Ο Ευαγγέλιος σο Γραφιντάς ο Ματθαίος

21 Κάνα ερεσλέ πασέ κι Ιερουσαλήμ ντα ατσσιλέ κι Βηθφαγή, κο Βες κι Ζιτινίνγκο,* ο Ιησούς μπουτσσαντάς ντουέ μαθητέν, 2 ντα βακερντάς λένγκε: «Τζαν κο γκαβ σο ντικχένα. Σο κα ντεν αντρέ κα αρακχέν εκχέ χχερνιά ντα εκχέ κχουρές* πφαντέ. Πουτρέν-λεν ντα ανέν-λεν μάντε. 3 Άμα καέκ τζενό κα πουτσέλ-τουμέν, βακερέν λέσκε: “Μανγκέλα-λεν ο Κύριος”. Κάνα κα βακερέν-λες ανταβά, κα μουκχέλ-τουμέν τι λεν-λεν».

4 Ανταβά αβιλό-πες για τι νικιόλ μπαγιά οντουβά σο βακέρντιλοας αντράλ κατά προφήτης: 5 «Βακερέν κι τσσάι Σιών: “Ντικχ! Το βασιλιάς αβέλα τούτε κοβλέ γκίσαρ ντα μπεσέλα οπράλ χχερέστε, βα, οπράλ κχουρέστε σο μπιάντιλο χχερνιάταρ”».

6 Οτθάρ, ο μαθητές γκιλέ ντα κερντέ ντιπ οντουβά σο βακερντάς λένγκε ο Ιησούς. 7 Αντέ ι χχερνιά ντα λάκε κχουρές ντα τσσουντέ οπρά-λέντε πουμαρέ αβραϊνέ σέα, ντα βοβ μπεσλό οπράλ κο κχουρό. 8 Ισινέ μπουτ τζενέ οτθέ. Ο πο μπουτ λένταρ μπουγαρντέ πουμαρέ αβραϊνέ σέα τελέ κο ντρομ. Γιαβερά τσσινένας κλαδιά κατά δέντρα ντα τσσουβένας-λεν τελέ κο ντρομ. 9 Ντα ο μπουτ τζενέ, εμ οντουλά σο τζάνας ανγκλά-λέσταρ εμ οντουλά σο αβένας παλά-λέστε, ντένας βίκος: «Σώνε, μολίνασα-τουτ, ι Δαβιδίσκε Τσσαβές! Ευλογημέ ισί οντουβά σο αβέλα κο ναβ κι Ιεχωβάσκο!* Σώνε-λες, μολίνασα-τουτ, τούι σο μπεσέσα οπρέ κο ουρανός!»

10 Ντα κάνα ντινάς αντρέ κι Ιερουσαλήμ, σαρέ οτθέ ισινέ οπράλ κο πιντρέ ντα πουτσένας: «Κον ισί ανταβά;» 11 Ο τζενέ σο ισινέ λέσαρ βακερένας: «Βοβ ισί ο προφήτης Ιησούς, κατά Ναζαρέτ σο ισί κι Γαλιλαία!»

12 Ο Ιησούς ντινάς αντρέ κο ναός ντα παλντιντάς σαρέ οντουλέν σο μπικινένας ντα κινένας οτθέ. Περαντάς ο τραπέζια οντουλένγκε σο αλλάνενας ο λοβέ* ντα ο πάγκοι οντουλένγκε σο μπικινένας περιστέρια. 13 Ντα βακερντάς λένγκε: «Ισί γραμμέ: “Μο κχερ κα βακέρντιβελ κχερ προσευχιάκο”, αλλά τουμέν κερένα-λες σπηλιά τσορένγκι».* 14 Καζόμ ισινέ κο ναός, γκιλέ λέστε κορορέ ντα μπανγκέ ντα κερντάς-λεν λατσσές.

15 Κάνα ο μπαρέ ιερείς ντα ο γραμματείς ντικχλέ ο θαύματα σο κερντάς ντα ι τσσαβέν σο ντένας βίκος κο ναός: «Σώνε, μολίνασα-τουτ, ι Δαβιδίσκε Τσσαβές!» πφαριλέ πουμαρέ χολιάταρ 16 ντα βακερντέ λέσκε: «Ασουνέσα σο βακερένα;» Ο Ιησούς βακερντάς λένγκε: «Βα. Να διαβαντέν ποτές ότι “κατά μούι χουρντένγκο ντα μαξιμίνγκο κερντάν τι νικιόλ ισαριπέ”;» 17 Σοράν νασλό κατά Ιερουσαλήμ, γκιλό κι Βηθανία ντα νακχλάς οτθέ ι ιράτ.

