Ο Ευαγγέλιος σο Γραφιντάς ο Μάρκος
5 Ντα ερεσλέ κι γιαβέρ μπάντα κι ντεριαβάκι, κο τθανά σο ισινέ ο Γερασηνοί. 2 Σο νικίστιλο ο Ιησούς κατά βάρκα, ντικχλάς εκχέ δαιμονισμέ τζενές σο αβέλας κατά μεζάρια.* 3 Βοβ μπεσέλας κο μεζάρια, ντα μέχρι αζομάν καέκ ναστί πφάντελας-λες ούτε τζαντζιριάσαρ.* 4 Πφαντέας-λες μπουτ φαρ τζαντζιρίντζαρ κο πιντρέ ντα κο βαστά, αλλά βοβ πφανγκέλας-λεν, ντα καέκ να τθερέλας ι ζορ τι κερέλ-λες κουμάντος. 5 Ντα εμ ντισάρα εμ ιράτ ισινέ κο μεζάρια ντα κο βεσά, ντέλας βίκος ντα τσσινέλας-πες μπαρέντζαρ. 6 Αλλά σο ντικχλάς ι Ιησούς ντουράλ, τθαβντισάλο ντα πελό κοτσίντζαρ ανγκλά-λέστε. 7 Σοράν βακερντάς μπουτ μπαρέ βικόσαρ: «Ιησού, τούι ισινάν Τσσαβό ι Ντεβλέσκο σο Ισί Πο Οπρέ Σαριλένταρ. Σο μπουτί τθεράβα με τούσαρ; Ντάβα-τουτ σοβέλ κο Ντεβέλ μα τι τιμωρίνες-μαν». 8 Σόσκε ο Ιησούς βακερέλας λέσκε: «Νίκιουβ κατά τζενό, δαίμονα». 9 Αλλά ο Ιησούς πουτσλάς-λες: «Καβά ισί το ναβ;» Ντα βοβ βακερντάς: «Μο ναβ ισί Λεγεώνα,* σόσκε ισινάμ μπουτ». 10 Ντα μολίνελας ι Ιησούς μα τι νασκιαρέλ ι δαιμονέν αβρί κατά τθεμ.
11 Οτθέ πασέ κο βες ισινέ μπουτ γουρούνια σο χάνας. 12 Οτθάρ, ο δαίμονες μολιντέ-λες ακαλέ λαφίντζαρ: «Μπούτσσαβ-αμέν κο γουρούνια για τι τσσουβάς-αμέν αντρέ λέντε». 13 Ντα μουκχλάς-λεν τι τζαν. Αζομάν ο δαίμονες νικίστιλε κατά τζενό ντα τσσουντέ-πες κο γουρούνια. Ντα ο γουρούνια, σο ισινέ πασέ ντούι χιλιάδες, γκιλέ ούρια κο γκρεμός, πελέ κι ντεριάβ ντα τασάντιλε. 14 Ο τσομπάνια νασλέ ντα βακερντέ-λες κι πόλη ντα κο τθανά ντονταλάι, ντα ο τζενέ αβιλέ τι ντικχέν σο αβιλόας-πες. 15 Αβιλέ κο Ιησούς ντα ντικχλέ ι δαιμονισμέ τζενές, οντουλές σο ανγκλέ τθερέλας ι λεγεώνα,* τι μπεσέλ ιριαντό ντα τι αβέλ λατσσές κι γκοντί, ντα ασταρντάς-λεν νταρ. 16 Ο τζενέ σο ντικχλέας-λεν σαρέ ανταλά βακερντέ λένγκε σο αβιλόας-πες κο δαιμονισμέ τζενό ντα κο γουρούνια. 17 Ντα μολίνενας ι Ιησούς τι νασέλ λένγκε τθεμέσταρ.
18 Σαρ τσσουβέλας-πες ο Ιησούς κι βάρκα, ο τζενό σο ανγκλέ ισινέ δαιμονισμέ μολίνελας-λες τι τζαλ παλά-λέστε. 19 Αλλά βοβ να μουκχλάς-λες ντα βακερντάς λέσκε: «Τζα τούκε κχερέ, τι τζενέντε, ντα πούταρ λένγκε σαρέ οντουλένγκε σο κερντάς τούκε ο Ιεχωβά* ντα σαρ τζιτζισάλο* τούκε». 20 Ο τζενό νασλό ντα βακερέλας κι Δεκάπολη* σαρέ οντουλά σο κερντάς λέσκε ο Ιησούς. Ντα σαρέ σαστίνενας.
