Πράξεις ι Αποστολόνγκε
23 Ο Παύλος ντικχλάς ο Σάνχεδριν* ντα βακερντάς: «Πφραλάλεν, μπορίναβα τι βακεράβ ότι, σαρέ κο πράγματα σο κερντόμ, μι συνείδηση* ισί ντιπ πάκι κο γιακχά κι Ντεβλέσκε μέχρι αντιβές». 2 Αζομάν ο αρχιερέας Ανανίας βακερντάς οντουλένγκε σο ισινέ πασέ λέστε τι νταπέν-λες κο μούι. 3 Ντα ο Παύλος βακερντάς λέσκε: «Τουτ, σο ισινάν ντουέ μουένγκο,* κα νταπέλ ο Ντεβέλ. Εμ μπεσέσα τι δικάνες-μαν αντικάς σαρ βακερέλα ο Νόμος εμ τζάσα κόντρα κο Νόμος κάνα βακερέσα τι νταπέν-μαν;» 4 Οντουλά σο ισινέ πασέ κο Παύλος βακερντέ: «Κο αρχιερέας κι Ντεβλέσκο βακερέσα ανταλά μπέτι λάφια;» 5 Ντα ο Παύλος βακερντάς: «Πφραλάλεν, να τζανάβας ότι ισί ο αρχιερέας. Σόσκε ισί γραμμέ: “Μα βάκερ μπέτι λάφια οντουλέσκε σο κερέλα κουμάντος τι λαός”».
6 Ο Παύλος αγαντάς ότι κο Σάνχεδριν* ισινέ εμ Σαδδουκαίοι εμ Φαρισαίοι ντα ντινάς βίκος: «Πφραλάλεν, με ισινόμ Φαρισαίος, τσσαβό Φαρισαιόνγκο. Πακιάβα ότι κα ιστίν ο μουλέ, οντουλέσκε-ντα δικάντιβαβα». 7 Επειδή βακερντάς-λες ανταβά, ο Φαρισαίοι ντα ο Σαδδουκαίοι χαλέ-πες, ντα αβιλί-πες διχόνοια. 8 Ο Σαδδουκαίοι να πακιάνα ότι κα ιστίν ο μουλέ ντα βακερένα ότι να υπαρχίντιβενα ούτε άγγελοι ούτε πνεύματα, αλλά ο Φαρισαίοι πακιάνα-λεν σαρέ ανταλά. 9 Οτθάρ, μπουτ λένταρ ντένας βίκος ζουρανές, ντα μερικοί γραμματείς κατά Φαρισαίοι ιστίντιλε ντα αρχισάλε τι χαν-πες μπουτ ακαλέ λαφίντζαρ: «Αμέν να αρακχάσα καέκ γκεραλό* πράγμας ανταλέ τζενέστε, αλλά άμα κερντάς λέσκε λάφι πνεύμας ή άγγελος—». 10 Κάνα χαλέ-πες ατζέ πο μπουτ, οντουβά σο κερέλας κουμάντος κο στρατός νταρασάλο μα τι κερέν κομμάτια ι Παυλός ντα ντινάς διαταγή κο στρατιώτες τι γουλίν, τι καπτίνεν-λες οτθάρ αντράλ ντα τι ανέν-λες οτθέ σο μπεσένας ο στρατιώτες.
11 Ι γιαβέρ ιράτ ο Κύριος ατσσιλό πασέ λέστε ντα βακερντάς: «Μα ντάρα! Επειδή σαρ μουτθαβέσα ντιπ λατσσές μάνγκε κι Ιερουσαλήμ, αντικάς πρέπει τι κερές κι Ρώμη-ντα».
12 Κάνα ντισιλό, ο Ιουδαίοι κερντέ-πες λάφι για τι μουνταρέν ι Παυλός ντα χαλέ σοβέλ μα τι τσσουβέν πουμαρέ μόστε ούτε χαμπέ ούτε πανί μέχρι τι κερέν-λες ανταβά. 13 Σαράντα μουρσά ντα πο μπουτ χαλέ ανταγιά σοβέλ. 14 Βον γκιλέ κο μπαρέ ιερείς ντα κο πρεσβύτεροι ντα βακερντέ: «Χαλάμ σοβέλ μα τι τσσουβάς ιτς χαμπέ αμαρέ μόστε μέχρι τι μουνταράς ι Παυλός. 15 Ακανά τουμέν ντα ο Σάνχεδριν* βακερέν οντουλέσκε σο κερέλα κουμάντος κο στρατός τι γουλιαρέλ-λες τουμέντε, επειδή μανγκένα χάι τι ρόντεν πο λατσσές σο αβιλό-πες λέσαρ. Ντα πριν ατζέ τι ερεσέλ, αμέν κα αβάς έτοιμοι τι μουνταράς-λες».
