Ο Ευαγγέλιος σο Γραφιντάς ο Ματθαίος
12 Οντουβά βακίτι, ο Ιησούς νακχλάς χωραφίνταρ σο τθερένας γκιβ. Ισινέ Σάββατος. Λέσκε μαθητές μποκχάλιλε, οτθάρ τσσιντέ γκιβ ντα χαλέ. 2 Κάνα ντικχλέ-λες ανταβά ο Φαρισαίοι, βακερντέ λέσκε: «Ντικχ! Ανταβά σο κερένα το μαθητές νανέ σωστός τι αβέλ-πες κο Σάββατος». 3 Βοβ βακερντάς λένγκε: «Να διαβαντέν σο κερντάς ο Δαβίδ κάνα βοβ ντα λέσκε μουρσά μποκχάλιλε; 4 Ότι ντινάς αντρέ κο κχερ κι Ντεβλέσκο ντα γιεκ λέντζαρ χαλάς ο μαντρέ σο ισινέ ανγκλάλ κο Ντεβέλ, παρόλο σο σάντε ο ιερείς ισινέ σωστός τι χαν-λεν; 5 Ντα να διαβαντέν κο Νόμος ότι ο ιερείς κερένα μπουτί Σάββατα κο ναός αλλά να αμαρτίνενα; 6 Όμως, βακεράβα τουμένγκε ότι ατθέ ισί εκ τζενό πο μπαρό κατά ναός. 7 Άμα αγαντένας σο μανγκένα τι βακερέν ο λάφια: “Μανγκάβα τι τζιτζίνεν* ο εκ ι γιαβερέσκε αντίς τι κερέν θυσίες”, να κα κρίνενας οντουλέν σο να αμαρτιντέ. 8 Βακεράβα-λες ανταβά σόσκε ο Τσσαβό ι τζενέσκο ισί Κύριος ι Σαββατόσκο».
9 Νασλό οντουλέ τθανέσταρ ντα σοράν γκιλό αντρέ κι συναγωγή. 10 Οτθέ ισινέ εκ τζενό σουκέ* μουσιάσαρ. Οτθάρ, πουτσλέ ι Ιησούς: «Ισί σωστός τι σαστιαρέλ* εκ τζενό Σάββατος;» Κερντέ-λες ανταβά για τι κατηγορίνεν-λες. 11 Βοβ βακερντάς λένγκε: «Κον τουμένταρ άμα τθερέλα εκχέ μπρακές ντα κα περέλ εκχέ γουρνάτε Σάββατος να κα ασταρέλ-λες ντα να κα νικαβέλ-λες οτθάρ; 12 Νανέ πο σημαντικός ο τζενό κατά μπρακό; Άρα, βα, ισί σωστός τι κερέλ εκ τζενό λατσσιπέ Σάββατος». 13 Ντα βακερντάς ι τζενέσκε: «Πούταρ τι μουσί». Βοβ πουταρντάς-λα, ντα λέσκι μουσί αβιλί λατσσές σαρ η γιαβέρ. 14 Αλλά ο Φαρισαίοι νικίστιλε αβρί ντα κερντέ-πες λάφι για τι ντικχέν σαρ τι μουνταρέν-λες. 15 Ο Ιησούς όμως λιντάς-λες αμπέρι ντα νασλό οτθάρ. Γκιλέ παλά-λέστε μπουτ τζενέ ντα κερντάς λατσσές σαριλέν, 16 αλλά ντινάς-λεν εντολή μα τι μουτθαβέν κον ισί 17 για τι νικιόλ μπαγιά οντουβά σο βακέρντιλοας αντράλ κατά προφήτης Ησαΐας:
18 «Ντικχέν! Μο υπηρέτης σο τραμπιντόμ, μανγκάβα-λες μπουτ, ντα κερέλα μο γκι! Κα τσσουβάβ μο πνεύμας οπρά-λέστε, ντα βοβ κα σικαβέλ κο τθεμά σο ισί μπαγιά δικαιοσύνη. 19 Να κα χαλ-πες λαφίντζαρ, να κα ντελ βίκος ζουρανές ντα καέκ να κα ασουνέλ λέσκι φωνή κο μπαρέ ντρομά. 20 Να κα πφανγκέλ ο μπανγκό καλάμι ντα να κα μουνταρέλ ο φιτίλι σο πφαμπόλα μπουτ χάνικ, μέχρι τι ανέλ δικαιοσύνη σαρό κο ντουνιάς. 21 Ντα λέστε κα ντεν μπέσα* τζενέ σαρέ κατά τθεμά».
