Γράμμας σο Μπουτσσάντιλο κο Ρωμαίοι
7 Ακανά τουμένγκε κεράβα λάφι, πφραλάλεν, σο τζανένα ο Νόμος. Αβέλα-πες μα τι τζανέν ότι ο Νόμος κερέλα κουμάντος ι τζενές καζόμ τζουβντιόλα; 2 Για παράδειγμας, ο Νόμος βακερέλα ότι η παντριμέ τζουβέλ ισί ενωμέ πι ρομέσαρ καζόμ βοβ ισί τζουβντό. Αλλά άμα λάκο ρομ κα μερέλ, βόι να κα αβέλ τελάλ κατά νόμος πι ρομέσκο. 3 Οτθάρ, καζόμ τζουβντιόλα λάκο ρομ, άμα βόι κα αβέλ ρομνί γιαβερέ μουρσέσκι, κα κερέλ λουμνιπέ οπράλ πι μπιαβέστε. Αλλά άμα λάκο ρομ κα μερέλ, βόι να κα αβέλ τελάλ κατά νόμος λέσκο. Ντα αντικάς, άμα κα αβέλ ρομνί γιαβερέ μουρσέσκι, να κερέλα λουμνιπέ οπράλ πι μπιαβέστε.
4 Οτθάρ, πφραλάλεν, ο σώμας ι Χριστόσκο κερντάς τουμέν-ντα μα τι αβέν τελάλ κατά Νόμος ι Μωυσίσκο.* Ανταβά αβιλό-πες για τι αβέν εκχέ γιαβερέσκε, οντουλέσκε σο ιστίντιλο κατά μουλέ, ντα αντικάς τι κεράς πράγματα σο κερένα ο γκι ι Ντεβλέσκο. 5 Κάνα τζουβντιάας αντικάς σαρ μανγκέλας αμαρό σώμας, ο Νόμος σικαβέλας ντιπ λατσσές ότι ο γκεραλέ* πράγματα σο μανγκέλας αμαρό σώμας κερένας-αμέν τι αμαρτίνας* ντα ότι η αμαρτία γκερέλα-αμέν κο μεριπέ. 6 Αλλά ακανά να ισινάμ τελάλ κατά Νόμος, οτθάρ υπηρετίνασα ι Ντεβλές εκχέ νεβέ τροπόσαρ αντράλ κατά άγιος πνεύμας, ντα όχι ι πουρανέ τροπόσαρ αντράλ κατά γραμμέ Νόμος.
7 Σο κα βακεράς; Ισί ο Νόμος αμαρτία; Σίγουρα όχι! Να κα σικλιάβας σο ισί αμαρτία άμα να ισινέ ο Νόμος. Για παράδειγμας, να κα τζανάβας ότι ισί λάθος τι μανγκές τι τθερές ι γιαβερέσκε πράγματα άμα ο Νόμος να βακερέλας: «Μα μανγκ τι τθερές οντουβά σο ισί ι γιαβερέσκο». 8 Αλλά η αμαρτία, ιτιρί ανταλέ νομόσταρ, κερντάς-μαν τι μανγκάβ κάθε μπέτι πράγμας. Άμα να ισινέ ανταβά νόμος, η αμαρτία κα αβέλας μουλί. 9 Ισινόμας τζουβντό πριν τι ντιντιόλ ο Νόμος. Αλλά κάνα αβιλί η εντολή, η αμαρτία τζουβντιλί πάλι, με όμως «μουλόμ». 10 Ντα αγαντόμ ότι η εντολή σο ισινέ τι γκερέλ-μαν κι ζωή γκερντάς-μαν κο μεριπέ. 11 Η αμαρτία, ιτιρί κατά εντολή, χουχαντάς-μαν ντα μουνταρντάς-μαν. 12 Άρα, ο Νόμος ισί άγιος, ντα η εντολή ισί άγια, δίκαια ντα λατσσί.
13 Μανγκέλα τι βακερέλ ανταβά ότι ι Ντεβλέσκο Νόμος, σο ισί λατσσό, γκερντάς-μαν κο μεριπέ; Σίγουρα όχι! Η αμαρτία ισινέ οντιά σο γκερντάς-μαν κο μεριπέ. Ο Νόμος ισί λατσσό, αλλά κερντάς τι ντικχίντιβελ ντιπ λατσσές ότι η αμαρτία γκερέλας-μαν κο μεριπέ. Οτθάρ, η εντολή σικαντάς καζόμ γκεραλί ισί η αμαρτία. 14 Τζανάσα ότι ο Νόμος ισί κατά Ντεβέλ, αντράλ λέσκε πνευμάσταρ, αλλά με ισινόμ τζενό, μπικιντό σαρ δούλος κι αμαρτία. 15 Να αγαβάβα σο κεράβα, σόσκε να κεράβα οντουβά σο μανγκάβα αλλά οντουβά σο μισίναβα. 16 Με-ντα πακιάβα ότι ο Νόμος ισί λατσσό, όμως συνεχίναβα τι κεράβ ο πράγματα σο να μανγκάβα τι κεράβ. 17 Άρα, να ισινόμ με οντουβά σο κερέλα ανταλά πράγματα, αλλά η αμαρτία σο ισί αντρέ μάντε. 18 Τζανάβα ότι αντρέ μάντε, δηλαδή μι σωμάστε, νανέ τίποτα λατσσό. Μανγκάβα τι κεράβ ο λατσσιπέ, αλλά ναστί κεράβα-λες. 19 Να κεράβα ο λατσσιπέ σο μανγκάβα, αλλά ο γκεραλιπέ σο να μανγκάβα, ανταβά κεράβα. 20 Οτθάρ, άμα κεράβα οντουβά σο να μανγκάβα, να ισινόμ με οντουβά σο κερέλα-λες, αλλά η αμαρτία σο ισί αντρέ μάντε.
21 Όμως, ισί ακαβά νόμος σο κερέλα-μαν κουμάντος: Κάνα μανγκάβα τι κεράβ ο λατσσιπέ, ο γκεραλιπέ ισί αντρέ μάντε. 22 Ντιπ αντρέ μι γκίστε μανγκάβα μπαγιά ο νόμος ι Ντεβλέσκο. 23 Αλλά ντικχάβα μι σωμάστε εκ γιαβέρ νόμος σο κερέλα τζένγκι* κόντρα κο νόμος μι γκοντιάκο ντα γκερέλα-μαν πφαντό κο νόμος κι αμαρτιάκο σο ισί μι σωμάστε. 24 Σο μπεζαβά ισινόμ! Κον κα σώνελ-μαν κατά σώμας σο γκερέλα-μαν ανταλέ μεριμάστε; 25 Βακεράβα ευχαριστώ κο Ντεβέλ, σόσκε σώνελα-μαν αντράλ κατά Ιησούς Χριστός αμαρέ Κυριόσταρ! Αντικάς, μι γκοντιάσαρ ισινόμ δούλος κο νόμος κι Ντεβλέσκο, αλλά μι σωμάσαρ δούλος κο νόμος κι αμαρτιάκο.