Πράξεις ι Αποστολόνγκε
27 Κάνα λιντιλί η απόφαση τι νασάς καραβίσαρ για τι τζας κι Ιταλία, ντινέ ι Παυλός ντα γιαβερέ φυλακισμέ τζενέν κο Ιούλιος. Βοβ ισινέ αρχηγός ι στρατόσκο κατά ομάδα ι Καισαράσκι.* 2 Τσσουντάμ-αμέν εκχέ καραβίστε κατά Αδραμύττιος σο κα τζάλας μπερεκέτι λιμανίντε κι Ασία* ντα νασλάμ. Αμέντζαρ ισινέ ο Αρίσταρχος, εκ Μακεδόνας κατά Θεσσαλονίκη. 3 Ο γιαβέρ ντιβές γουλίστιλαμ κι Σιδώνα, ντα ο Ιούλιος σικαντάς λατσσιπέ κο Παύλος ντα μουκχλάς-λες τι τζαλ πι αμαλέντε* για τι φροντίνεν-λες.
4 Κάνα νασλάμ οτθάρ, γκιλάμ πασέ κι Κύπρος για τι αβάς αρακχαντέ κατά μπαρμπαλιά σο πφούντενας κόντρα αμέντε. 5 Σοράν νακχαντάμ ι Κιλικία ντα ι Παμφυλία ντα τσσουντάμ-αμέν κο λιμάνι κο Μύρα σο ισί κι Λυκία. 6 Οτθέ ο αρχηγός ι στρατόσκο αρακχλάς εκ καράβι κατά Αλεξάνδρεια σο τζάλας κι Ιταλία, ντα βακερντάς αμένγκε τι τσσουβάς-αμέν ανταλέστε. 7 Σοράν, τσσίνταας πφαρές μπερεκέτι ντιβεσά ντα ερεσλάμ ζορίσαρ κι Κνίδος. Αλλά η μπαρμπάλ να μουκχέλας-αμέν τι συνεχίνας, οτθάρ γκιλάμ πασέ κι Κρήτη κι Σαλμώνη για τι αβάς αρακχαντέ κατά μπαρμπαλιά. 8 Παρόλο σο να γκιλάμ μπουτ αντρέ κι ντεριάβ, ιτιρί κατά μπαρμπάλ ερεσλάμ ζορίσαρ εκχέ τθανέστε σο βακέρντιβελας Καλοί Λιμένες, πασέ κι πόλη Λασαία.
9 Νακχλόας μπουτ βακίτι ντα ισινέ μπαρί νταρ ο ταξίδια κι ντεριάβ, σόσκε μπιτισάλιας η νηστεία-ντα σο κερένας πασέ κο βεν. Οτθάρ, ο Παύλος βακερντάς: 10 «Μουρσάλεν, σαρ ντικχάβα, νανέ λατσσό τι νασάς, σόσκε κα αβέλ-πες μπαρό ζιάνι ντα να κα χασάρντιβελ σάντε ο καράβι ντα ο πράγματα σο ισί λέστε, αλλά αμαρί ζωή-ντα».* 11 Αλλά ο αρχηγός ι στρατόσκο ασουνέλας σο βακερέλας ο καπετάνιος ντα οντουβά σο τθερέλας ο καράβι ντα να ασουνέλας ι Παυλός. 12 Αφού ο λιμάνι να ισινέ λατσσό για τι νακχέν ο βεν οτθέ, ο πο μπουτ βακερντέ τι νασέν ντα τι ντικχέν άμα αβέλας-πες τι νακχέν ο βεν κο Φοίνικας, εκχέ λιμανίστε κι Κρήτη σο ντικχέλα οτθέ σο νικιόλα ο κχαμ.
