Ο Γράμμας σο Μπουτσσάντιλο κο Γαλάτες
5 Ο Χριστός ελευθερωντάς-αμέν για τι τθεράς ασακί ελευθερία. Οτθάρ, ατσσόν σταθεροί ντα μα τι αβέν πάλι δούλοι.
2 Ασουνέν! Με, ο Παύλος, βακεράβα τουμένγκε ότι να κα ντικχέν καέκ λατσσιπέ οντουλένταρ σο κερντάς ο Χριστός άμα κα κερέν περιτομή. 3 Βακεράβα πάλι κάθε τζενέσκε σο κερέλα περιτομή ότι ισί υποχρεωμέ τι κερέλ σαρό ο Νόμος. 4 Ισινέν ντουρ κατά Χριστός, τουμέν σο προσπαθίνενα τι βακέρντιβεν δίκαιοι αντράλ κατά Νόμος. Τσσιντιντέν-τουμέν ντουρ λέσκε μπαρέ λατσσιμάσταρ. 5 Αμέν όμως μπεσάσα τι αβάς δίκαιοι κο γιακχά κι Ντεβλέσκε εκχέ τροπόσαρ σο αβέλα-πες σάντε αντράλ κατά άγιος πνεύμας ντα κατά πίστη σο τθεράσα. 6 Οντουλένγκε σο ισί ενωμέ ι Χριστόσαρ, ι Ιησούσαρ, να τθερέλα καέκ αξία άμα κερντέ ή να κερντέ περιτομή, αλλά άμα τθερένα πίστη σο σικάντιβελα αντράλ κατά αγάπη.
7 Τζάνας* λατσσές. Κον τσσιναντάς-τουμέν τι ντεν καν κι αλήθεια; 8 Οντουβά σο ντέλα-τουμέν βίκος να τσσιναντάς-τουμέν τι ντεν καν κι αλήθεια. 9 Χάνικ μαγιά κερέλα σαρό ο χουμέρ τι φουσκώνελ. 10 Ισινόμ σίγουρος ότι τουμέν σο ισινέν ενωμέ ι Κυριόσαρ κα τθερέν ι ίδια άποψη μάντζαρ. Αλλά οντουβά σο χουχαβέλα-τουμέν, κον-ντα τι ισί, κα λελ ι τιμωρία σο αξίνελα λέσκε. 11 Πφραλάλεν, άμα κα συνεχίναβας τι σικλιαράβ ι τζενέν τι κερέν περιτομή, να κα τζάνας μάντζαρ κόντρα. Ντα ο τζενέ να κα προσβαλίντιβενας* κάνα σικλιαράβα ι Ιησούσκε σο μουλό οπράλ κο κας κι ντουκχένγκο.* 12 Μακάρι οντουλά σο βακερένα τουμένγκε τι κερέν περιτομή τι κερέν πο μπαρό ζιάνι πουμαρέ νεαυτόσκε.*
13 Πφραλάλεν, ο Ντεβέλ ντινάς-τουμέν βίκος για τι αβέν ελεύθεροι. Μα χρησιμοποιήνεν ανταγιά ελευθερία για τι κερέν ο μπέτι πράγματα σο μανγκέλα ο σώμας, αλλά μουκχέν ι αγάπη τι κερέλ-τουμέν τι υπηρετίνεν σαρ δούλοι ο εκ ι γιαβερές. 14 Επειδή σαρό ο Νόμος βακέρντιβελα χάνικ λαφίντζαρ κι* εντολή ακαγιά: «Μανγκ ι γιαβερέν* σαρ μανγκέσα τουτ». 15 Άμα όμως πφανγκένα ο γκι ο εκ ι γιαβερέσκο ντα τσσουβένα-λεν ο εκ ι γιαβερέσαρ, ντικχέν μα τι καταστραφίνεν-ντα ο εκ ι γιαβερές.
16 Αλλά βακεράβα τουμένγκε: Τι πφιρέν αντικάς σαρ μανγκέλα ο πνεύμας ι Ντεβλέσκο ντα να κα κερέν ούτε εκ μπέτι πράγμας σο μανγκέλα ο σώμας. 17 Ο μπέτι πράγματα σο μανγκέλα ο σώμας τζάνα κόντρα κο πνεύμας κι Ντεβλέσκο, ντα ο πνεύμας ι Ντεβλέσκο τζάλα κόντρα κο μπέτι πράγματα σο μανγκέλα ο σώμας. Ο σώμας ντα ο πνεύμας τζάνα κόντρα ο εκ κο γιαβέρ, ντα αντικάς τουμέν να κερένα οντουλά σο μανγκένα τι κερέν. 18 Ντα άμα σικαβέλα τουμένγκε ο πνεύμας ι Ντεβλέσκο κάι τι τζαν, να ισινέν τελάλ κατά Νόμος.
19 Ο τζενέ σο κερένα οντουλά σο μανγκέλα ο σώμας κερένα ακαλά μπέτι πράγματα σο ντικχίντιβενα ντιπ λατσσές: κερένα λουμνιπέ,* μαγαριπέ ντα μπίλατζανε πράγματα,* 20 ντένα λατρεία κο είδωλα, κερένα μπενγκαλέ πράγματα,* ισί ντουσμάνια* ι γιαβερέντζαρ, χάνα-πουμέν, ζηλίνενα, χολιάνενα, να αρακχένα-λεν ο εκ ι γιαβερέσαρ, τθερένα διχόνοια, σικλιαρένα λάθος πράγματα, 21 τθερένα ζήλια πφερντί μίσος, ματιόνα, γλεντίνενα χωρίς όρια ντα κερένα γιαβερά-ντα ασακέ πράγματα. Βακεράβα τουμένγκε, σαρ βακερντόμ τουμένγκε πάλι, ότι οντουλά σο κερένα ασακέ πράγματα να κα νακχέν* κι Βασιλεία κι Ντεβλέσκι.
22 Οκιά μπάνταρ, ο τζενέ σο οδηγίντιβενα κατά Ντεβλέσκο πνεύμας* τθερένα αγάπη, χαρά, ειρήνη, υπομονή, λατσσιπέ, λατσσό γκι,* πίστη, 23 κοβλό γκι* ντα ατσσικιαρένα πουμαρό νεαυτός. Καέκ νόμος να τζάλα κόντρα ασακέ πραγματέντε. 24 Ντα οντουλά σο ισί ι Χριστόσκε, ι Ιησούσκε, ιμπλαντέ κο κας πουμαρό σώμας γιεκ ι μπέτι πραγματέντζαρ σο νιωθίνελα ντα μανγκέλα μπουτ τι κερέλ ανταβά σώμας.
25 Άμα τζουβντιάσα σαρ μανγκέλα ο πνεύμας ι Ντεβλέσκο, τι συνεχίνας τι πφιράς-ντα σωστά σαρ μανγκέλα ο πνεύμας ι Ντεβλέσκο. 26 Μα τι αβάς μπαρικανέ,* μα τι κεράς ο εκ ι γιαβερές τι μανγκέλ τι σικαβέλ ότι ισί ο πο λατσσό ντα μα τι τθεράς ο εκ ι γιαβερέσκε ζήλια πφερντί μίσος.