Ο Ευαγγέλιος σο Γραφιντάς ο Ιωάννης

8 12 Πάλι κερντάς λέντζαρ λάφι ο Ιησούς ντα βακερντάς: «Με ισινόμ ο φως ι ντουνιάσκο. Κον αβέλα παλά-μάντε να κα πφιρέλ κο καρανίκι, αλλά κα τθερέλ ο φως ι ζωγιάκο». 13 Οτθάρ, ο Φαρισαίοι βακερντέ λέσκε: «Τούι κερέσα λάφι κο τζενέ τούκε, το λάφια νανέ μπαγιά». 14 Ο Ιησούς βακερντάς λένγκε: «Ατζέ-ντα άμα με βακεράβα κο τζενέ μάνγκε, μο λάφια ισί μπαγιά, σόσκε τζανάβα κατάρ αβιλόμ ντα κατέ τζάβα. Τουμέν όμως να τζανένα κατάρ αβιλόμ ντα κατέ τζάβα. 15 Τουμέν κρίνενα σαρ ο τζενέ. Με να κρίναβα ούτε εκχέ τζενές. 16 Αλλά ατζέ-ντα άμα κρίναβα, κρίναβα δίκαια, σόσκε να ισινόμ κορκορό, αλλά ο Ντατ σο μπουτσσαντάς-μαν ισί μάντζαρ. 17 Ατζέ, κο Νόμος σο τθερένα τουμέν ισί γραμμέ: “Άμα ντούι τζενέ βακερένα ο ίδιος πράγμας, λένγκε λάφια ισί μπαγιά”. 18 Με ισινόμ ο εκ τζενό σο βακερέλα κον ισινόμ, ντα ο Ντατ σο μπουτσσαντάς-μαν βακερέλα βοβ-ντα κον ισινόμ». 19 Αζομάν βακερντέ λέσκε: «Κάι ισί το Ντατ;» Ο Ιησούς βακερντάς: «Ούτε μαν να τζανένα ούτε μι Νταντές. Άμα τζανένας μαν, κα τζανένας μι Νταντές-ντα». 20 Ανταλά λάφια βακερντάς-λεν κάνα ισινέ κο τθαν σο γκίντενας ο λοβέ, καζόμ σικλιαρέλας κο ναός. Αλλά καέκ να ασταρντάς-λες, σόσκε να αβιλόας ατζέ λέσκο σαάτι.

21 Ντα βακερντάς λένγκε πάλι: «Με νασάβα ντα κα ρόντεν μάνγκε, όμως κα μερέν αντρέ τουμαρέ αμαρτιάτε. Οτθέ σο τζάβα με, τουμέν ναστί αβένα». 22 Αζομάν ο Ιουδαίοι βακερένας: «Μα τι μανγκέλα τι μουνταρέλ-πες; Σόσκε βακερέλα: “Οτθέ σο τζάβα με, τουμέν ναστί αβένα”». 23 Ντα βοβ βακερντάς λένγκε: «Τουμέν ισινέν κατά τελαϊνέ τθανά. Με ισινόμ κατά οπραϊνέ τθανά. Τουμέν ισινέν ανταλέ ντουνιάσταρ. Με να ισινόμ ανταλέ ντουνιάσταρ. 24 Άκ’ σόσκε βακερντόμ τουμένγκε: Κα μερέν αντρέ τουμαρέ αμαρτιέντε. Σόσκε άμα να πακιάνα ότι με ισινόμ οντουβά σο βακεράβα τουμένγκε, κα μερέν αντρέ τουμαρέ αμαρτιέντε». 25 Βον βακερένας λέσκε: «Κον ισινάν τούι;» Ο Ιησούς βακερντάς λένγκε: «Σινανέ κεράβα τουμέντζαρ λάφι. 26 Τθεράβα τι βακεράβ μπουτ πράγματα σο τθερένα τι κερέν τουμέντζαρ ντα μπουτ πράγματα τι κρίναβ. Οντουβά σο μπουτσσαντάς-μαν βακερέλα ι αλήθεια, ντα ο πράγματα σο ασουντόμ λέσταρ, ανταλά βακεράβα κο ντουνιάς». 27 Βον να αγαντέ ότι κερέλας λένγκε λάφι ι Νταντέσκε. 28 Αζομάν ο Ιησούς βακερντάς: «Κάνα κα βάντεν οπράλ κο κας ι τζενέσκε Τσσαβές, αζομάν κα αγαβέν ότι με ισινόμ οντουβά ντα ότι να κεράβα τίποτα από κορκορό. Αλλά σαρ σικλιαρντάς-μαν ο Ντατ βακεράβα ανταλά πράγματα. 29 Ντα Οντουβά σο μπουτσσαντάς-μαν ισί μάντζαρ. Να μουκχλάς-μαν κορκορό, σόσκε με κεράβα πάντα ο πράγματα σο μπεϊντίνελα».* 30 Καζόμ βακερέλας-λεν ανταλά, μπουτ τζενέ πακιαντέ λέστε.