22 Αζομάν αντέ λέσκε εκχέ δαιμονισμέ τζενές σο ισινέ εμ κορορό εμ λαλορό ντα κερντάς-λες λατσσές. Αντικάς, ο τζενό αρχιντάς τι κερέλ λάφι ντα τι ντικχέλ. 23 Ισινέ οτθέ μπουτ τζενέ ντα κάνα ντικχλέ-λες ανταβά, ατσσιλέ πουταρντέ μόσαρ ντα βακερντέ: «Μα τι ισί βοβ ο Τσσαβό ι Δαβιδίσκο;» 24 Σο ασουντέ-λες ανταβά ο Φαρισαίοι, βακερντέ: «Ανταλέ τζενές ντέλα-λες ι ζορ τι νικαβέλ ι δαιμονέν ο Μπενγκ,* ο αρχηγός ι δαιμονένγκο». 25 Ο Ιησούς τζανέλας σο τθερένας πουμαρέ γκοντιάτε, οτθάρ βακερντάς λένγκε: «Άμα ο τζενέ εκχέ τθεμέσκε τζάνα κόντρα ο εκ ι γιαβερέσαρ, ο τθεμ κα καταστραφίντιβελ. Ντα άμα ο τζενέ εκχέ πολιάκε ή εκχέ κχερέσκε τζάνα κόντρα ο εκ ι γιαβερέσαρ, η πόλη ή ο κχερ να κα ατσσόλ. 26 Αντικάς-ντα, άμα ο Μπενγκ νικαβέλα ι Μπενγκές, τζάλα κόντρα πέσαρ. Σαρ αβέλα-πες τι ατσσόλ λέσκι βασιλεία; 27 Ντα άμα με νικαβάβα ι δαιμονέν ι Μπενγκέσκε* ζοριάσαρ, τουμαρέ τσσαβέ κάσκε ζοριάσαρ νικαβένα-λεν; Άκ’ σόσκε βον κα σικαβέν ότι οντουλά σο βακερντέν ισί λάθος. 28 Αλλά άμα με νικαβάβα ι δαιμονέν ι Ντεβλέσκε πνευμάσαρ, η Βασιλεία ι Ντεβλέσκι μπαγιά αβιλί αλλά τουμέν ατζέ να αγαντέν-λες. 29 Ντα σαρ αβέλα-πες εκ τζενό τι τσσουβέλ-πες κο κχερ εκχέ ζουρανέ μουρσέσκο ντα τι λελ λέσκε πράγματα; Πρώτα κα πφάντελ ι μουρσές ντα σοράν κα τσορέλ λέσκο κχερ. 30 Κον νανέ μάντζαρ τζάλα μάντζαρ κόντρα ντα κον να γκίντελα μάντζαρ τρουγίνελα.
31 »Οτθάρ βακεράβα τουμένγκε: Σο-ντα αμαρτία κερένα ο τζενέ ή σο-ντα γκεραλό λάφι* βακερένα, κα συγχωρίντιβελ. Αλλά κον κα βακερέλ γκεραλέ λάφια σο τζάνα κόντρα κο πνεύμας κι Ντεβλέσκο, να κα συγχωρίντιβελ. 32 Για παράδειγμας, κον κα βακερέλ λάφι σο τζάλα κόντρα κο Τσσαβό κι τζενέσκο, κα συγχωρίντιβελ. Αλλά κον κα βακερέλ λάφι σο τζάλα κόντρα κο άγιος πνεύμας, να κα συγχωρίντιβελ ούτε ανταλέ ντουνιάστε* ούτε κο νεβό ντουνιάς σο κα αβέλ.
33 »Ή κα αβέλ λατσσό τουμαρό δέντρος ντα κα κερέλ λατσσό καρπός ή κα αβέλ κερνό ντα κα κερέλ κερνό καρπός, σόσκε ο δέντρος αγαντίντιβελα κατά καρπός σο κερέλα. 34 Σαρ αβέλα-πες τουμέν, σο ισινέν τσσαβέ οχιάκε, τι βακερέν λατσσέ πράγματα αφού ισινέν πφιρνέ;* Ο λάφια σο βακερέλα εκ τζενό σικαβένα καλέ πραγματέντζαρ ισί πφερντό λέσκο γκι. 35 Ο λατσσό τζενό νικαβέλα ο λατσσέ πράγματα σο τθερέλα πι γκίστε. Αλλά ο πφιρνό τζενό νικαβέλα ο πφιρνικανέ πράγματα σο τθερέλα πι γκίστε. 36 Βακεράβα τουμένγκε ότι κο Ντιβές σο κα Κρίνελ ο Ντεβέλ ι τζενέν, βον κα ντεν λογαριασμός καλέ-ντα λαφίσκε βακερντέ σο να κερντάς λατσσιπέ. 37 Άμα το λάφια ισί λατσσέ, ο Ντεβέλ κα βακερέλ ότι ισινάν δίκαιος, αλλά άμα νανέ λατσσέ, κα κρίνελ-τουτ».
