Πράξεις ι Αποστολόνγκε
26 Ο Αγρίππας βακερντάς κο Παύλος: «Μουκχάσα-τουτ τι κερές λάφι για τι αρακχαβές το νεαυτός». Αζομάν ο Παύλος κερντάς πο βας οπρέ ντα βακερντάς ακαλά λάφια:
2 «Βασιλιά Αγρίππα, χαιρίναβα μπουτ σο ισινόμ αντιβές ανγκλά-τούτε για τι αρακχαβάβ μο νεαυτός σαρέ οντουλέ λαφίνταρ σο τσσουβένα μάνγκε ο Ιουδαίοι, 3 σόσκε τούι τζανέσα μπουτ λατσσές σαρέ ο έθιμα ι Ιουδαιόνγκε ντα καλέ πραγματένγκε χάνα-πες. Οτθάρ, μολίναβα-τουτ τι ασουνές-μαν με υπομονή.
4 »Μπουτ Ιουδαίοι τζανένα λατσσές σαρ τζουβντιάβας οτθάρ μπερί σο ισινόμας τερνό αντρέ μι λαόστε μέχρι σο αβιλόμ κι Ιερουσαλήμ. 5 Βον μπορίνενα άμα μανγκένα τι βακερέν ότι τζουβντιλόμ σαρ ο Φαρισαίοι, σο ο σικλιαριπέ λένγκο ισί ο πο πφαρό. 6 Όμως ακανά, δικάντιβαβα επειδή πακιάβα ότι ο Ντεβέλ κα κερέλ τι νικιόλ μπαγιά ο λάφι σο ντινάς αμαρέ παππουδέντε. 7 Άκ’ ανταβά πακιάνα αμαρέ 12 φάρες ντα μπεκλεντίνενα τι αβέλ-πες, οτθάρ-ντα να τσσιναβένα τι ντεν-λες άγια υπηρεσία ντισάρα ντα ιράτ. Ανταλέσκε ο Ιουδαίοι τσσουβένα μάνγκε λάφια σόσκε με-ντα πακιάβα-λες ανταβά, βασιλιά.
8 »Σόσκε ναστί πακιάνα ότι ο Ντεβέλ τζουβντιαρέλα μουλέν; 9 Με πακιάβας ότι έπρεπε τι κεράβ μπουτ πράγματα για τι τζαβ κόντρα κο Ιησούς κο Ναζωραίος. 10 Ντιπ ανταβά κερντόμ κι Ιερουσαλήμ, ντα τσσουντόμ μπουτέ αγιόν κο φυλακές, σόσκε μπουτσσαντέας-μαν ο μπαρέ ιερείς. Ντα κάνα ισινέ τι μουνταρέν-λεν, με-ντα συμφωνίναβας ανταλέσαρ. 11 Τιμωρίναβας-λεν μπουτ φαρ σαρέ κο συναγωγές, ντα κεράβας σο νακχέλας μι βαστένταρ για τι μουκχέν πουμαρί πίστη. Επειδή ναστί ατσσικιαράβας ι μπαρί χολί σο τθεράβας λένγκε, τζάβας λέντζαρ κόντρα ατζέ-ντα κο γιαβερά πόλεις.
12 »Σαρ τζάβας κι Δαμασκός ανταλέ πραγμάσκε σο μπουτσσαντέ-μαν ο μπαρέ ιερείς, 13 ντικχλόμ κο μεσημέρι κο ντρομ, βασιλιά, εκ φως πο μπαρό κατά κχαμ τι αβέλ κατά ουρανός ντα τι λελ-πες ντονταλάι μάνταρ ντα ντονταλάι ι μουρσένταρ σο ισινέ γιεκ μάντζαρ. 14 Πελάμ σαρέ τελέ, ντα αζομάν ασουντόμ κι εβραϊκή τσσιπ ακαλά λάφια: “Σαούλ, Σαούλ, σόσκε τζάσα μάντζαρ κόντρα; Το νεαυτός ντουκχαβέσα σο τζάσα μάντζαρ κόντρα”.* 15 Αζομάν με βακερντόμ: “Κον ισινάν, Κύριε;” Ντα ο Κύριος βακερντάς: “Ισινόμ ο Ιησούς, σο τζάσα λέσαρ κόντρα τούι. 16 Ίστι, όμως, ντα άτσσουβ τι πιντρέντε. Άκ’ σόσκε σικαντόμ-μαν τούκε, για τι τραμπίναβ-τουτ τι αβές μο υπηρέτης ντα τι βακερές κο τζενέ εμ οντουλά σο ντικχλάν μάνγκε εμ οντουλά σο κα κεράβ-τουτ τι ντικχές. 17 Ντα κα σώναβ-τουτ ακαλέ λαόσταρ ντα κατά τζενέ ι γιαβερέ τθεμένταρ σο μπουτσσαβάβα-τουτ λέντε 18 για τι πουτρές λένγκε γιακχά, τι λες-λεν κατά καρανίκι ντα τι ανές-λεν κο φως ντα κατά ζορ ι Μπενγκέσκι κο Ντεβέλ, ντα αντικάς τι συγχωρίντιβεν λένγκε αμαρτίες ντα τι λεν οντουβά σο ντέλα ο Ντεβέλ κο άγιοι αντράλ κατά πίστη σο τθερένα μάντε”.
