Ο Πρώτος Γράμμας σο Γραφιντάς ο Ιωάννης
2 Μο τσσαβορέ, γραφίναβα-λεν τουμένγκε ανταλά για μα τι αμαρτίνεν. Όμως, άμα εκ τζενό κα αμαρτίνελ, τθεράσα εκχέ βοηθός* σο ισί γιεκ ι Νταντέσαρ, ι Ιησού Χριστός, σο ισί δίκαιος. 2 Ντα βοβ ισί εκ θυσία αμαρέ αμαρτιένγκε σο κερέλα-αμέν τι αβάς πάλι αμαλά* ι Ντεβλέσαρ. Νανέ όμως σάντε αμαρέ αμαρτιένγκε αλλά σαρέ ι ντουνιάσκε αμαρτιένγκε. 3 Ανταλέσταρ αγαβάσα ότι τζανάσα-λες: άμα κεράσα λέσκε εντολές. 4 Οντουβά σο βακερέλα: «Τζανάβα-λες», αλλά να κερέλα λέσκε εντολές, ισί ψεύτης ντα η αλήθεια νανέ αντρέ λέσκε γκίστε. 5 Όμως, οντουβά σο κερέλα ο λάφι ι Ντεβλέσκο σικαβέλα ότι μανγκέλα μπαγιά ι Ντεβλές. Ανταλέσταρ τζανάσα ότι ισινάμ ενωμέ λέσαρ. 6 Οντουβά σο βακερέλα ότι ατσσόλα ενωμέ λέσαρ ισί βοβ-ντα υποχρεωμέ τι πφιρέλ ντιπ αντικάς σαρ πφιρντάς βοβ.
7 Πφραλάλεν, να γραφίναβα τουμένγκε εκ νεβί εντολή, αλλά εκ πουρανί σο τθερένας-λα κατά αρχή. Ανταγιά πουρανί εντολή ισί ο λάφι σο ασουντέν. 8 Όμως, γραφίναβα τουμένγκε εκ νεβί εντολή, σο κερντάς-λα βοβ ντα κερένα-λα τουμέν-ντα, σόσκε ο καρανίκι νασέλα ντα ο αληθινός φως λέλα-πες.
9 Οντουβά σο βακερέλα ότι ισί κο φως αλλά μισίνελα πι πφραλές ισί ατζέ κο καρανίκι. 10 Οντουβά σο μανγκέλα πι πφραλές ατσσόλα κο φως, ντα τίποτα να κα κερέλ-λες τι περέλ κι αμαρτία.* 11 Αλλά οντουβά σο μισίνελα πι πφραλές ισί κο καρανίκι ντα πφιρέλα κο καρανίκι, ντα να τζανέλα κατέ τζάλα, σόσκε ο καρανίκι κοριαρντάς-λες.
12 Μο τσσαβορέ, γραφίναβα τουμένγκε σόσκε τουμαρέ αμαρτίες συγχωρισάλε χάρη λέσκε ναβέσταρ. 13 Νταντάλεν, γραφίναβα τουμένγκε σόσκε τζανένα οντουλές σο υπαρχίντιβελα κατά αρχή. Μουρσάλεν σο ισινέν τερνέ, γραφίναβα τουμένγκε σόσκε νικιντέν ι Μπενγκές.* Μο τσσαβορέ, γραφίναβα τουμένγκε σόσκε τζανένα ι Νταντές. 14 Νταντάλεν, γραφίναβα τουμένγκε σόσκε τζανένα οντουλές σο υπαρχίντιβελα κατά αρχή. Μουρσάλεν σο ισινέν τερνέ, γραφίναβα τουμένγκε σόσκε ισινέν ζουρανέ ντα ο λάφι ι Ντεβλέσκο ατσσόλα τουμέντε ντα νικιντέν ι Μπενγκές.*
15 Μα μανγκέν ούτε ι ντουνιάς ούτε ο πράγματα σο ισί αντρέ κο ντουνιάς. Άμα εκ τζενό μανγκέλα ι ντουνιάς, να μανγκέλα ι Νταντές. 16 Επειδή σο-ντα ισί κο ντουνιάς, οντουβά σο μανγκέλα ο γκι ντα οντουβά σο μανγκένα ο γιακχά ντα ο τζενέ σο ισαρένα-πες ι πραγματένγκε σο τθερένα,* να αβένα κατά Ντατ αλλά κατά ντουνιάς. 17 Ο ντουνιάς ντα ο πράγματα σο μανγκέλα κα χασάρντιβεν, αλλά κον κερέλα οντουβά σο μανγκέλα ο Ντεβέλ κα τζουβντιόλ για πάντα.