13 Κάνα πφουντιντάς εκ ήρεμη μπαρμπάλ,* αμντίνενας ότι κα ερεσένας οτθέ σο μανγκένας. Οτθάρ, βαντιντέ ι άγκυρα ντα ατσσόνας ι καραβίσαρ πασέ κι Κρήτη ντα να τζάνας μπουτ αντρέ κι ντεριάβ. 14 Χάνικ πο σοράν όμως πφουντιντάς εκ μπουτ ζουρανί μπαρμπάλ σο βακέρντιβελας Ευρακύλωνας.* 15 Ανταγιά μπαρμπάλ νταπέλας ζουρανές ο καράβι ντα ναστί τσσίντελας κόντρα λάτε, οτθάρ μουκχλάμ-αμέν ντα λέλας-αμέν εκ ακατάρ εκ οκουτάρ. 16 Σοράν, γκιλάμ πασέ εκχέ χουρντέ νησίστε σο βακέρντιβελας Καύδα ντα οτθέ ισινάμας αρακχαντέ κατά μπαρμπάλ. Αλλά ατσσικιαρντάμ ι βάρκα* σο ισινέ παλάλ κο καράβι παρόλο σο ζορισάλαμ μπουτ. 17 Κάνα βαντιντέ-λα οπρέ, πφαντέ ο καράβι τελάλ μπαρέ σολέντζαρ, ντα επειδή νταρένας μα τι μπεσέλ ο καράβι κο κούμι* σο ισινέ κι Σύρτη,* γουλιαρντέ ο καστά ντα ο σολέ σο ασταρένας ο μπαρέ κοτορά* ι καραβίσκε. Οτθάρ, η μπαρμπάλ λέλας ο καράβι εκ ακατάρ εκ οκουτάρ. 18 Επειδή η μπαρμπάλ ισινέ μπουτ ζουρανί, ο γιαβέρ ντιβές αρχισάλε τι φουρτίνεν πράγματα για τι λοκχιόλ ο καράβι. 19 Ντα κο τρίτος ντιβές, φουρτιντέ πουμαρέ βαστέντζαρ μερικά κατά σολέ ι καραβίσκε.
20 Να ντικχλάμ ο κχαμ ντα ο τσεργανιά μπουτ ντιβεσά, ντα η ζουρανί μπαρμπάλ να τσσιναβέλας τι νταπέλ-αμέν, οτθάρ ντικχίντιβελας ότι να τθεράας καέκ ελπίδα τι τζουβντιάς. 21 Κάνα ατσσιλέας μπουτ ντιβεσά μποκχαλέ, ο Παύλος ιστίντιλο ανγκλά-λέντε ντα βακερντάς: «Μουρσάλεν, άμα κα ασουνένας-μαν ντα να κα νασένας κατά Κρήτη, να κα αβέλας-πες τουμένγκε ανταβά ζιάνι ντα να κα φουρτίναας-λεν σαρέ ανταλά κι ντεριάβ. 22 Ακανά όμως μα νταρέν, σόσκε ούτε εκ τανό* τουμένταρ να κα χασάρντιβελ αλλά σάντε ο καράβι. 23 Ανταγιά ιράτ ο Ντεβέλ, σο ισινόμ λέσκο ντα ντάβα-λες άγια υπηρεσία, μπουτσσαντάς εκχέ αγγελός σο ατσσιλό πασέ μάντε 24 ντα βακερντάς: “Μα ντάρα, Παύλε. Πρέπει τι ατσσός ανγκλάλ κο Καίσαρας, ντα ο Ντεβέλ μάξους τούκε κα σώνελ σαρέ οντουλέν σο ισί κο καράβι τούσαρ”. 25 Οτθάρ, μα νταρέν, σόσκε πακιάβα ότι ο Ντεβέλ κα κερέλ ντιπ οντουβά σο βακέρντιλο μάνγκε. 26 Όμως, ο καράβι κα βουλιάνελ εκχέ νησίστε».