19 »Οτθάρ, βασιλιά Αγρίππα, ντινόμ καν κο λάφια σο ασουντόμ κι φαντασία σο αβιλί κατά ουρανός. 20 Αντικάς, ασταρντόμ κατά Δαμασκός ντα σοράν γκιλόμ κι Ιερουσαλήμ ντα σαρί κι Ιουδαία ντα κο γιαβερά τθεμά ντα βακεράβας κο τζενέ τι μετανιώνεν, τι πακιάν κο Ντεβέλ ντα τι σικαβέν οντουλέντζαρ σο κερένα ότι μετανιωσάλε. 21 Άκ’ σόσκε ασταρντέ-μαν ο Ιουδαίοι κο ναός ντα γκιλέ τι μουνταρέν-μαν. 22 Όμως, ι Ντεβλέσκε βοηθειάσαρ, κεράβα λάφι μέχρι αντιβές εμ κο χουρντέ εμ κο μπαρέ ντα να βακεράβα τίποτα γιαβέρ, αλλά σάντε οντουλά σο βακερντέ ο Προφήτες ντα ο Μωυσής ότι κα αβένας-πες, 23 ότι ο Χριστός κα τσσίντελας μπουτ ντα κα αβέλας ο πρώτος σο κα ιστίλας κατά μεριπέ, ντα ότι κα σικαβέλας ο φως εμ ανταλέ λαόσκε εμ κο τζενέ σο ισί γιαβερέ τθεμένταρ».
24 Οτθέ σο βακερέλας-λεν ανταλά ο Παύλος για τι αρακχαβέλ πο νεαυτός, ο Φήστος βακερντάς ζουρανές: «Ισινάν ντινιλό, Παύλε! Ο μπουτ γράμματα ντινιαρντέ-τουτ!» 25 Ο Παύλος όμως βακερντάς: «Να ισινόμ ντινιλό, μπαρέα Φήστε, αλλά βακεράβα λάφια σο ισί μπαγιά ντα γκοντιαβέρ. 26 Ντα ο βασιλιάς σο κεράβα λέσαρ λάφι μπίνταρανες τζανέλα-λεν λατσσές σαρέ ανταλά. Ισινόμ σίγουρος ότι ντέλα σημασία σαρέ ανταλέ πραγματέντε, σόσκε τίποτα να αβιλό-πες αποτσοράλ. 27 Τούι πακιάσα κο Προφήτες, βασιλιά Αγρίππα; Τζανάβα ότι πακιάσα». 28 Ο Αγρίππας βακερντάς κο Παύλος: «Χάνικ ατζέ ντα κα κερές-μαν τι αβάβ Χριστιανός». 29 Αζομάν ο Παύλος βακερντάς: «Μολίναβα ι Ντεβλές, είτε ισί τι νακχέλ χάνικ βακίτι ατζέκ είτε μπουτ, εμ τούι εμ σαρέ οντουλά-ντα σο ασουνένα-μαν αντιβές τι αβέν σαρ μάντε, αλλά μα τι αβέν πφαντέ ανταλέ τζαντζιρίντζαρ».*
30 Αζομάν ο βασιλιάς ιστίντιλο, ντα ανταβά κερντέ ο Φήστος, η Βερνίκη ντα οντουλά σο μπεσένας λέντζαρ. 31 Ντα σαρ νασένας, βακερένας ο εκ ι γιαβερέσκε: «Ανταβά τζενό να κερέλα τίποτα για τι αξίνελ τι μερέλ ή τι τζαλ φυλακή». 32 Σοράν ο Αγρίππας βακερντάς κο Φήστος: «Ανταβά τζενό κα μπορίνελας τι νικιόλ κατά φυλακή άμα να μανγκλάας τι τζαλ κο Καίσαρας».