Ο Πρώτος Γράμμας σο Γραφιντάς ο Πέτρος
4 Αφού ο Χριστός τσσιντιντάς μπουτ κάνα ισινέ τζενό, τουμέν-ντα τι σκεφτίνεν* σαρ ο Χριστός, σόσκε οντουβά τζενό σο τσσιντιντάς μπουτ μουκχλάς παλά-πέστε ο αμαρτίες 2 για τι κερέλ σαρέ πι ζωγιάτε οντουβά σο μανγκέλα ο Ντεβέλ ντα όχι οντουλά σο μανγκένα ο τζενέ. 3 Ανγκλέ για μπουτ βακίτι κερένας οντουβά σο μανγκένας ο τζενέ ι ντουνιάσκε, κάνα κερένας μπίλατζανε πράγματα* ντα μπέτι πράγματα σο μανγκένας μπουτ, κάνα πίνας μπερεκέτι, γλεντίνενας χωρίς όρια, κερένας παρέες για τι ματιόν* ντα ντένας λατρεία κο είδωλα, σο ανταβά ισί λάθος. 4 Βον σαστίνενα τουμέντζαρ σο τσσιναντέν τι κερέν ο μπέτι πράγματα σο κερένα βον, οτθάρ-ντα βακερένα μπέτι λάφια τουμένγκε. 5 Όμως, ανταλά τζενέ κα ντεν λογαριασμός οντουλέστε σο ισί έτοιμος τι κρίνελ ι τζουβντέν ντα ι μουλέν. 6 Άκ’ σόσκε μουτθάντιλε ο λατσσέ αμπέρια κο μουλέ-ντα* για τι αβέν πνευματικά τζουβντέ κο γιακχά κι Ντεβλέσκε,* παρόλο σο κρίντιβενα οντουλέσταρ σο ντικχίντιβελα αβριάλ σαρ κρίντιβενα σαρέ ο τζενέ.
7 Όμως, ο τέλος σαρέ ι πραγματένγκο ισί πασέ. Οτθάρ, τι αβέν γκοντιαβέρ ντα τι αβέν πάντα έτοιμοι* τι κερέν προσευχή. 8 Ο πο σημαντικός σαριλένταρ ισί τι μανγκέν μπουτ ο εκ ι γιαβερές, επειδή η αγάπη ιτσσαρέλα μπουτ αμαρτίες. 9 Τι πουτρέν τουμαρό κχερ* ο εκ ι γιαβερέσκε χωρίς τι γκρινιάνεν. 10 Ο Ντεβέλ ντινάς κο κάθε εκ τουμένταρ εκ ικανότητα,* οτθάρ τι χρησιμοποιήνεν-λα για τι υπηρετίνεν ο εκ ι γιαβερές σαρ λατσσέ υπηρέτες σο βοηθίνενα ι γιαβερέν τι λεν ο μπαρό λατσσιπέ ι Ντεβλέσκο* σο σικάντιβελα μπουτέ τροπόντζαρ. 11 Άμα εκ τζενό κερέλα λάφι, τι κερέλ-λες ανταβά για τι σικαβέλ ότι ο λάφια σο βακερέλα ισί κατά Ντεβέλ. Άμα εκ τζενό υπηρετίνελα, τι κερέλ-λες ανταβά αντράλ κατά ζορ σο ντέλα ο Ντεβέλ. Ντα αντικάς σαρέ κο πράγματα τι δοξάντιβελ ο Ντεβέλ αντράλ κατά Ιησούς Χριστός. Λέσκι ισί η δόξα ντα η ζορ για πάντα. Αμήν.
12 Πφραλάλεν, μα σαστίνεν κάνα νακχένα μπαρέ δοκιμασίες,* σαρ τι αβέλας τουμένγκε κάτι περίεργος. 13 Οκιά μπάνταρ, αφού τσσίντενα τουμέν-ντα οντουλά σο τσσιντιντάς ο Χριστός, πρέπει τι συνεχίνεν τι αβέν χαρούμενοι. Αντικάς, κάνα κα σικάντιβελ λέσκι δόξα, κα χαιρίνεν ντα κα πουτάρντιβελ τουμαρό γκι. 14 Άμα πρασάνα-τουμέν* ιτιρί κατά ναβ ι Χριστόσκο, ισινέν ευτυχισμέ, σόσκε ανταβά σικαβέλα ότι τθερένα οπρά-τουμέντε ο δοξασμέ άγιος πνεύμας ι Ντεβλέσκο.
15 Όμως, να μανγκάβα καέκ τουμένταρ τι τσσίντελ μπουτ επειδή αβιλό τζενό σο μουνταρέλα ή τσορέλα ή κερέλα γκεραλέ* πράγματα ή ανακατούντιβελα πραγματέντε σο νανέ λέσκι μπουτί. 16 Όμως, άμα εκ τζενό τσσίντελα μπουτ επειδή ισί Χριστιανός, μα τι λατζάλ, αλλά τι δοξάνελ ι Ντεβλές καζόμ τθερέλα οπρά-πέστε ανταβά ναβ. 17 Ακανά ισί ο βακίτι για τι αρχίνελ τι κρίντιβελ ο λαός* ι Ντεβλέσκο. Άρα, άμα αρχίνελα πρώτα αμένταρ, σο κα αβέλ-πες οντουλέντζαρ σο να ντένα καν κο λατσσέ αμπέρια κι Ντεβλέσκε; 18 «Άμα εκ δίκαιος τζενό πρέπει τι κερέλ μπαρί προσπάθεια για τι μπορίνελ τι σώνελ-λες ο Ντεβέλ, σο κα αβέλ-πες οντουλέσαρ σο να σεβάνελα ι Ντεβλές ντα οντουλέσαρ σο ισί αμαρτωλός;» 19 Οτθάρ, ο τζενέ σο τσσίντενα μπουτ επειδή κερένα οντουβά σο μανγκέλα ο Ντεβέλ, τι συνεχίνεν τι κερέν ο λατσσιπέ ντα τι μουκχέν πουμαρό νεαυτός* λέσκε βαστέντε. Βοβ ισί Οντουβά σο Κερντάς-αμέν ντα μπορίνασα τι ντας μπέσα λέστε.