27 Κάνα ισινάμας 14 ντιβεσά κι Αδριατική Ντεριάβ σο πφούντελας ζουρανί μπαρμπάλ, αντρέ κι ιράτ νακχλό λένγκε γκοντιάταρ ότι ο καράβι κα ερεσέλας αβρί κατά ντεριάβ. 28 Γκιντέ καζόμ αχόρτ ισινέ ο πανί ντα αρακχλέ ότι ισινέ πασέ 36 μέτρα.* Χάνικ πο τελέ γκιντέ πάλι ντα αρακχλέ ότι ισινέ πασέ 27 μέτρα.* 29 Ντα επειδή νταρένας μα τι περάς κο βράχια, περαντέ σταρ άγκυρες παλάλ ντα μολίνενας τι ντισιόλ. 30 Αλλά οντουλά σο κερένας μπουτί κο καράβι γκιλέ τι νασέν ντα γουλιαρένας ι βάρκα κι ντεριάβ ντα βακερένας ότι μανγκένας χάι τι περαβέν άγκυρες ανγκλάλ. 31 Αζομάν ο Παύλος βακερντάς κο αρχηγός κι στρατόσκο ντα κο στρατιώτες: «Άμα βον να κα ατσσόν κο καράβι, τουμέν ναστί κα σώντιβεν». 32 Αζομάν ο στρατιώτες τσσιντέ ο σολέ ι βαρκάκε ντα μουκχλέ-λα τι περέλ.
33 Χάνικ πριν τι ντισιόλ, ο Παύλος μανγκλάς σαριλένταρ τι χαν ντα βακερντάς λένγκε: «Αντιβές πφάντενα 14 ντιβεσά σο εμ μπεκλεντίνενα ντα ισινέν πφερντέ νταρ εμ ατσσιλέν ντιπ μποκχαλέ. 34 Οτθάρ, βακεράβα τουμένγκε τουμαρέ λατσσιμάσκε τι χαν κάτι, σόσκε να κα χασάρντιβελ ούτε εκ μπαλ καεκχέσκε σορέσταρ». 35 Κάνα βακερντάς-λεν ανταλά, λιντάς εκ μαντρό, κερντάς εκ προσευχή ανγκλάλ σαριλέντε για τι βακερέλ ευχαριστώ κο Ντεβέλ, πφανγκλάς-λες ντα αρχισάλο τι χαλ. 36 Αντικάς, σαρέ λιντέ κουράγιος ντα αρχισάλε τι χαν βον-ντα. 37 Σαρέ γιεκ ισινάμας 276 τζενέ* κο καράβι. 38 Κάνα τσαλιλέας, φουρτιντέ ο γκιβ κι ντεριάβ για τι λοκχιόλ ο καράβι.
39 Κάνα ντισιλό, ναστί αγαβένας καλέ τθανέστε ισινέ, αλλά ντικχένας εκ παραλία κουμίσαρ ντα βακερντέ τι νικαβέν οτθέ αβρί ο καράβι, άμα αβέλας-πες. 40 Οτθάρ, τσσιντέ ο άγκυρες ντα μουκχλέ-λεν τι περέν κι ντεριάβ ντα πουταρντέ ο σολέ-ντα σο ατσσικιαρένας ο τιμόνια. Ντα βαντιντέ ο ανγκλαϊνό μπαρό κοτόρ* ι καραβίσκο για τι γκερέλ-λες η μπαρμπάλ κάρινγκ κι παραλία. 41 Όμως, κάνα πελέ εκχέ τθανέστε σο ισινέ μπουτ κούμι τελάλ κατά πανί, ο καράβι ατσσιλό οτθέ ντα κολλισάλο ανγκλάλ ντα να κουνιάντιβελας, αλλά ο κύματα νταπένας-λες ζουρανές παλάλ ντα πφανγκένας-λες. 42 Αζομάν ο στρατιώτες βακερντέ τι μουνταρέν ι φυλακισμέ τζενέν για μα τι περέλ καέκ αντρέ κι ντεριάβ ντα τι νασέλ. 43 Αλλά ο αρχηγός ι στρατόσκο μανγκέλας τι ατσσικιαρέλ τζουβντό ι Παυλός σο-ντα τι αβέλας-πες ντα να μουκχλάς-λεν τι κερέν οντουβά σο τθερένας πουμαρέ γκοντιάτε. Ντινάς διαταγή οντουλέντε σο τζανένας μπάνιος τι περέν αντρέ κι ντεριάβ ντα τι νικιόν αβρί πο σουγκό, 44 ντα κο γιαβερά τι τζαν παλά-λέντε, μερικοί οπράλ καστέντε ντα γιαβερά οπράλ κο κομμάτια κι καραβίσκε. Ντα αντικάς ερεσλέ σαρέ τζουβντέ αβρί.