόσκε τθερένας μπαρί ντουκχ ιτιρί ανταλέσταρ σο βακερντάας, ότι να κα ντικχένας-λες ατζέκ φαρ. Ντα γκερντέ-λες μέχρι κο καράβι.