31 Σοράν ο Ιησούς βακερέλας κο Ιουδαίοι σο πακιαντέας-λες: «Άμα να κα τσσιναβέν τι ντεν καν μι λαφίστε, ισινέν μπαγιά μο μαθητές, 32 ντα κα σικλιόν ι αλήθεια ντα η αλήθεια κα ελευθερώνελ-τουμέν». 33 Βον βακερντέ λέσκε: «Αμέν αστάρντιβασα κατά Αβραάμ ντα ποτές να ισινάμας δούλοι καεκχέσκε. Σαρ βακερέσα τούι: “Κα ελευθερώντιβεν”;» 34 Ο Ιησούς βακερντάς λένγκε: «Μπαγιά, μπαγιά βακεράβα τουμένγκε: Κον κερέλα ι αμαρτία ισί δούλος ι αμαρτιάκο. 35 Ατζέκ, ο δούλος να ατσσόλα για πάντα κο κχερ, ο τσσαβό ατσσόλα για πάντα. 36 Άρα, άμα ο Τσσαβό κα ελευθερώνελ-τουμέν, κα αβέν μπαγιά ελεύθεροι. 37 Τζανάβα ότι αστάρντιβενα κατά Αβραάμ. Όμως, μανγκένα τι μουνταρέν-μαν, σόσκε μο λάφι να αρακχέλα τθαν τουμέντε.* 38 Με βακεράβα οντουλά σο ντικχλόμ κάνα ισινόμας μι Νταντέσαρ, αλλά τουμέν κερένα οντουλά σο ασουντέν τουμαρέ νταντέσταρ». 39 Βον βακερντέ λέσκε: «Αμαρό ντατ ισί ο Αβραάμ». Ο Ιησούς βακερντάς λένγκε: «Άμα ισινένας τσσαβέ ι Αβρααμίσκε, κα κερένας οντουλά σο κερντάς ο Αβραάμ. 40 Ακανά όμως μανγκένα τι μουνταρέν-μαν, μαν σο βακερντόμ τουμένγκε ι αλήθεια σο ασουντόμ κατά Ντεβέλ. Ο Αβραάμ να κερντάς-λες ανταβά. 41 Τουμέν κερένα οντουλά σο κερέλα τουμαρό ντατ». Βον βακερντέ λέσκε: «Αμέν να ισινάμ γιαβερέσκε τσσαβέ.* Εκχέ Νταντές τθεράσα, ι Ντεβλές».

