Ο Ντεβέλ Ευλογίνελα τον Αβραάμ ντα Λέσκι Φαμιλί

Ο ΙΕΧΩΒΑ τζανέλας ότι κα αβέλας ο ντιβές σο κα ταλαιπωρίνενας ντα κα μουνταρένας Οντουλές σο μανγκέλας πιο μπουτ σαριλένταρ. Παλάλ κατά προφητεία σο ισί γραμμέ κο εδάφιος Γένεση 3:​15 γκεράντιβελας ανταγιά αλήθεια. Μπορίνελας τι κερέλ ο Ντεβέλ ι τζενέν τι αγαβέν καζόμ κα πφαμπόλας λέσκο γκι όταν κα ντικχέλας τι μουνταρέν οντουλές σο μανγκέλας πιο μπουτ σαριλένταρ; Η Αγία Γραφή βακερέλα αμένγκε εκ παράδειγμας για τι μπορίνας τι αγαβάς-λες. Ο Ντεβέλ μανγκλάς κατά Αβραάμ τι θυσιάνελ πι αγαπημέ τσσαβές, τον Ισαάκ.

Ο Αβραάμ τθερέλας μπαρί πίστη. Ντεν-τουμέν γκοντί ότι ο Ντεβέλ βακερντάας λέσκε ότι Οντουβά σο κα μπουτσσάντιβελας για τι ελευθερώνελ ι τζενέν, ή γιαβέρτουλους ο Προσάγγονος, κα αστάρντιβελας κατά Ισαάκ. Επειδή τθερέλας εμπιστοσύνη κο Ντεβέλ ότι κα ανέλας πάλι κι ζωή τον Ισαάκ αν κα χρειαζίντιβελας, ο Αβραάμ ασουντάς ντα ισινέ έτοιμος τι θυσιάνελ πι αγαπημέ τσσαβές. Αλλά εκ άγγελος σο μπουτσσάντιλο κατά Ντεβέλ σταματιντάς-λες χάνικ πριν τι κερέλ-λες. Για τι σικαβέλ ότι εκτιμιντάς τον Αβραάμ επειδή ισινέ έτοιμος τι ντελ πι τσσαβές, ο Ντεβέλ ξαναβακερντάς ο υποσχέσεις σο ντινάας οντουλέ πιστέ τζενέστε.

Αφού νακχλέ μερικά μπρεσά, ο Ισαάκ κερντάς ντουέ τσσαβέν, τον Ησαύ ντα τον Ιακώβ. Ο Ιακώβ ευλογισάλο επειδή να ισινέ σαρ ο Ησαύ σο να εκτιμίνελας ο πνευματικά πράγματα. Ο Ντεβέλ αλλαντάς ο ναβ του Ιακώβ ντα κερντάς-λες Ισραήλ, ντα ο 12 τσσαβέ του Ισραήλ αβιλέ αρχηγοί κο φάρες του λαού Ισραήλ. Αλλά σαρ αβιλό αζόμ μπαρό λαός οντιά φαμιλί;

Σαρέ ανταλά ξεκινισάλε όταν ο πιο μπουτ οντουλέ τσσαβένταρ αρχισάλε τι ζηλίνεν πουμαρέ χουρντέ πφραλές, τον Ιωσήφ. Μπικιντέ-λες σαρ δούλος ντα τελικά οντουλά σο κιντέ-λες γκερντέ-λες κι Αίγυπτος. Ο Ντεβέλ, όμως, ευλογιντάς οντουλέ πιστέ ντα τερνέ τσσαβές σο τθερέλας θάρρος. Ο Ιωσήφ νακχλάς μπουτ ταλαιπωρίες, αλλά κο τέλος τραμπιντάς-λες ο Φαραώ, ο βασιλιάς της Αιγύπτου, για τι ντελ-λες μπαρί εξουσία. Ανταβά αβιλό-πες κι πιο σωστή στιγμή, επειδή οτθέ σο μπεσέλας ο Ιακώβ πελί μπουτ μποκχ ντα αντικάς ο Ιακώβ μπουτσσαντάς κάποιε πι τσσαβένταρ κι Αίγυπτος για τι κινέν πράγματα τι χαν​—ντα ο Ιωσήφ, σαρ αγαντίντιλο σοράν, ισινέ υπεύθυνος κο πράγματα σο ισινέ χαμάσκε! Μετά από εκ συγκινητική συνάντηση πι πφραλέντζαρ σο μετανιωσάλεας, ο Ιωσήφ συγχωριντάς-λεν ντα κανονιντάς τι αβέλ σαρί λέσκι φαμιλί κι Αίγυπτος. Ντινέ-λεν εκ μπουτ σουκάρ τθαν, σο οτθέ μπορίνενας τι συνεχίνεν τι αβγατίντιβεν ντα τι τζουβντιόν λατσσές. Ο Ιωσήφ αγαντάς ότι ο Ντεβέλ αντάς ο πράγματα αντικάς σαρ τθερέλας πι γκοντιάτε, για τι μπορίνεν τι αβέν μπαγιά οντουλά σο βακερντάας.

Ο Ιακώβ, σο ισινέ πφουρό, νακχλάς πο υπόλοιπα μπρεσά κι Αίγυπτος, γιεκ πι φαμιλιάσαρ σο αζόμ τζάλας ντα μπαριόλας. Χάνικ πριν τι μερέλ, βακερντάς ότι ο Προσάγγονος σο βακερντάας ο Ντεβέλ ότι κα αβέλας, ή γιαβέρσοϊ Οντουβά σο κα ελευθερώνελας ι τζενέν, κα αβέλας ζουρανό Βασιλιάς ντα κα αστάρντιβελας κατά Ιούδας, εκ κατά τσσαβέ σο τθερέλας ο Ιακώβ. Μετά από μπρεσά, πριν τι μερέλ ο Ιωσήφ-ντα, βακερντάς ότι κα αβέλας εκ ντιβές σο κα νικαβέλας ο Ντεβέλ ι φαμιλί του Ιακώβ κατά Αίγυπτος.

​—Στηρίντιβελα κο βιβλίος Γένεση, κεφάλαια 20 μέχρι 50, ντα κο εδάφια Εβραίους 11:​17-22.