21 Κάνα ο Ιησούς νακχλάς πάλι ι βαρκάσαρ κι γιαβέρ μπάντα κι ντεριαβάκι, γκιντισάλε πασέ λέστε μπουτ τζενέ, ντα βοβ ισινέ πασέ κι ντεριάβ. 22 Αζομάν αβιλό εκ τανό κατά σορέ ι συναγωγιάκε σο βακέρντιβελας Ιάειρος, ντα κάνα ντικχλάς-λες, πελό λέσκε πιντρέντε. 23 Ντα μολιντάς-λες μπουτ φαρ ακαλέ λαφίντζαρ: «Μι τσσαγιορί ισί μπουτ νασφαλί.* Μολίναβα-τουτ, έλα ντα τσσουβ το βαστά οπρά-λάτε για τι αβέλ λατσσές ντα τι τζουβντιόλ». 24 Αζομάν ο Ιησούς γκιλό γιεκ λέσαρ, ντα ο μπουτ τζενέ σο γκιλέ παλά-λέστε ισινέ σαρέ οπρά-λέστε.
25 Ισινέ εκ τζουβέλ-ντα σο χασαρέλας ρατ 12 μπρεσά. 26 Βόι τσσιντιντάας μπουτ μπουτέ γιατρόνταρ ντα χαλαντάας σαρέ πο λοβέ, αλλά αντίς τι αβέλ λατσσές, νασφάλιλιας πο μπουτ. 27 Κάνα ασουντάς ι Ιησούσκε, αβιλί παλά-λέσταρ αντρέ κο μπουτ τζενέ ντα ασταρντάς λέσκε σέα, 28 σόσκε βακερέλας: «Σάντε λέσκε σέα τι ασταράβ, κα αβάβ λατσσές». 29 Ντα οντιά στιγμή τσσιναντάς τι χασαρέλ ρατ ντα αγαντάς ότι αβιλίας λατσσές ανταλέ μπουτ μπέτι νασφαλιμάσταρ.
30 Ο Ιησούς μπουτ σουγκό αγαντάς ότι νικίστιλιας ζορ αντρά-λέσταρ. Οτθάρ, μπολντιντάς-πες κάρινγκ κο τζενέ ντα πουτσλάς: «Κον ασταρντάς μο σέα;» 31 Αλλά λέσκε μαθητές βακερντέ λέσκε: «Ντικχέσα ότι αζόμ τζενέ ισί οπρά-τούτε, ντα τούι πουτσέσα: “Κον ασταρντάς-μαν;”» 32 Αλλά βοβ ντικχέλας ντονταλάι για τι αρακχέλ οντουλά σο κερντάας-λες ανταβά. 33 Αζομάν η τζουβέλ σο αγαντάας ότι αβιλίας λατσσές, γκιλί νταριάσαρ ντα ιζραϊμάσαρ ντα πελί λέσκε πιντρέντε ντα βακερντάς λέσκε σαρί ι αλήθεια. 34 Βοβ βακερντάς λάκε: «Μι τσσάι, τι πίστη κερντάς-τουτ λατσσές. Τζα τούκε λατσσιμάσαρ, ντα μα τι τθερές ατζέκ φαρ ανταβά μπουτ μπέτι νασφαλιπέ».
35 Καζόμ κερέλας λάφι ατζέκ, αβιλέ τζενέ κατά κχερ ι Ιαειρόσκο ντα βακερντέ: «Τι τσσάι μουλί! Σόσκε ενοχλίνεσα ι Δασκαλός;» 36 Αλλά ο Ιησούς ασουντάς λένγκε λάφια ντα βακερντάς κο Ιάειρος: «Μα ντάρα, σάντε σίκαβ πίστη». 37 Ντα να μουκχλάς καεκχές τι τζαλ παλά-λέστε, αλλά σάντε ι Πετρός, ι Ιακωβός ντα ι Ιωαννής ι Ιακωβόσκε πφραλές.
38 Κάνα αβιλέ κο κχερ κι Ιαειρόσκο, ο Ιησούς ντικχλάς ι βαβούρα ντα τζενέν τι ροβέν ντα τι ντεν βίκος ζουρανές. 39 Κάνα ντινάς αντρέ, βακερντάς λένγκε: «Σόσκε ροβένα ντα ανένα αζόμ βαβούρα; Η τσσάι να μουλί αλλά σοβέλα». 40 Ντα βον ασάνας πουμένγκε λέσαρ. Όμως, βοβ νικαντάς-λεν σαριλέν αβρί, λιντάς ι νταντές ντα ι νταγιά, ντα οντουλέν σο ισινέ λέσαρ, ντα γκιλό οτθέ σο ισινέ η τσσάι. 41 Σοράν, ασταρντάς ι τσσαγιάκο βας ντα βακερντάς λάκε: «Ταλιθά κούμι», σο μανγκέλα τι βακερέλ: «Χουρντίε, βακεράβα τούκε, ίστι!» 42 Σο βακερντάς-λες ανταβά, η τσσάι ιστίντιλι ντα πφιρέλας. (Ισινέ 12 μπρεσένγκι.) Οντιά στιγμή βον πφερντιλέ αζόμ μπαρί χαρά σο να βακέρντιβελας λαφίντζαρ. 43 Αλλά ντινάς-λεν εντολή παλάλ γιαβερέστε μα τι λελ-λες αμπέρι καέκ, ντα βακερντάς τι ντεν-λα τι χαλ.