38 Αζομάν μερικοί γραμματείς ντα Φαρισαίοι βακερντέ λέσκε: «Δάσκαλε, μανγκάσα τι ντικχάς εκ σημάδι τούταρ». 39 Βοβ βακερντάς λένγκε: «Ο τζενέ σο τζουβντιόνα ανταλέ βακιτίστε* ισί πφιρνέ ντα να ντένα καν* κο Ντεβέλ. Βον να τσσιναβένα τι μανγκέν τι ντικχέν εκ σημάδι, αλλά να κα ντικχέν καέκ σημάδι εκτός κατά σημάδι ι Ιωνάσκο ι προφητίσκο. 40 Σαρ ο Ιωνάς ισινέ κο περ κι μπαρέ ματσσέσκο τριν ντιβεσά,* αντικάς ο Τσσαβό ι τζενέσκο-ντα κα αβέλ αντρέ κι πφουβ τριν ντιβεσά.* 41 Κο Ντιβές σο κα Κρίνελ ο Ντεβέλ ι τζενέν, ο Νινευίτες κα ιστίν κατά μεριπέ γιεκ ι τζενέντζαρ σο τζουβντιόνα ανταλέ βακιτίστε* ντα κα σικαβέν καζόμ λάθος ισινέ ανταλά τζενέ, σόσκε ο Νινευίτες μετανιωσάλε κάνα ασουντέ ο λάφια ι Ιωνάσκε. Αλλά ατθέ ισί εκ τζενό πο μπαρό κατά Ιωνάς. 42 Κο Ντιβές σο κα Κρίνελ ο Ντεβέλ ι τζενέν, η βασίλισσα κατά νότος κα ιστίλ κατά μεριπέ γιεκ ι τζενέντζαρ σο τζουβντιόνα ανταλέ βακιτίστε* ντα κα σικαβέλ καζόμ λάθος ισινέ ανταλά τζενέ, σόσκε βόι αβιλί ντουράλ για τι ασουνέλ ο γκοντιαβέρ λάφια ι Σολομωντάσκε. Αλλά ατθέ ισί εκ τζενό πο μπαρό κατά Σολομώντας.
43 »Κάνα εκ δαίμονας νικιόλα εκχέ τζενέσταρ, νακχέλα αντράλ σουκέ τθανένταρ ντα ρόντελα εκ τθαν τι μπεσέλ, αλλά να αρακχέλα. 44 Οτθάρ βακερέλα: “Κα βουρτίναβ κο κχερ σο ισινόμας” ντα κάνα ερεσέλα οτθέ, αρακχέλα-λες τσουτσό αλλά σουλαντό ντα ζουζιμέ.* 45 Οτθάρ, τζάλα ντα λέλα εφτά γιαβερέ δαιμονέν σο ισί πο πφιρνέ λέσταρ, τσσουβένα-πες αντρέ ντα μπεσένα οτθέ ντα αντικάς αβένα-πες οντουλέ τζενέσκε πο μπέτι πράγματα οντουλένταρ σο αβένας-πες ανγκλέ. Ανταβά κα αβέλ-πες ι πφιρνέ τζενέντζαρ-ντα σο τζουβντιόνα ανταλέ βακιτίστε».*
46 Καζόμ βοβ κερέλας λάφι ατζέ κο τζενέ, λέσκι ντάι ντα λέσκε πφραλά μπεσένας αβρί ντα μανγκένας τι κερέν λέσαρ λάφι. 47 Ντα εκ τζενό βακερντάς λέσκε: «Ντικχ! Τι ντάι ντα το πφραλά μπεσένα αβρί ντα μανγκένα τι κερέν τούσαρ λάφι». 48 Ο Ιησούς βακερντάς λέσκε: «Κον ισί μι ντάι ντα κον ισί μο πφραλά;» 49 Σοράν, σικαντάς πι βαστέσαρ πι μαθητέν ντα βακερντάς: «Άκ’ μι ντάι ντα μο πφραλά! 50 Κον κερέλα ανταβά σο μανγκέλα μο Ντατ σο ισί κο ουρανός, βοβ ισί μο πφραλ ντα μι πφεν ντα μι ντάι».