Ο Ευαγγέλιος σο Γραφιντάς ο Ιωάννης
13 Πο τζανγκλέ κατά Πάσχας, επειδή τζανέλας ότι αβιλόας λέσκο σαάτι τι μουκχέλ ανταλέ ντουνιάς ντα τι τζαλ κο Ντατ, ο Ιησούς μανγκλάς πι μαθητέν σο ισινέ κο ντουνιάς, μανγκλάς-λεν μέχρι κο τέλος. 2 Βον χάνας, ντα ο Μπενγκ μπίλιμα τσσουντάας κι Ιουδάσκο γκι, σο λέσκο ντατ ισινέ ο Σίμωνας, τι ντελ-λες λέσκε ντουσμανίνγκε* βαστέντε. 3 Ο Ιησούς τζανέλας ότι ο Ντατ ντινάας-λεν σαρέ λέσκε βαστέντε ντα ότι αβιλόας κατά Ντεβέλ ντα τζάλας κο Ντεβέλ, οτθάρ 4 ιστίντιλο κατά τραπέζι, τσσουντάς κι νάκρη πο αβραϊνέ σέα, λιντάς εκ πετσέτα ντα πφαντάς-λα ντονταλάι πι ντουμέσταρ. 5 Σοράν τσσουντάς πανί αντρέ εκχέ κοπανιάτε ντα τθοβέλας ο πιντρέ ι μαθητένγκε ντα κοσέλας-λεν ι πετσετάσαρ σο ισινέ πφαντί λέσκε ντουμέστε. 6 Κάνα αβιλό κο Σίμωνας Πέτρος, βοβ βακερντάς λέσκε: «Κύριε, τούι τθοβέσα μο πιντρέ;» 7 Ο Ιησούς βακερντάς λέσκε: «Ανταβά σο κεράβα με, τούι να αγαβέσα-λες ακανά, αλλά κα αγαβές-λες πο σοράν». 8 Ο Πέτρος βακερντάς λέσκε: «Να κα τθοβές ποτές μο πιντρέ». Ο Ιησούς βακερντάς λέσκε: «Άμα να τθοντόμ-τουτ, ναστί αβέσα μάντζαρ». 9 Ο Σίμωνας Πέτρος βακερντάς λέσκε: «Κύριε, μα τθοβ σάντε μο πιντρέ αλλά εμ μο βαστά εμ μο σορό». 10 Ο Ιησούς βακερντάς λέσκε: «Κον ισί τθοντό πρέπει τι τθοβέν σάντε λέσκε πιντρέ, αφού ισί ντιπ σαρό πάκι. Τουμέν-ντα ισινέν πάκι, αλλά όχι σαρέ». 11 Σόσκε τζανέλας οντουλές σο κα ντέλας-λες λέσκε ντουσμανίνγκε βαστέντε. Οτθάρ βακερντάς: «Να ισινέν σαρέ πάκι».
12 Κάνα τθοντάς λένγκε πιντρέ ντα ιριντάς πο αβραϊνέ σέα, μπεσλό πάλι κο τραπέζι* ντα βακερντάς λένγκε: «Αγαβένα σο κερντόμ τουμένγκε; 13 Τουμέν ντένα-μαν βίκος “Δάσκαλε” ντα “Κύριε”, ντα λατσσές βακερένα, σόσκε ισινόμ. 14 Άμα με, ο Κύριος ντα Δάσκαλος, τθοντόμ τουμαρέ πιντρέ, τουμέν-ντα τι τθοβέν* ο πιντρέ ο εκ ι γιαβερέσκε. 15 Σόσκε μουκχλόμ ο παράδειγμας τουμένγκε, ντα αντικάς σαρ κερντόμ με τουμένγκε τι κερέν τουμέν-ντα. 16 Μπαγιά, μπαγιά βακεράβα τουμένγκε: Ο δούλος νανέ πο μπαρό πι κυριόσταρ ούτε οντουβά σο μπουτσσάντιλο πο μπαρό οντουλέσταρ σο μπουτσσαντάς-λες. 17 Άμα τζανένα ανταλά πράγματα, ευτυχισμέ κα αβέν άμα κερένα-λεν. 18 Να βακεράβα σαρέ τουμένγκε. Τζανάβα οντουλέν σο τραμπιντόμ. Αλλά πρέπει τι νικιόν μπαγιά ο λάφια ι Γραφιάκε: “Οντουβά σο χάλας μαντρό μάντζαρ γκιλό μάντζαρ κόντρα”.* 19 Από ακανά βακεράβα-λες τουμένγκε, πριν τι αβέλ-πες, ντα αντικάς κάνα κα αβέλ-πες τι πακιάν ότι με ισινόμ οντουβά. 20 Μπαγιά, μπαγιά βακεράβα τουμένγκε: Κον δεχτίνελα οντουλές σο μπουτσσαβάβα δεχτίνελα μαν-ντα, ντα κον δεχτίνελα μαν δεχτίνελα Οντουλές-ντα σο μπουτσσαντάς-μαν».
