Ο Γράμμας σο Γραφιντάς ο Ιάκωβος
5 Ασουνέν, ακανά, τουμέν ο χουλανέ, ροβέν βικόσαρ οντουλένγκε σο μπεσένα τι τσσίντεν. 2 Τουμαρό χουλανιπέ κερνιλό ντα τουμαρέ σέα χαλάς-λεν ο σκόρος. 3 Τουμαρό χρυσάφι ντα τουμαρό ασήμι σκουριασάλε ντιπ, ντα λένγκι σκουριά κα σικαβέλ ο λάθος σο κερντέν ντα κα χαλ τουμαρό σώμας. Οντουβά σο γκιντιντέν κα αβέλ σαρ γιακ* κο τελευταία ντιβεσά. 4 Ο λοβέ σο να ντινέν κο τζενέ σο κερντέ μπουτί τουμαρέ χωραφίντε κο γκιντιπέ ντένα βίκος ζουρανές. Ανταλά τζενέ ντένα βίκος για τι μανγκέν βοήθεια, ντα λένγκο βίκος ερεσλό κο κανά κι Ιεχωβάσκε* σο ισί ο αρχηγός ι ουρανόσκο. 5 Οπράλ κι πφουβ τζουβντιλέν αντρέ κο χουλανιπέ ντα κερντέν σο-ντα μανγκένας. Τουμαρό γκι ισί σαρ ο ζώα σο χάνα ντα τθουλιόνα μέχρι κο ντιβές σο κα τσσινέν-λεν. 6 Καταδικαντέν, μουνταρντέν ι δίκαιε τζενές. Να τζάλα τουμέντζαρ κόντρα βοβ;
7 Οτθάρ, πφραλάλεν, κερέν υπομονή μέχρι κο βουρτιπέ κι Κυριόσκο. Ντικχέν! Ο γεωργός μπεσέλα τι νικαβέλ η πφουβ ο καρπός σο τθερέλα μπαρί αξία ντα κερέλα υπομονή μέχρι τι αβέν ο πρώτα ντα ο τελευταία μπρισιμά. 8 Τουμέν-ντα κερέν υπομονή. Κερέν σταθερός τουμαρό γκι, σόσκε ο βουρτιπέ ι Κυριόσκο ισί πασέ.
9 Πφραλάλεν, μα γκρινιάνεν* ο εκ ι γιαβερέσκε για μα τι κρίντιβεν. Ντικχέν! Οντουβά σο Κρίνελα ισί ανγκλάλ κι πόρτα. 10 Πφραλάλεν, τι αβέν σαρ ο προφήτες σο τσσιντιντέ μπουτ πράγματα, σο τθερένας υπομονή ντα σο κερντέ λάφι κο ναβ κι Ιεχωβάσκο.* 11 Πακιάσα ότι ισί ευτυχισμέ* οντουλά σο κερντέ υπομονή. Ασουντέν σαρ κερντάς υπομονή ο Ιώβ ντα ντικχλέν σο κερντάς ο Ιεχωβά.* Ντικχένα μπουτ λατσσές ότι ο Ιεχωβά* αγαβέλα ι ντουκχ ι τζενένγκι* ντα τζιτζίνελα* λένγκε.
12 Πφραλάλεν, ισί μπουτ σημαντικός ανταβά σο κα βακεράβ τουμένγκε. Μα χαν σοβέλ κο ουρανός ή κι πφουβ ή εκχέ γιαβερέ πραγμάστε. Αλλά τουμαρό «Βα» τι αβέλ βα, ντα τουμαρό «Όχι», όχι, για μα τι κρίνελ-τουμέν ο Ντεβέλ.
13 Ισί καέκ τουμένταρ σο τσσίντελα μπουτ; Τι προσευχίντιβελ. Ισί καέκ χαρούμενος; Τι βακερέλ γκιλιά σο ισαρένα ι Ντεβλές. 14 Ισί καέκ τουμένταρ νασφαλό;* Τι ντελ βίκος ι πρεσβυτερόν σο ισί κι κχανγκιρί, ντα βον τι προσευχίντιβεν λέσκε ντα τι τσσουβέν λέσκε σορέστε λάδι κι Ιεχωβάσκο* ναβ. 15 Ντα η προσευχή σο αβέλα με πίστη κα κερέλ λατσσές ι νασφαλέ* τζενές, ντα ο Ιεχωβά* κα κερέλ-λες ζουρανό. Ντα άμα κερντάς αμαρτίες, κα συγχωρίντιβελ.
16 Οτθάρ, τι μουτθαβέν τουμαρέ αμαρτίες ο εκ κο γιαβέρ ντα τι προσευχίντιβεν ο εκ ι γιαβερέσκε για τι αβέν λατσσές. Η προσευχή* ι δίκαιε τζενέσκι τθερέλα ζορ ντα μπορίνελα τι βοηθίνελ μπαγιά ι γιαβερέν. 17 Ο Ηλίας ισινέ τζενό σο νιωθίνελας σαρ αμέν. Όμως, κάνα κερντάς προσευχή σαρέ πι γκίσαρ μα τι ντελ μπρισίμ, να ντινάς μπρισίμ κο τθεμ τριν μπρεσά ντα σιοβ μασεκά. 18 Σοράν κερντάς προσευχή πάλι, ντα ντινάς μπρισίμ ντα η πφουβ νικαντάς καρπός.
19 Πφραλάλεν, άμα εκ τζενό τουμένταρ νασλό κατά αλήθεια ντα εκ γιαβέρ κα ανέλ-λες παλάλ, 20 τι τζανέν ότι κον κα ανέλ παλάλ εκχέ αμαρτωλέ τζενές κατά λάθος ντρομ σο λιντάς, κα σώνελ-λες* κατά μεριπέ ντα κα βοηθίνελ τι συγχωρίντιβεν λέσκε αμαρτίες σο ισί μπουτ.