Ο Ευαγγέλιος σο Γραφιντάς ο Ματθαίος
2 Ο Ιησούς μπιάντιλο κι Βηθλεέμ σο ισί κι Ιουδαία, αζομάν σο ισινέ βασιλιάς ο Ηρώδης.* Σοράν, αβιλέ κι Ιερουσαλήμ μάγοι* κατά Ανατολή 2 ντα βακερντέ: «Κάι ισί οντουβά σο μπιάντιλο βασιλιάς ι Ιουδαιόνγκο; Σόσκε ντικχλάμ λέσκι τσεργάν κάνα ισινάμας κι Ανατολή ντα αβιλάμ τι περάς κοτσίντζαρ* ανγκλά-λέστε». 3 Σο ασουντάς-λες ανταβά, ο βασιλιάς Ηρώδης ταραξάλο, ντα γιεκ λέσαρ σαρί η Ιερουσαλήμ. 4 Γκιντιντάς σαρέ ι μπαρέ ιερεόν* ντα ι γραμματεόν ι λαόσκερε ντα πουτσλάς-λεν κάι κα μπιάντιβελας ο Χριστός.* 5 Βον βακερντέ λέσκε: «Κι Βηθλεέμ σο ισί κι Ιουδαία, σόσκε ο προφήτης γραφιντάς: 6 “Ντα τούι, Βηθλεέμ κατά τθεμ Ιούδας, σίγουρα να ισινάν ο πο χουρντό γκαβ κο γιακχά οντουλένγκε σο κερένα κουμάντος κο Ιούδας, σόσκε τούταρ κα νικιόλ εκ μουρς σο κα κερέλ κουμάντος ντα κα αβέλ τσομπάνης μι λαόστε, κο Ισραήλ”».
7 Αζομάν ο Ηρώδης ντινάς βίκος αποτσοράλ ι μαγόν ντα σικλιλό λένταρ ντιπ λατσσές κάνα σικάντιλι η τσεργάν. 8 Σοράν μπουτσσαντάς-λεν κι Βηθλεέμ ντα βακερντάς λένγκε: «Τζαν, ρόντεν λατσσές ι χουρντέσκε ντα, κάνα κα αρακχέν-λες, ελάν τι βακερέν μάνγκε-ντα, για τι τζαβ με-ντα τι περάβ κοτσίντζαρ ανγκλά-λέστε». 9 Βον ασουντέ ι βασιλιάς ντα σοράν νασλέ. Ντα άκ’! Η τσεργάν σο ντικχλέας κάνα ισινέ κι Ανατολή τζάλας ανγκλά-λένταρ, μέχρι σο ατσσιλί οπράλ κατά κχερ σο ισινέ ο χουρντό. 10 Σο ντικχλέ ι τσεργάν, αβιλό μπουτ λένγκο γκι. 11 Ντα κάνα γκιλέ αντρέ κο κχερ, ντικχλέ ι χουρντές ι Μαριάσαρ λέσκε νταγιάσαρ ντα πελέ τελέ κοτσίντζαρ ανγκλά-λέστε. Πουταρντέ-ντα πουμαρέ θησαυρούς ντα ντινέ-λες δώρα—εμ χρυσάφι εμ λιβάνι εμ σμύρνα. 12 Όμως, ο Ντεβέλ αντράλ εκχέ σουνέσταρ βακερντάς λένγκε μα τι βουρτίνεν κο Ηρώδης, οτθάρ νασλέ για τι τζαν πουμαρέ τθεμέστε γιαβερέ ντρομέσταρ.
13 Νασλέ, ντα σοράν άγγελος ι Ιεχωβάσκο* αβιλό ι Ιωσηφίσκε κο σουνό ντα βακερντάς λέσκε: «Ίστι, λε ι χουρντές ντα λέσκε νταγιά ντα τζα κι Αίγυπτος ντα άτσσουβ οτθέ μέχρι τι βακεράβ τούκε, σόσκε ο Ηρώδης κα ρόντελ ι χουρντέσκε για τι μουνταρέλ-λες». 14 Οτθάρ, ο Ιωσήφ ιστίντιλο, λιντάς αντρέ κι ιράτ ι χουρντές ντα λέσκε νταγιά ντα γκιλό κι Αίγυπτος. 15 Ντα μπεσλό οτθέ μέχρι σο μουλό ο Ηρώδης. Αντικάς, νικίστιλε μπαγιά ο λάφια σο βακερντάας ο Ιεχωβά* αντράλ πι προφητίσταρ: «Κατά Αίγυπτος βικιντόμ* μι τσσαβές».
16 Κάνα ο Ηρώδης ντικχλάς ότι χουχαντέας-λες ο μάγοι, πφερντιλό χολί. Οτθάρ, μπουτσσαντάς τζενέν κι Βηθλεέμ ντα σαρέ κο τθανά οτθέ πασέ ντα μουνταρντέ σαρέ ι μουρσέν, σο ισινέ ντουέ μπρεσένγκε ντα πο χουρντέ. Γκιντάς λένγκε μπρεσά οντουλένταρ σο σικλιλό ντιπ λατσσές κατά μάγοι. 17 Αζομάν νικίστιλο μπαγιά οντουβά σο βακέρντιλοας αντράλ κατά προφήτης Ιερεμίας: 18 «Βίκος ασούντιλο κι Ραμά ντα ζουρανό ροϊπέ. Ισινέ η Ραχήλ σο ροβέλας πι τσσαβένγκε ντα να μουκχέλας καεκχές τι κοβλιαρέλ λάκι ντουκχ,* σόσκε μουλέ λάταρ».
19 Κάνα μουλόας ο Ηρώδης, άγγελος ι Ιεχωβάσκο* αβιλό ι Ιωσηφίσκε κο σουνό κι Αίγυπτος 20 ντα βακερντάς λέσκε: «Ίστι, λε ι χουρντές ντα λέσκε νταγιά ντα τζα κο τθεμ Ισραήλ, σόσκε οντουλά σο μανγκένας τι μουνταρέν ι χουρντές* μουλέ». 21 Οτθάρ, βοβ ιστίντιλο, λιντάς ι χουρντές ντα λέσκε νταγιά ντα βουρτισάλο κο τθεμ Ισραήλ. 22 Αλλά κάνα ασουντάς ότι κι Ιουδαία κερέλας κουμάντος ο Αρχέλαος, σο λέσκο ντατ ισινέ ο Ηρώδης, νταρασάλο τι τζαλ οτθέ. Ντα σαρ βακερντάς λέσκε ο Ντεβέλ αντράλ εκχέ σουνέσταρ, γκιλό κι Γαλιλαία. 23 Αντικάς, γκιλό κι πόλη σο βακέρντιβελας Ναζαρέτ ντα μπεσλό οτθέ, για τι νικιόν μπαγιά ι προφητένγκε λάφια: «Κα βακέρντιβελ Ναζωραίος».*