Ο Γράμμας σο Μπουτσσάντιλο κο Εβραίοι
12 Ανταγιά μπαρί ομάδα τζενένγκι ισί σαρ εκ μπαρό σύννεφος ντονταλάι αμένταρ. Βον μουτθαβένα ο πράγματα* σο ντικχλέ ντα ασουντέ. Οτθάρ, τι φουρτίνας αμέν-ντα οπρ’ αμένταρ κάθε πράγμας σο ανέλα πφαριπέ ντα ι αμαρτία σο ατσσικιαρέλα-αμέν παλάλ. Ντα τι τθάβντας με υπομονή κο αγώνας σο τθεράσα ανγκλ’ αμέντε. 2 Τι κεράς-λες ανταβά καζόμ τθεράσα αμαρέ γιακχά κο Ιησούς, σο ισί Οντουβά σο Πουταρντάς ο Ντρομ για τι τθεράς πίστη ντα σο κερέλα-λα ντιπ ζουρανί.* Τθερέλας χαρά οντουλένγκε σο κα αβένας-πες, οτθάρ νταϊντιντάς οπράλ κο κας κι ντουκχένγκο,* να χάλας-λες ανάγκη η λατζ ντα μπεσλό δεξιά κατά θρόνος ι Ντεβλέσκο. 3 Οντουλέσκε, σκεφτίνεν λατσσές οντουλές σο νταϊντιντάς αζόμ λάφια σο βακερντέ αμαρτωλά τζενέ για τι τζαν λέσαρ κόντρα. Αντικάς, βον κερντέ ζιάνι πουμαρέ νεαυτόσκε. Βα, σκεφτίνεν-λες λατσσές για μα τι κχινιόν ούτε τι μουκχέν-τουμέν.*
4 Κο αγώνας σο κερένα τουμέν για τι τζαν κόντρα ανταλέ αμαρτιάτε, να γκιλέν ατζέκ αζόμ μπαρί κόντρα μέχρι κο σημείος τι μερέν. 5 Ντα μπισταρντέν ντιπ οντουβά σο βακερντάς τουμένγκε ο Ντεβέλ σαρ τσσαβέ: «Μο τσσαβό, μα πάκια ότι ο συμβουλές ι Ιεχωβάσκε* να τθερένα αξία ούτε τι χασαρές τι ζορ κάνα διορθώνελα-τουτ βοβ. 6 Επειδή οντουλέν σο μανγκέλα ο Ιεχωβά* διορθώνελα-λεν ντα τιμωρίνελα* οντουλέν σο δεχτίνελα-λεν σαρ τσσαβέ».
7 Κερέν υπομονή ντα ντικχέν-λες ανταβά σαρ εκ τρόπος τι διορθώντιβεν. Ο Ντεβέλ ντικχέλα-τουμέν σαρ πο τσσαβέ. Ισί καέκ τσσαβό σο να διορθώνελα-λες λέσκο ντατ; 8 Όμως, άμα ο Ντεβέλ να διορθώνελα-τουμέν σαρ διορθωντάς ι γιαβερέν, να ισινέν λέσκε τσσαβέ αλλά ισινέν τσσαβέ εκχέ γιαβερέσκε. 9 Αμαρέ νταντά σο ισί τζενέ, διορθώνενας-αμέν, ντα αμέν σεβάναας-λεν. Δεν πρέπει τι μανγκάς ατζέ πο μπουτ τι ντας καν αμαρέ Νταντέστε σο ισί κο ουρανός ντα αντικάς τι τζουβντιάς; 10 Βον διορθώνενας-αμέν χάνικ βακίτι αντικάς σαρ ντικχίντιβελας λατσσό λένγκε γιακχίντε, αλλά βοβ διορθώνελα-αμέν αμαρέ λατσσιμάσκε για τι αβάς άγιοι σαρ ισί βοβ. 11 Ισί μπαγιά ότι η διόρθωση, κάνα λάσα-λα, να ανέλα αμένγκε χαρά, αλλά ντουκχ.* Όμως άμα κα δεχτίνας-λα, σοράν κα τζουβντιάς εκ δίκαια ζωή ντα κα τθεράς ειρήνη.*
12 Οτθάρ, κερέν ζουρανέ ο βαστά ντα ο κοτσά σο να τθερένα ζορ, 13 ντα συνεχίνεν τι κερέν ίσια ντρομά τουμαρέ πιντρένγκε για μα τι αβέλ χειρότερα η μπανγκί τσανγκ, αλλά τι αβέλ λατσσές. 14 Τι κερέν σο νακχέλα τουμαρέ βαστένταρ για τι τθερέν ειρήνη σαρέ ι τζενέντζαρ ντα για τι τζουβντιόν εκ άγια ζωή, σόσκε καέκ τζενό να κα ντικχέλ ι Κυριός άμα να τζουβντιόλα αντικάς. 15 Τι προσοχίνεν μπουτ για τι σικάντιβελ σαριλένγκε ο μπαρό λατσσιπέ ι Ντεβλέσκο ντα για μα τι αβέλ καέκ τζενό σαρ η ρίζα εκχέ φυτόσκι σο τθερέλα δηλητήριος ντα αρχίνελα τι μπαριόλ. Ανταβά τζενό ανέλα προβλήματα ντα δηλητηριάνελα μπουτέ γιαβερέν. 16 Ντα τι τθερέν τουμαρί γκοντί για μα τι αβέλ καέκ τζενό τουμένταρ σο κερέλα λουμνιπέ* ή σο να εκτιμίνελα ο άγια πράγματα, σαρ ο Ησάφ, σο ντινάς ο δικαιώματα σο τθερέλας σαρ ο πρώτος τσσαβό για εκ τσαρό χαμπέ. 17 Επειδή τζανένα ότι σοράν, κάνα μανγκλάς τι λελ πι νταντέσκι ζαμ, να αξίνελας τι λελ-λα. Παρόλο σο προσπαθιντάς μπουτ τι αλλάνελ λέσκι γνώμη ροϊμάσαρ, ναστί αλλάνελας-λα.
