Ο Τρίτος Γράμμας σο Γραφιντάς ο Ιωάννης
1 Με ο πρεσβύτερος* γραφίναβα κο Γάιος σο μανγκάβα-λες μπαγιά.
2 Πφραλ, προσευχίντιβαβα τι τζαν λατσσές σαρέ ο πράγματα τι ζωγιάτε σαρ τζάνα λατσσές ακανά,* ντα τι τθερές λατσσί υγεία. 3 Λιντόμ μπαρί χαρά κάνα αβιλέ πφραλά ντα βακερντέ μάνγκε ότι ατσσικιαρέσα ι αλήθεια ντα συνεχίνεσα τι πφιρές κι αλήθεια. 4 Τίποτα να ντέλα-μαν πο μπαρί χαρά* ανταλέσταρ: τι ασουνάβ ότι μο τσσαβέ πφιρένα κι αλήθεια.
5 Πφραλ, σικαβέσα ότι ισινάν αφοσιωμέ κο Ντεβέλ ανταλέντζαρ σο κερέσα ι πφραλένγκε, παρόλο σο να τζανέσα-λεν. 6 Βον βακερντέ ανγκλάλ κο πφραλά κι κχανγκιρί ότι τθερέσα αγάπη. Κάνα βον κα νασέν, κερ ο πο λατσσό για τι βοηθίνες-λεν εκχέ τροπόσαρ σο κερέλα ο γκι ι Ντεβλέσκο. 7 Χάρη κο ναβ κι Ντεβλέσκο γκιλέ διάφορε τθεμέντε, χωρίς τι λεν τίποτα κατά τζενέ σο ισί γιαβερέ τθεμένταρ. 8 Οτθάρ, αμέν ισινάμ υποχρεωμέ τι πουτράς αμαρό κχερ* ασακέ τζενένγκε για τι υποστηρίνας γιεκ λέντζαρ ι αλήθεια.
9 Γραφιντόμ εκ γράμμας κι κχανγκιρί, αλλά ο Διοτρεφής, σο μανγκέλα τι αβέλ ο πρώτος σαριλένταρ, να σεβάνελα τίποτα οντουλένταρ σο βακερντάμ. 10 Οτθάρ, άμα κα αβάβ, κα νταβ-τουμέν τι αγαβέν ντιπ λατσσές ότι οντουλά σο κερέλα ισί μπέτι πράγματα, επειδή πφιραβέλα γκεραλέ* λάφια αμένγκε. Ντα να κερέλα σάντε ανταβά, αλλά να μανγκέλα-ντα τι δεχτίνελ λατσσιμάσαρ ι πφραλέν ντα τι σεβάνελ-λεν. Ντα οντουλέν σο μανγκένα τι δεχτίνεν-λεν λατσσιμάσαρ, προσπαθίνελα τι τσσιναβέλ-λεν ντα τι νασκιαρέλ-λεν κατά κχανγκιρί.
11 Πφραλ, μα τι μοιάζες οντουλέντε σο κερένα ο γκεραλιπέ, αλλά τι μοιάζες οντουλέντε σο κερένα ο λατσσιπέ. Οντουβά σο κερέλα ο λατσσιπέ αβέλα κατά Ντεβέλ. Οντουβά σο κερέλα ο γκεραλιπέ να ντικχλάς ι Ντεβλές. 12 Σαρέ βακερένα ότι ο Δημήτριος ισί λατσσό πφραλ ντα ανταβά σικάντιβελα επειδή πφιρέλα κι αλήθεια. Αμέν-ντα βακεράσα ότι ισί λατσσό πφραλ, ντα τζανέσα ότι ανταβά σο βακεράσα ισί μπαγιά.
13 Τθεράβας μπουτ τι βακεράβ τούκε αλλά να μανγκάβα τι γραφίναβ-λεν τούκε εκχέ γραμμάστε. 14 Πακιάβα όμως ότι κα ντικχάβ-τουτ ατζεχάνικ ντα κα κεράς λάφι μούι μουέσαρ.
Ο Ντεβέλ τι ντελ-τουτ ειρήνη.
Κερένα τούκε σελιάμι αμαρέ αμαλά.* Κερ σελιάμι αμαρέ αμαλέντε κο κάθε εκ ξεχωριστά.