Πράξεις ι Αποστολόνγκε
24 Παντς ντιβεσά πο σοράν γουλίστιλε ο αρχιερέας Ανανίας, μερικοί πρεσβύτεροι ντα εκ δικηγόρος σο βακέρντιβελας Τέρτυλλος για τι κατηγορίνεν ι Παυλός ανγκλάλ κο Φήλικας. 2 Κάνα βακερντέ κο Τέρτυλλος τι κερέλ λάφι, αρχισάλο τι κατηγορίνελ-λες ακαλέ λαφίντζαρ:
«Επειδή τούταρ τθεράσα μπαρί ειρήνη ντα κερέσα κουμάντος λατσσές, ανταβά λαός τζάλα ανγκλάλ. 3 Πάντα βακεράσα κάι-ντα τι αβάς καζόμ μπουτ εκτιμίνασα σαρέ ανταλά πράγματα, μπαρέα Φήλικα. 4 Αλλά για μα τι λαβ τούταρ πο μπουτ σαάτι, μολίναβα-τουτ τι ασουνές-αμέν χάνικ άμα μανγκέσα. 5 Αγαντάμ ότι ανταβά μουρς ανέλα μπαρέ μπελιάδες, σόσκε κερέλα σαρέ ι Ιουδαιόν σαρί κι πφουβ τι τζαν κόντρα κο μπαρέ σορέ, ντα αντάς ανταγιά νεβί θρησκεία σο τθερένα ο Ναζωραίοι. 6 Γκιλό ατζέ-ντα τι μαγαρίνελ ο ναός ντα ασταρντάμ-λες. 7 —— 8 Κάνα κα πουτσές-λες τούι, κα αγαβές ντιπ λατσσές σαρέ οντουλά σο βακεράσα τούκε».
9 Αζομάν κατηγοριντέ-λες εμ ο Ιουδαίοι ντα βακερντέ ότι αντικάς ισινέ ο πράγματα. 10 Κάνα ο Φήλικας μουκχλάς ι Παυλός τι κερέλ λάφι, βοβ βακερντάς:
«Τζανάβα λατσσές ότι ισινάν κριτής ανταλέ λαόστε μπουτ μπρεσά, οτθάρ χαιρίναβα σο κα κεράβ λάφι ανγκλά-τούτε μάνγκε. 11 Μπορίνεσα τι πουτσές ντα τι αγαβές ότι να νακχλέ πο μπουτ από 12 ντιβεσά οτθάρ μπερί σο γκιλόμ κι Ιερουσαλήμ για τι νταβ λατρεία. 12 Ντα να αρακχλέ-μαν τι χαβ-μαν λαφίντζαρ καεκχέσαρ κο ναός ή τι ανάβ βαβούρα, ούτε κο συναγωγές ούτε σαρί κι πόλη. 13 Ντα βον ναστί σικαβένα τούκε ότι ο λάφια σο βακερένα μάνγκε ακανά ισί μπαγιά. 14 Αλλά μουτθαβάβα τούκε ότι ανταλέ ντρομέστε, σο βακερένα βον ότι ισί νεβί θρησκεία, αντικάς ντάβα άγια υπηρεσία κο Ντεβέλ μι παππουδένγκο ντα πακιάβα σαρέ οντουλά σο βακερέλα ο Νόμος ντα ισί γραμμέ κο Προφήτες. 15 Ντα τθεράβα ελπίδα* κο Ντεβέλ, σο τθερένα-λα βον-ντα, ότι κα ιστίν κατά μεριπέ εμ ο δίκαιοι εμ ο άδικοι. 16 Οτθάρ, μαράβα-μαν κάθε ντιβές για τι τθεράβ πάκι μι συνείδηση* κο γιακχά κι Ντεβλέσκε ντα κι τζενένγκε. 17 Ντα σοράν μπουτέ μπρεσένταρ, αβιλόμ τι κεράβ λατσσιπέ ι τσορορένγκε μι λαόστε ντα τι νταβ θυσίες κο Ντεβέλ. 18 Καζόμ κεράβας ανταλά πράγματα, αρακχλέ-μαν κο ναός τι αβάβ πάκι σαρ βακερέλα ο Νόμος, όμως να ισινέ ντονταλάι μάνταρ μπουτ τζενέ ντα να ανάβας βαβούρα. Μερικοί Ιουδαίοι κατά Ασία* 19 έπρεπε τι αβέν ακατέ ανγκλά-τούτε για τι κατηγορίνεν-μαν άμα μπαγιά τθερένα κάτι μάντζαρ. 20 Ή, ανταλά σο ισί ακατέ τι βακερέν σο λάθος αρακχλέ μάντε κάνα ατσσιλόμ ανγκλάλ κο Σάνχεδριν,* 21 εκτός ακαλέ εκχέ πραγμάσταρ σο βακερντόμας βικόσαρ κάνα ισινόμας οτθέ λέντζαρ: “Πακιάβα ότι κα ιστίν ο μουλέ, οντουλέσκε-ντα δικάντιβαβα αντιβές ανγκλά-τουμέντε!”»
22 Όμως, ο Φήλικας τζανέλας λατσσές ο πράγματα σο τθερένας τι κερέν ι Ντεβλέσκε Ντρομέσαρ, οτθάρ μουκχλάς-λες ανταβά για πο σοράν ντα βακερντάς: «Κάνα κα αβέλ ο Λυσίας σο κερέλα κουμάντος κο στρατός, αζομάν κα ντικχάβ σο κα αβέλ-πες τουμέντζαρ». 23 Ντα ντινάς εντολή κο αρχηγός κι στρατόσκο τι αρακχαβέν-λες για μα τι νασέλ αλλά τι μουκχέν-λες τι κερέλ κάποια πράγματα ντα τι αβέν ο αμαλά* λέσκε για τι ντεν-λες σο τθερέλα ανάγκη.
24 Χάνικ ντιβεσά πο σοράν αβιλό ο Φήλικας ντα λέσκι ρομνί η Δρουσίλλα, σο ισινέ Ιουδαία, ντα ο Φήλικας ντινάς βίκος ι Παυλός ντα ασουνέλας-λες καζόμ ο Παύλος ντέλας-λες τι αγαβέλ σο μανγκέλα τι βακερέλ τι πακιάλ εκ τζενό κο Χριστός Ιησούς. 25 Αλλά κάνα ο Παύλος βακερέλας καλά πράγματα ισί δίκαια ντα ότι ο τζενέ πρέπει τι ατσσικιαρέν πουμαρό νεαυτός ντα ότι ο Ντεβέλ κα κρίνελ ι τζενέν, ο Φήλικας νταρασάλο ντα βακερντάς: «Τζα τούκε ακανά, ντα κάνα κα αρακχάβ ευκαιρία κα νταβ-τουτ βίκος πάλι». 26 Ντα πακιάλας ότι ο Παύλος κα ντέλας-λες λοβέ. Οτθάρ, ντέλας-λες βίκος ατζέ πο μπουτ φαρ ντα κερέλας λέσαρ λάφι. 27 Αλλά ντούι μπρεσά πο σοράν, ο Πόρκιος Φήστος λιντάς ι θέση σο τθερέλας ο Φήλικας. Ντα επειδή ο Φήλικας μανγκέλας τι κερέλ ο γκι ι Ιουδαιόνγκο, μουκχλάς ι Παυλός κι φυλακή.