18 Καζόμ βουρτίνελας κι Ιερουσαλήμ ντιπ πρωί, μποκχάλιλο. 19 Ντικχλάς κο ντρομ εκ χχελινγκίν ντα γκιλό πασέ. Όμως, να αρακχλάς λάτε χχελιά αλλά σάντε φύλλα ντα βακερντάς λάκε: «Ποτές μα τι νικαβές χχελιά». Ντα οντιά στιγμή η χχελινγκίν σουκιλί. 20 Κάνα ντικχλέ-λες ανταβά ο μαθητές, ατσσιλέ πουταρντέ μόσαρ ντα βακερντέ: «Σαρ σουκιλί αζόμ σουγκό η χχελινγκίν;» 21 Ο Ιησούς βακερντάς λένγκε: «Μπαγιά βακεράβα τουμένγκε: Άμα τθερένα πίστη ντα ισινέν ντιπ σίγουροι, να κα κερέν σάντε οντουβά σο κερντόμ με κι χχελινγκίν. Αλλά ατζέ-ντα άμα κα βακερέν ακαλέ βεσέσκε: “Ίστι ντα περ κι ντεριάβ”, κα αβέλ-πες. 22 Ντα άμα τθερένα πίστη, κα ντιντιόν τουμέντε σαρέ οντουλά σο μανγκένα κι προσευχή».

23 Κάνα ο Ιησούς ντινάς αντρέ κο ναός, ο μπαρέ ιερείς ντα ο πρεσβύτεροι ι λαόσκε γκιλέ πασέ λέστε καζόμ σικλιαρέλας ντα βακερντέ: «Κάσκε ζοριάσαρ κερέσα ανταλά πράγματα; Ντα κον ντινάς-τουτ ανταγιά ζορ;» 24 Ο Ιησούς βακερντάς: «Κα πουτσάβ-τουμέν με-ντα κάτι. Άμα κα βακερέν μάνγκε, με-ντα κα βακεράβ τουμένγκε κάσκε ζοριάσαρ κεράβα ανταλά πράγματα: 25 Ο μπολντιπέ ι Ιωαννίσκο κάσταρ ισινέ; Κατά Ντεβέλ* ή κατά τζενέ;» Αλλά βον βακερένας ο εκ κο γιαβέρ: «Άμα κα βακεράς: “Κατά Ντεβέλ”,* κα βακερέλ αμένγκε: “Ντα σόσκε να πακιαντέν-λες;” 26 Αλλά άμα κα βακεράς: “Κατά τζενέ”, κα αρακχάς αμαρό μπελιάς, σόσκε σαρέ πακιάνα ότι ο Ιωάννης ισινέ προφήτης». 27 Οτθάρ βακερντέ κο Ιησούς: «Να τζανάσα». Ντα βοβ βακερντάς λένγκε: «Με-ντα να βακεράβα τουμένγκε κάσκε ζοριάσαρ κεράβα ανταλά πράγματα.

28 »Σο αμντίνενα; Βακερέν ότι εκ τζενό τθερέλας ντουέ τσσαβέν. Γκιλό πι μπαρέ τσσαβέστε ντα βακερντάς: “Μο τσσαβό, τζα τι κερές μπουτί αντιβές κο ρεζά”. 29 Βοβ βακερντάς: “Να τζάβα”, αλλά σοράν μετανιωσάλο ντα γκιλό. 30 Ο ντατ γκιλό ντα βακερντάς-λες εμ πι χουρντέ τσσαβέσκε. Ο τσσαβό βακερντάς: “Κα τζαβ, ντάντε”, αλλά να γκιλό. 31 Κον κατά ντούι κερντάς οντουβά σο μανγκλάς ο ντατ;» Βον βακερντέ: «Ο μπαρό τσσαβό». Ο Ιησούς βακερντάς λένγκε: «Μπαγιά βακεράβα τουμένγκε ότι οντουλά σο γκίντενα ο φόροι ντα ο λουμνιά ισί πο ανγκλάλ τουμένταρ κο ντρομ σο γκερέλα κι Βασιλεία κι Ντεβλέσκι. 32 Σόσκε ο Ιωάννης αβιλό ντα σικαντάς τουμένγκε ο δίκαιος ντρομ, αλλά να πακιαντέν-λες. Όμως, οντουλά σο γκίντενα ο φόροι ντα ο λουμνιά πακιαντέ-λες, αλλά τουμέν, ατζέ-ντα κάνα ντικχλέν-λες ανταβά, να μετανιωσάλεν ντα να πακιαντέν-λες.