42 Ο Ιησούς βακερντάς λένγκε: «Άμα ο Ντεβέλ ισινέ τουμαρό Ντατ, κα μανγκένας-μαν, σόσκε με κατά Ντεβέλ αβιλόμ ντα ισινόμ ατθέ. Να αβιλόμ από κορκορό, αλλά Βοβ μπουτσσαντάς-μαν. 43 Σόσκε να αγαβένα σο βακεράβα; Επειδή ναστί ασουνένα μο λάφι. 44 Τουμέν ισινέν τουμαρέ νταντέσταρ κατά Μπενγκ ντα μανγκένα τι κερέν οντουλά σο μανγκέλα τουμαρό ντατ. Βοβ μουνταρέλας από αζομάν σο λιντάς πιρό ντρομ,* ντα να ατσσιλό σταθερός κι αλήθεια, σόσκε νανέ αλήθεια λέστε. Κάνα βακερέλα ο ψέμας, σικαβέλα κον ισί μπαγιά, σόσκε ισί ψεύτης ντα ο ντατ ι ψεμάσκο. 45 Με όμως βακεράβα ι αλήθεια, οτθάρ να πακιάνα-μαν. 46 Κον τουμένταρ βακερέλα ότι κερντόμ αμαρτία; Άμα βακεράβα ι αλήθεια, σόσκε να πακιάνα-μαν; 47 Οντουβά σο ισί κατά Ντεβέλ ασουνέλα ο λάφια ι Ντεβλέσκε. Άκ’ σόσκε τουμέν να ασουνένα: σόσκε να ισινέν κατά Ντεβέλ».

48 Ο Ιουδαίοι βακερντέ: «Δίκιος να τθεράσα σο βακεράσα ότι ισινάν Σαμαρείτης ντα τθερέσα δαιμονάς;» 49 Ο Ιησούς βακερντάς: «Με να τθεράβα δαιμονάς, αλλά σεβάναβα μι Νταντές, ντα τουμέν να σεβάνενα-μαν. 50 Αλλά με να μανγκάβα ισαριπέ μάνγκε. Ο Ντεβέλ μανγκέλα τι λαβ ισαριπέ ντα βοβ κρίνελα. 51 Μπαγιά, μπαγιά βακεράβα τουμένγκε: Άμα εκ τζενό κερέλα μο λάφια, ποτές να κα ντικχέλ μεριπέ». 52 Ο Ιουδαίοι βακερντέ λέσκε: «Ακανά ισινάμ σίγουροι ότι τθερέσα δαιμονάς. Ο Αβραάμ ντα ο προφήτες μουλέ, αλλά τούι βακερέσα: “Άμα εκ τζενό κερέλα μο λάφια, ποτές να κα μερέλ”. 53 Μα τι ισινάν πο μπαρό αμαρέ νταντέσταρ κατά Αβραάμ, σο μουλό; Ο προφήτες-ντα μουλέ. Κον αμντίνεσα ότι ισινάν;» 54 Ο Ιησούς βακερντάς: «Άμα με ισαράβα-μαν, μο ισαριπέ νανέ τίποτα. Μο Ντατ, σο βακερένα ότι ισί τουμαρό Ντεβέλ, ισί σο ισαρέλα-μαν. 55 Τουμέν να τζανένα-λες, με όμως τζανάβα-λες. Ντα άμα κα βακεράβας ότι να τζανάβας-λες, κα αβάβας σαρ τουμέντε, ψεύτης. Αλλά μπαγιά τζανάβα-λες ντα κεράβα λέσκε λάφια. 56 Πουτάρντιλο ο γκι τουμαρέ νταντέσκο ι Αβρααμίσκο σο κα ντικχέλας μο ντιβές, ντα ντικχλάς-λες ντα χαιρισάλο». 57 Αζομάν ο Ιουδαίοι βακερντέ λέσκε: «Τούι να ισινάν ούτε 50 μπρεσένγκο, ντα ντικχλάν ι Αβρααμίς;» 58 Ο Ιησούς βακερντάς λένγκε: «Μπαγιά, μπαγιά βακεράβα τουμένγκε: Με τζουβντιάβας πριν τι μπιάντιβελ ο Αβραάμ». 59 Αζομάν λιντέ μπαρά για τι φουρτίνεν λέσκε, αλλά ο Ιησούς γκεραντάς-πες ντα νικίστιλο κατά ναός.