Γράμμας σο Μπουτσσάντιλο κο Ρωμαίοι
6 Μανγκέλα τι βακερέλ ανταβά ότι κα συνεχίνας τι αμαρτίνας για τι σικάντιβελ αμένγκε ατζέ πο μπουτ ο μπαρό λατσσιπέ ι Ντεβλέσκο;* 2 Σίγουρα όχι! Αφού «μουλί» αμαρί αμαρτωλή ζωή, σαρ μπορίνασα τι τζουβντιάς αντρέ κι αμαρτία; 3 Να αγαβένα ότι σαρέ αμέν, σο μπολντιλάμ κο Χριστός Ιησούς, μπολντιλάμ λέσκε μεριμάστε; 4 «Πραχούντιλαμ» γιεκ λέσαρ κάνα μπολντιλάμ λέσκε μεριμάστε. Ντα σαρ ο Χριστός ιστίντιλο κατά μουλέ αντράλ κατά ζορ* ι Νταντέσκι, αντικάς αμέν-ντα ακανά τζουβντιάσα εκ νεβί ζωή. 5 Άμα μουλάμ σαρ βοβ, σίγουρα κα ιστιάς αμέν-ντα κατά μουλέ σαρ βοβ, ντα αντικάς ισινάμ ενωμέ λέσαρ. 6 Τζανάσα ότι αμαρό πουρανό χαρακτήρας ιμπλάντιλο κο κας γιεκ λέσαρ για τι αβέλ μπίζουρανο αμαρό αμαρτωλός σώμας, ντα αντικάς τι τσσιναβάς τι αβάς δούλοι κι αμαρτία. 7 Σόσκε οντουβά σο μουλό νασλό* πι αμαρτιάταρ.
8 Ντα άμα μουλάμ γιεκ ι Χριστόσαρ, πακιάσα ότι κα τζουβντιάς-ντα γιεκ λέσαρ. 9 Τζανάσα ότι ο Χριστός, ακανά σο ιστίντιλο κατά μουλέ, ναστί μερέλα πάλι. Ο μεριπέ ναστί κερέλα-λες κουμάντος πάλι. 10 Μουλό σάντε εκ φαρ για τι νασκιαρέλ ο αμαρτίες. Αλλά τζουβντιόλα για τι κερέλ σο μανγκέλα ο Ντεβέλ. 11 Αντικάς τουμέν-ντα τι ντεν-τουμέν γκοντί ότι ισινέν μουλέ κο πράγματα σο τθερένα τι κερέν ι αμαρτιάσαρ, αλλά ισινέν τζουβντέ για τι κερέν σο μανγκέλα ο Ντεβέλ αντράλ κατά Χριστός Ιησούς.
12 Μα μουκχέν ι αμαρτία τι κερέλ κουμάντος σαρ βασίλισσα τουμαρέ ζωγιάτε. Μα κερέν οντουλά σο μανγκέλα τουμαρό σώμας σο μερέλα. 13 Ντα μα μουκχέν τουμαρό σώμας κι αμαρτία για τι κερέν μπέτι πράγματα, αλλά μουκχέν τουμαρό νεαυτός κι Ντεβλέσκε βαστά σαρ τζενέ σο τζουβντιλέ κατά μουλέ. Μουκχέν τουμαρό σώμας κι Ντεβλέσκε βαστά για τι κερέν λατσσέ πράγματα. 14 Η αμαρτία δεν πρέπει τι κερέλ-τουμέν κουμάντος, σόσκε να ισινέν τελάλ κατά Νόμος, αλλά τελάλ κατά μπαρό λατσσιπέ ι Ντεβλέσκο.*
15 Μανγκέλα τι βακερέλ ανταβά ότι μπορίνασα τι αμαρτίνας επειδή να ισινάμ τελάλ κατά Νόμος αλλά τελάλ κατά μπαρό λατσσιπέ ι Ντεβλέσκο; Σίγουρα όχι! 16 Τζανένα ότι, άμα πάντα ντένα καν εκχέστε, ισινέν λέσκε δούλοι. Οτθάρ-ντα, άμα ισινέν δούλοι κι αμαρτία, κα μερέν. Αλλά άμα ισινέν δούλοι ι Ντεβλέσκε ντα ντένα-λες καν, κα αβέν δίκαιοι. 17 Βακεράσα ευχαριστώ κο Ντεβέλ, σόσκε ανγκλέ ισινένας δούλοι κι αμαρτία αλλά ακανά ντένα καν αντράλ τουμαρέ γκίσταρ κο σικλιαριπέ σο ντινάς-τουμέν ο Ντεβέλ. 18 Βα, κάνα ελευθερωσάλεν κατά αμαρτία, αβιλέν δούλοι κι δικαιοσύνη. 19 Οντουλά σο βακεράβα τουμένγκε ισί λάφια σο τζανένα ο τζενέ, σόσκε τουμαρό σώμας ισί μπίζουρανο. Σαρ μουκχλέν τουμαρό σώμας τι αβέλ δούλος κο μαγαριπέ ντα κο γκεραλιπέ* για τι κερέν γκεραλέ πράγματα, αντικάς-ντα ακανά μουκχέν τουμαρό σώμας τι αβέλ δούλος κι δικαιοσύνη για τι κερέν άγια πράγματα. 20 Κάνα ισινένας δούλοι κι αμαρτία, η δικαιοσύνη να κερέλας-τουμέν κουμάντος.
21 Καβά ισινέ ο αποτέλεσμας οντουλένγκο σο κερντέν αζομάν; Κερντέν πράγματα σο ακανά λατζάνα λένγκε, ντα ανταλά πράγματα γκερένα κο μεριπέ. 22 Αλλά ακανά σο ελευθερωσάλεν κατά αμαρτία ντα αβιλέν δούλοι ι Ντεβλέσκε, κερέν άγια πράγματα, ντα ο αποτέλεσμας κα αβέλ ζωή για πάντα. 23 Σόσκε οντουβά σο ποκινέλα η αμαρτία ισί μεριπέ, αλλά ο δώρος σο ντέλα ο Ντεβέλ ισί ζωή για πάντα αντράλ κατά Χριστός Ιησούς αμαρέ Κυριόσταρ.