18 Τουμέν να γκιλέν πασέ εκχέ βεσέστε σο μπορίνενα τι ντικχέν-λες* ντα σο πφαμπόλα γιακάσαρ,* σο οτθέ ισινέ εκ καλό σύννεφος, μπουτ καρανίκι, μπουτ ζουρανί μπαρμπάλ 19 ντα ισινέ ο ήχος σο νικαβέλα η σάλπιγγα ντα η φωνή σο κερέλας λάφι. Κάνα ο λαός ασουντάς ανταγιά φωνή, μολιντέ ι Μωυσής μα τι βακέρντιβελ λένγκε τίποτα γιαβέρ. 20 Κερντέ-λες ανταβά επειδή νταρένας μπουτ κατά εντολή σο βακερέλας: «Ατζέ-ντα άμα εκ ζώος κα ισταβέλ κο βες, πρέπει τι φουρτίνεν λέσκε μπαρά». 21 Ντα ο λαός νταρασάλο αζόμ μπουτ οντουλένταρ σο ντικχέλας σο ατζέ-ντα ο Μωυσής βακερντάς: «Νταράβα ντα ιζράβα». 22 Τουμέν όμως γκιλέν πασέ κο βες Σιών ντα κι πόλη κι τζουβντέ Ντεβλέσκι, κι Ιερουσαλήμ σο ισί κο ουρανός, ντα μπουτέ* αγγελόντε 23 σο γκιντισάλε γιεκ. Γκιλέν πασέ κι κχανγκιρί-ντα κι πρώτε τσσαβένγκι σο λένγκε ναβά γραφίντιλε κο ουρανός, ντα κο Ντεβέλ, σο ισί Οντουβά σο κρίνελα σαριλέν, ντα κι πνευματική ζωή κι δίκαιε τζενένγκι σο αβιλέ τέλειοι. 24 Γκιλέν πασέ κο Ιησούς-ντα, σο ισί οντουβά σο βοηθίνελα εκχέ νεβέ συμφωνιάτε, ντα κο ρατ σο βοβ τσσουντάς οπρ’ αμέντε. Ανταβά ρατ κερέλα λάφι πο λατσσέ τροπόσαρ κατά ρατ σο τθερέλας ο Άβελ.
25 Τθερέν τουμαρί γκοντί τι ασουνέν οντουλές* σο κερέλα λάφι κατά ουρανός. Κο πουρανέ μπρεσά ο λαός κι πφουβ να ασουντάς οντουλά σο βακερντάς ο Ντεβέλ,* οτθάρ τιμωρισάλο. Καζόμ πο μπουτ κα τιμωρίντιβας αμέν άμα να κα ασουνάς οντουλές σο κερέλα λάφι κατά ουρανός! 26 Οντουβά βακίτι λέσκι φωνή κουνιαντάς ι πφουβ, αλλά ακανά ντινάς πο λάφι: «Κα κουνιαβάβ ατζέκ εκ φαρ, όχι σάντε ι πφουβ, αλλά ο ουρανός-ντα». 27 Ο λάφια «ατζέκ εκ φαρ» σικαβένα ότι ο Ντεβέλ κα νασκιαρέλ ο πράγματα σο κουνιάντιβενα. Ανταλά ισί ο πράγματα σο να κερντάς-λεν ο Ντεβέλ. Ανταβά κα κερέλ-λες για τι ατσσόν ο πράγματα σο να κουνιάντιβενα. 28 Οτθάρ, αφού κα λας εκ Βασιλεία σο ναστί κουνιάντιβελα, τι συνεχίνας τι λας μπαρό λατσσιπέ κατά Ντεβέλ. Αντράλ ανταλέ μπαρέ λατσσιμάσταρ μπορίνασα τι ντας άγια υπηρεσία κο Ντεβέλ εκχέ τροπόσαρ σο κερέλα λέσκο γκι ντα σικαβέλα ότι νταράσα λέσταρ ντα σεβάνασα-λες. 29 Αμαρό Ντεβέλ ισί σαρ γιακ σο καταστραφίνελα.