18 Μο τσσαβορέ, ανταβά ισί ο τελευταίος σαάτι. Σαρ ασουντέν, αβέλα ο αντίχριστος,* ντα ακανά σικάντιλε μπουτ αντίχριστοι.* Ανταλέσταρ αγαβάσα ότι ισί ο τελευταίος σαάτι. 19 Βον ισινέ αμέντζαρ, αλλά να ισινέ σαρ αμέντε,* σόσκε άμα ισινέ σαρ αμέντε, κα ατσσόνας αμέντζαρ. Αλλά νασλέ για τι σικάντιβελ ότι νανέ σαρέ σαρ αμέντε. 20 Τουμέν τραμπίντιλεν κατά άγιος Ντεβέλ ντα σαρέ τουμέν τζανένα ι αλήθεια. 21 Γραφίναβα τουμένγκε, όχι επειδή να τζανένα ι αλήθεια, αλλά επειδή τζανένα-λα ντα επειδή καέκ ψέμας να αβέλα κατά αλήθεια.
22 Κον ισί ο ψεύτης; Νανέ οντουβά σο βακερέλα ότι ο Ιησούς νανέ ο Χριστός; Ο αντίχριστος* ισί οντουβά σο να πακιάλα κο Ντατ ντα κο Τσσαβό. 23 Κον να πακιάλα κο Τσσαβό να τθερέλα ούτε ι Νταντές. Οντουβά σο βακερέλα ότι πακιάλα κο Τσσαβό τθερέλα εμ ι Νταντές. 24 Οντουβά σο ασουντέν κατά αρχή πρέπει τι ατσσόλ αντρέ τουμέντε. Άμα οντουβά σο ασουντέν κατά αρχή ατσσόλα αντρέ τουμέντε, κα ατσσόν τουμέν-ντα ενωμέ εμ ι Τσσαβέσαρ εμ ι Νταντέσαρ. 25 Ντα ανταβά ισί σο ντινάς πο λάφι τι ντελ-αμέν, ζωή για πάντα.
26 Γραφίναβα τουμένγκε ανταλά πράγματα για τι αρακχαβέν-τουμέν οντουλένταρ σο μανγκένα τι χουχαβέν-τουμέν. 27 Αλλά τουμέν τραμπίντιλεν κατά Ντεβέλ λέσκε άγιε πνευμάσαρ, ντα ανταβά πνεύμας ατσσόλα τουμέντε, οτθάρ να τθερένα ανάγκη καεκχές τι σικλιαρέλ-τουμέν. Αλλά ανταβά πνεύμας σο ισί λέσταρ σικλιαρέλα-τουμέν σαρέ ο πράγματα ντα ισί μπαγιά, νανέ ψέμας. Οτθάρ, ατσσόν ενωμέ λέσαρ αντικάς σαρ σικλιαρντάς-τουμέν ανταβά πνεύμας. 28 Οτθάρ ακανά, μο τσσαβορέ, τι ατσσόν ενωμέ λέσαρ, ντα αντικάς κάνα κα σικάντιβελ βοβ τι κεράς λάφι μπίνταρανες ντα μα τι γκεραβάς-αμέν λέσταρ λατζάσαρ κάνα κα βουρτίνελ. 29 Άμα τζανένα ότι ισί δίκαιος, τζανένα-ντα ότι κον κερέλα δίκαια πράγματα μπιάντιλο λέσταρ.