16 Όμως, ι Παυλόσκε πφενιάκο τσσαβό ασουντάς σο ετοιμάνενας τι κερέν ντα γκιλό οτθέ αντρέ σο μπεσένας ο στρατιώτες ντα βακερντάς-λες κο Παύλος. 17 Αζομάν, ο Παύλος ντινάς βίκος εκχέ αρχηγός ι στρατόσκο ντα βακερντάς: «Γκερ ι τερνές οντουλέστε σο κερέλα κουμάντος, σόσκε τθερέλα τι βακερέλ λέσκε κάτι». 18 Οτθάρ, βοβ γκερντάς-λες λέστε ντα βακερντάς: «Ο Παύλος, σο ισί πφαντό ατθέ, ντινάς-μαν βίκος ντα μανγκλάς μάνταρ τι ανάβ τούκε ακαλέ τερνές, σόσκε τθερέλα τι βακερέλ τούκε κάτι». 19 Οντουβά σο κερέλας κουμάντος ασταρντάς-λες κατά βας, λιντάς-λες χάνικ πο οκόρινγκ ντα πουτσλάς-λες: «Σο τθερέσα τι βακερές μάνγκε;» 20 Βοβ βακερντάς: «Ο Ιουδαίοι κερντέ-πες λάφι για τι μανγκέν τούταρ τι γουλιαρές ι Παυλός κο Σάνχεδριν* γιαβίν, επειδή μανγκένα χάι τι σικλιόν πο λατσσές σο αβιλό-πες λέσαρ. 21 Αλλά τούι μα τι ασουνές-λεν, σόσκε 40 μουρσά λένταρ ντα πο μπουτ μπεσένα λέσκε ντα χαλέ σοβέλ μα τι τσσουβέν πουμαρέ μόστε ούτε χαμπέ ούτε πανί μέχρι τι μουνταρέν-λες. Ντα ακανά ισί έτοιμοι ντα μπεσένα διαταγή τούταρ». 22 Οτθάρ, οντουβά σο κερέλας κουμάντος μουκχλάς ι τερνές τι νασέλ ντα ντινάς-λες εντολή: «Μα βάκερ καεκχέσκε ότι βακερντάν-λες μάνγκε ανταβά».
23 Ντα ντινάς βίκος ντουέ αρχηγόν ι στρατόσκε ντα βακερντάς: «Ετοιμάνεν πασέ 9:00 αρατί* 200 στρατιωτέν για τι τζαν κι Καισάρεια, 70 μουρσέν γκραστέντζαρ ντα 200 μουρσέν μπαρέ καστέντζαρ.* 24 Ντα αρακχέν γκραστέν για τι αβέλ αρακχαντό ο Παύλος καζόμ τζάλα κο Φήλικας σο κερέλα κουμάντος». 25 Ντα γραφιντάς ακαβά γράμμας:
26 «Ο Κλαύδιος Λυσίας κο Φήλικας σο ισί μπαρό: Τι αβές λατσσές! 27 Ανταλέ μουρσές ασταρντέ-λες ο Ιουδαίοι ντα τζάνας τι μουνταρέν-λες, αλλά με τθαβντισάλομ μι στρατιωτέντζαρ ντα σωντόμ-λες, σόσκε σικλιλόμ ότι ισί Ρωμαίος. 28 Ντα επειδή μανγκάβας τι σικλιάβ σόσκε κατηγορίνενας-λες, γουλιαρντόμ-λες κο Σάνχεδριν.* 29 Σικλιλόμ ότι κατηγορίνενας-λες πραγματένγκε σο ισί λένγκε Νομόστε. Αλλά να κερντάς κάτι για τι μερέλ ή τι τζαλ φυλακή. 30 Όμως, επειδή λιντόμ αμπέρι ότι τθερένα πουμαρέ γκοντιάτε τι μουνταρέν-λες, μπουτσσαβάβα-λες σουγκό τούτε ντα ντάβα διαταγή οντουλέντε σο κατηγορίνενα-λες τι βακερέν-λεν ανταλά ανγκλά-τούτε».
31 Αντικάς, ο στρατιώτες λιντέ ι Παυλός, σαρ ντινάς-λεν εντολή οντουβά σο κερέλας κουμάντος, ντα αντέ-λες αρατί κι Αντιπατρίδα. 32 Ο γιαβέρ ντιβές μουκχλέ ι μουρσέν ι γκραστέντζαρ τι τζαν λέσαρ, αλλά βον βουρτισάλε οτθέ σο μπεσένας. 33 Ο μουρσά ι γκραστέντζαρ γκιλέ αντρέ κι Καισάρεια, ντινέ ο γράμμας κο Φήλικας ντα μουκχλέ ι Παυλός λέσκε βαστέντε. 34 Βοβ διαβαντάς ο γράμμας, πουτσλάς-λες κατάρ ισινέ ντα σικλιλό ότι ισινέ κατά Κιλικία. 35 «Κα ασουνάβ-τουτ ντιπ λατσσές», βακερντάς, «κάνα κα ερεσέν οντουλά σο κατηγορίνενα-τουτ». Ντα ντινάς εντολή τι αρακχαβέν-λες κο παλάτι κι Ηρωδίσκο.