Ο Ευαγγέλιος σο Γραφιντάς ο Ματθαίος
1 Ο βιβλίος σο σικαβέλα κατάρ αστάρντιβελα ο Ιησούς Χριστός,* ο τσσαβό ι Δαβιδίσκο, ο τσσαβό ι Αβρααμίσκο:
2 Κατά Αβραάμ αβιλό ο Ισαάκ.
Κατά Ισαάκ αβιλό ο Ιακώβ.
Κατά Ιακώβ αβιλό ο Ιούδας ντα λέσκε πφραλά.
3 Κατά Ιούδας αβιλό ο Φαρές ντα ο Ζερά ντα λένγκι ντάι ισινέ η Θάμαρ.
Κατά Φαρές αβιλό ο Εσρών.
Κατά Εσρών αβιλό ο Ραμ.
4 Κατά Ραμ αβιλό ο Αμμιναδάβ.
Κατά Αμμιναδάβ αβιλό ο Ναασών.
Κατά Ναασών αβιλό ο Σαλμών.
5 Κατά Σαλμών αβιλό ο Βοόζ ντα λέσκι ντάι ισινέ η Ραάβ.
Κατά Βοόζ αβιλό ο Ωβήδ ντα λέσκι ντάι ισινέ η Ρουθ.
Κατά Ωβήδ αβιλό ο Ιεσσαί.
6 Κατά Ιεσσαί αβιλό ο Δαβίδ, ο βασιλιάς.
Κατά Δαβίδ αβιλό ο Σολομώντας ντα λέσκι ντάι ισινέ η ρομνί σο ανγκλέ τθερέλας-λα ο Ουρίας.
7 Κατά Σολομώντας αβιλό ο Ροβοάμ.
Κατά Ροβοάμ αβιλό ο Αβιά.
Κατά Αβιά αβιλό ο Ασά.
8 Κατά Ασά αβιλό ο Ιωσαφάτ.
Κατά Ιωσαφάτ αβιλό ο Ιωράμ.
Κατά Ιωράμ αβιλό ο Οζίας.
9 Κατά Οζίας αβιλό ο Ιωθάμ.
Κατά Ιωθάμ αβιλό ο Άχαζ.
Κατά Άχαζ αβιλό ο Εζεκίας.
10 Κατά Εζεκίας αβιλό ο Μανασσής.
Κατά Μανασσής αβιλό ο Αμών.
Κατά Αμών αβιλό ο Ιωσίας.
11 Κατά Ιωσίας αβιλό ο Ιεχονίας ντα λέσκε πφραλά, κο βακίτι σο ο Ιουδαίοι λιντιλέ ζορίσαρ πουμαρέ τθεμέσταρ κι Βαβυλώνα.
12 Καζόμ ισινέ κι Βαβυλώνα, κατά Ιεχονίας αβιλό ο Σαλαθιήλ.
Κατά Σαλαθιήλ αβιλό ο Ζοροβάβελ.
13 Κατά Ζοροβάβελ αβιλό ο Αβιούδ.
Κατά Αβιούδ αβιλό ο Ελιακείμ.
Κατά Ελιακείμ αβιλό ο Αζώρ.
14 Κατά Αζώρ αβιλό ο Σαδώκ.
Κατά Σαδώκ αβιλό ο Αχείμ.
Κατά Αχείμ αβιλό ο Ελιούδ.
15 Κατά Ελιούδ αβιλό ο Ελεάζαρ.
Κατά Ελεάζαρ αβιλό ο Ματθάν.
Κατά Ματθάν αβιλό ο Ιακώβ.
16 Κατά Ιακώβ αβιλό ο Ιωσήφ, ο ρομ ι Μαριάκο, ντα η Μαρία μπιαντάς ι Ιησούς σο βακέρντιβελα Χριστός.
17 Αντικάς, σαρέ ο γενιές κατά Αβραάμ μέχρι κο Δαβίδ ισινέ 14 γενιές. Κατά Δαβίδ μέχρι σο ο Ιουδαίοι λιντιλέ ζορίσαρ πουμαρέ τθεμέσταρ κι Βαβυλώνα 14 γενιές. Κατά βακίτι σο λιντιλέ κι Βαβυλώνα μέχρι κο Χριστός 14 γενιές.
18 Ο Ιησούς Χριστός μπιάντιλο αντικάς: Ο βακίτι σο λέσκι ντάι, η Μαρία, ισινέ νισανλίς ι Ιωσηφίσαρ, ατσσιλί κχαμνί αντράλ κατά άγιος πνεύμας* πριν βον τι σοβέν γιεκ. 19 Αλλά λάκο ρομ, ο Ιωσήφ, ισινέ δίκαιος ντα να μανγκέλας τι ανέλ λάκε λατζ ανγκλάλ κο τζενέ. Οτθάρ, τθερέλας πι γκοντιάτε τι χαλαβέλ ο νισανλίκια* αποτσοράλ. 20 Όμως, σκεφτιντάς-λεν λατσσές σαρέ ανταλά, ντα σοράν αβιλό λέσκε κο σουνό άγγελος ι Ιεχωβάσκο* ντα βακερντάς λέσκε: «Ιωσήφ, σο ισινάν τσσαβό ι Δαβιδίσκο, μα ντάρα τι λες κο κχερ τι ρομνιά, ι Μαριά, σόσκε βόι ατσσιλί κχαμνί αντράλ κατά άγιος πνεύμας. 21 Κα μπιανέλ μουρσές, ντα κα ντες-λες ο ναβ Ιησούς,* σόσκε βοβ κα σώνελ πι λαός λένγκε αμαρτιένταρ». 22 Σαρέ ανταλά αβιλέ-πες για τι νικιόλ μπαγιά οντουβά σο βακερντάας ο Ιεχωβά* αντράλ πι προφητίσταρ: 23 «Άκ’! Η τσσάι* κα ατσσόλ κχαμνί ντα κα μπιανέλ μουρσές, ντα κα νικαβέν λέσκε Εμμανουήλ», σο μανγκέλα τι βακερέλ «αμέντζαρ ισί ο Ντεβέλ».
24 Σοράν ο Ιωσήφ τζανγκάντιλο ντα κερντάς αντικάς σαρ βακερντάας λέσκε ο άγγελος ι Ιεχωβάσκο,* ντα λιντάς πι ρομνιά πι κχερέστε. 25 Αλλά να σοτάς λάσαρ μέχρι τι μπιανέλ η Μαρία μουρσές. Ντα βοβ ντινάς-λες ο ναβ Ιησούς.