21 Σοράν ανταλέ λαφίνταρ, ο Ιησούς ταραξάλο ντα βακερντάς: «Μπαγιά, μπαγιά βακεράβα τουμένγκε: Εκ τανό τουμένταρ κα ντελ-μαν μι ντουσμανίνγκε βαστέντε». 22 Ο μαθητές ντικχένας ο εκ ι γιαβερές, ντα πουτσένας κάσκε κερέλας λάφι. 23 Εκ κατά μαθητές, ανταλές σο μανγκέλας-λες ο Ιησούς, ισινέ πασέ λέστε.* 24 Οτθάρ, ο Σίμωνας Πέτρος κερντάς λέσκε νόημας ντα βακερντάς λέσκε: «Βάκερ αμένγκε κάσκε κερέλα λάφι». 25 Ντα βοβ μπολντιντάς-πες κάρινγκ κο γκέσι κι Ιησούσκο ντα βακερντάς λέσκε: «Κύριε, κον ισί;» 26 Ο Ιησούς βακερντάς: «Ισί οντουβά σο κα νταβ-λες ο μαντρό σο κα μπολάβ κο τσαρό». Ντα αφού μπολντάς ο μαντρό, λιντάς-λες ντα ντινάς-λες κο Ιούδας, σο λέσκο ντατ ισινέ ο Σίμωνας ο Ισκαριώτης. 27 Ο Ιούδας λιντάς ο μαντρό, ντα σοράν ντινάς αντρέ λέστε ο Μπενγκ. Οτθάρ, ο Ιησούς βακερντάς λέσκε: «Σο ισί τι κερές, κερ-λες σουγκό». 28 Όμως, καέκ οντουλένταρ σο μπεσένας κο τραπέζι* να τζανέλας σόσκε βακερντάς-λες λέσκε ανταβά. 29 Μερικοί αμντίνενας ότι, επειδή ο Ιούδας ασταρέλας ο κουτίς ι λοβέντζαρ, ο Ιησούς βακερέλας λέσκε: «Κιν σο χρειαζίντιβασα ι μπαρέ ντιβεσέσκε» ή ότι έπρεπε τι ντελ κάτι κο τσορορέ. 30 Οτθάρ, λιντάς ο μαντρό ντα νικίστιλο σουγκό αβρί. Ντα ισινέ ιράτ.
31 Ντα κάνα βοβ νικίστιλο αβρί, ο Ιησούς βακερντάς: «Ακανά ο Τσσαβό ι τζενέσκο δοξάντιβελα, ντα ο Ντεβέλ δοξάντιβελα αντράλ λέσταρ. 32 Ο Ντεβέλ κα δοξάνελ-λες, ντα κα δοξάνελ-λες σουγκό. 33 Μο τσσαβορέ, κα αβάβ τουμέντζαρ χάνικ ατζέ. Κα ρόντεν μάνγκε, ντα ανταβά σο βακερντόμ κο Ιουδαίοι, “οτθέ σο τζάβα με τουμέν ναστί αβένα”, βακεράβα-λες ακανά τουμένγκε-ντα. 34 Ντάβα-τουμέν εκ νεβί εντολή, τι μανγκέν ο εκ ι γιαβερές. Σαρ μανγκλόμ-τουμέν με, τι μανγκέν τουμέν-ντα ο εκ ι γιαβερές. 35 Ανταλέσταρ κα αγαβέν σαρέ ότι ισινέν μο μαθητές, άμα τθερένα αγάπη ο εκ ι γιαβερέσκε».
36 Ο Σίμωνας Πέτρος πουτσλάς-λες: «Κύριε, κατέ τζάσα;» Ο Ιησούς βακερντάς: «Οτθέ σο τζάβα ναστί αβέσα παλά-μάντε ακανά, αλλά κα αβές πο σοράν». 37 Ο Πέτρος βακερντάς λέσκε: «Κύριε, σόσκε ναστί αβάβα παλά-τούτε ακανά; Μι ζωή* κα νταβ τούκε». 38 Ο Ιησούς βακερντάς: «Τι ζωή* κα ντες μάνγκε; Μπαγιά, μπαγιά βακεράβα τούκε: Να κα μπασέλ ο μπασνό μέχρι τι βακερές τριν φαρ ότι να τζανέσα-μαν».