Σόσκε Πρέπει τι Συνεχίνεν;

1. Σαρ κα βοηθίντιβεν αν κα συνεχίνεν τι κερέν τουμαρί μελέτη;

Σίγουρα, ανταλά σο ντικχλέν κατά Αγία Γραφή κερντέ τουμαρί αγάπη ι Ντεβλέσκε ζουρανί, αλλά τουμέν πρέπει τι συνεχίνεν τι μπαριαρέν ι αγάπη σο τθερένα λέσκε. (1 Πέτρου 2:2) Ισί τουμαρέ βαστέντε αν κα συνεχίνεν τι πλησιάνεν ι Ντεβλές ντα τι διαβάνεν ι Γραφή για τι τθερέν ι ελπίδα τι τζουβντιόν για πάντα.​—Διαβάνεν Ιωάννης 17:3· Ιούδα 21.

Καζόμ πιο μπουτ σικλιόνα ι Ντεβλέσκε, αζόμ πιο μπουτ κα μπαριόλ τουμαρί πίστη ντα κα κερέν-λες τι χαιρίνελ. (Εβραίους 11:1, 6) Η ζουρανί πίστη κα βοηθίνελ-τουμέν τι μετανιώνεν οντουλένγκε σο κερντέν ντα τι κερέν τουμαρί ζωή πιο λατσσί.​—Διαβάνεν Πράξεις 3:19.

2. Αφού σικλιλέν αζόμ μπουτ πράγματα ι Ντεβλέσκε, σαρ μπορίνενα τι βοηθίνεν ι γιαβερέν;

Σίγουρα, κα μανγκέν τι βακερέν γιαβερτθέ-ντα οντουλά σο σικλιλέν, επειδή σαρέ μπεϊντίνασα τι βακεράς λατσσέ αμπέρια. Αφού συνεχίνενα τι κερέν μελέτη κατά Γραφή, κα σικλιόν σαρ τι χρησιμοποιήνεν-λα για τι εξηγίνεν τουμαρί πίστη ντα τι βακερέν ο λατσσέ αμπέρια ι Ντεβλέσκε.​—Διαβάνεν Ρωμαίους 10:13-15.

Ο πιο μπουτ τζενέ βακερένα ο λατσσέ αμπέρια πρώτα πουμαρέ τζενέντε ντα πουμαρέ φιλόντε. Πρέπει τι αβέν διακριτικοί, δηλαδή τι σκεφτίνεν μπουτ σο βακερένα ντα σαρ βακερένα-λες. Μα βακερέν ότι λένγκι θρησκεία ισί ψεύτικη, αλλά βακερέν οντουλένγκε σο κα κερέλ ο Ιεχωβά ατζεχάνικ. Επίσης, κάτι γιαβέρ σο πρέπει τι ντεν-τουμέν γκοντί ισί ότι ο πιο μπουτ τζενέ ντικχένα οντουλά σο κερένα τουμέν ντα όχι οντουλά σο βακερένα.​—Διαβάνεν 2 Τιμόθεο 2:24, 25.

3. Σο σχέση μπορίνενα τι τθερέν ι Ντεβλέσαρ;

Καζόμ μελετίνενα ι Αγία Γραφή, αζόμ πιο μπουτ μπαριόλα τουμαρί πίστη. Τελικά, μπορίνενα τι τθερέν εκ μπουτ ζουρανί φιλία ι Ντεβλέσαρ. Μπορίνενα τι αβέν λέσκε φαμιλιάτε.​—Διαβάνεν 2 Κορινθίους 6:18.

4. Σαρ κα συνεχίνεν τι μπαριαρέν τουμαρί πίστη;

Κα μπαριαρέν τουμαρί πίστη άμα κα συνεχίνεν τι κερέν μελέτη κατά Αγία Γραφή. (Εβραίους 5:13, 14) Μανγκέν από εκ Μάρτυρας του Ιεχωβά τι κερέλ μελέτη τουμέντζαρ κατά βιβλίος Σο Μπορίνελα τι Σικλιαρέλ-αμέν η Αγία Γραφή; Καζόμ πιο μπουτ σικλιόνα κατά Αγία Γραφή, αζόμ πιο μπουτ ευτυχισμέ κα αβέλ τουμαρί ζωή.​—Διαβάνεν Ψαλμός 1:1-3· 73:27, 28.

Ο Ιεχωβά, σο ισί ο ευτυχισμέ Ντεβέλ, ντινάς-αμέν ο λατσσέ αμπέρια. Μπορίνενα τι πλησιάνεν-λες πιο μπουτ αν πλησιάνενα λέσκο λαός. (Εβραίους 10:24, 25) Αν κα προσπαθίνεν τι ευχαριστίνεν συνέχεια ι Ντεβλές, κα τθερέν ι πραγματική ζωή​—εκ ζωή σο κα τζουβντιόν για πάντα. Ο πιο λατσσό σο μπορίνενα τι κερέν ακανά ισί τι πλησιάνεν ι Ντεβλές.​—Διαβάνεν 1 Τιμόθεο 1:11· 6:19.