33 »Ασουνέν εκ γιαβέρ παράδειγμας:* Ισινέ εκ τζενό σο τθερέλας χωράφια ντα τσσουντάς εκχέ χωραφίστε ρεζά. Πφαντάς-λες ντονταλάι, χαντζουντάς οτθέ αντρέ εκ τθαν για τι ιστάντιβεν ο ντρακχά ντα κερντάς εκ πύργος. Σοράν, νοικιαντάς-λες γεωργόντε ντα νασλό γιαβερέ τθεμέστε. 34 Κάνα ερεσλό ο βακίτι ι γκιντιμάσκο, μπουτσσαντάς πι δουλόν κο γεωργοί για τι λελ ο ντρακχά σο ισινέ λέσκε.* 35 Όμως, ο γεωργοί λιντέ λέσκε δουλόν, ντα εκχές νταπλέ-λες, γιαβερές μουνταρντέ-λες ντα γιαβερέσκε φουρτιντέ μπαρά μέχρι σο μουλό. 36 Μπουτσσαντάς γιαβερέ-ντα δουλόν, πο μπουτέν κατά πρώτη φαρ, αλλά κερντέ-λεν ανταλά λένγκε-ντα. 37 Κο τέλος μπουτσσαντάς λένγκε πι τσσαβές, σόσκε βακερέλας: “Κα σεβάνεν μι τσσαβές”. 38 Σο ντικχλέ λέσκε τσσαβές, ο γεωργοί βακερντέ ο εκ κο γιαβέρ: “Λέστε κα ντιντιόλ ο χωράφι. Ελάν τι μουνταράς-λες ντα τι λας-λες* αμέν!” 39 Οτθάρ, ασταρντέ-λες ντα φουρτιντέ-λες αβρί κατά χωράφι ντα μουνταρντέ-λες. 40 Άρα, σο κα κερέλ ο τζενό ι χωραφίσκο οντουλέ γεωργόν κάνα κα αβέλ;» 41 Βον βακερντέ λέσκε: «Επειδή ισί γκεραλέ* τζενέ, κα ανέλ οπρά-λέντε μπαρί καταστροφή ντα κα νοικιάνελ ο χωράφι γιαβερέ γεωργόντε σο κα ντεν-λες λέσκε ντρακχά* κάνα κα αβέλ ο βακίτι ι γκιντιμάσκο».

42 Ο Ιησούς βακερντάς λένγκε: «Να διαβαντέν ποτές κι Γραφή ότι “ο μπαρ σο να μανγκλέ ο χτίστες αβιλό ο πο σημαντικός μπαρ ι γωνιάκο, κερντιλό κατά Ιεχωβά* ντα ισί μπουτ σουκάρ αμαρέ γιακχίντε”; 43 Οτθάρ βακεράβα τουμένγκε: Ο Ντεβέλ κα λελ πι Βασιλεία τουμένταρ ντα κα ντελ-λα τζενέντε σο κερένα οντουβά* σο μανγκέλα λένταρ. 44 Ντα κον κα περέλ οπράλ ανταλέ μπαρέστε κα καταστραφίντιβελ. Ντα κάστε κα περέλ ο μπαρ, κα μουνταρέλ-λες».

45 Κάνα ο μπαρέ ιερείς ντα ο Φαρισαίοι ασουντέ λέσκε παραδείγματα, αγαντέ ότι λένγκε κερέλας λάφι. 46 Ντα παρόλο σο μανγκένας τι ασταρέν-λες, νταρασάλε κατά τζενέ, σόσκε πακιάνας ότι ισί προφήτης.