Ο Θαύμας κι Ερυθρά Θάλασσα

Κάνα ο Φαραώ ασουντάς ότι ο Ισραηλίτες νασλέας κατά Αίγυπτος, μετανιωσάλο σο μουκχλάς-λεν τι νασέν. Ντινάς εντολή πι στρατιωτέντε: “Ετοιμάνεν σαρέ μο άμαξες με το όπλα ντα αϊντίν τι κυνηγίνας-λεν! Να ισινέ τι μουκχάς-λεν τι νασέν”. Βοβ ντα λέσκε μουρσά αρχιντέ τι κυνηγίνεν ι Ισραηλιτέν.

Ο Ιεχωβά οδηγίνελας πι λαός, αντράλ εκχέ συννεφόσταρ ντισάρα ντα εκχέ γιακάσαρ ιράτ. Οδηγιντάς-λεν κι Ερυθρά Θάλασσα, ντα βακερντάς λένγκε τι μπεσέν για χάνικ οτθέ.

Αζομάν ο Ισραηλίτες ντικχλέ τον Φαραώ ντα λέσκε στρατός τι κυνηγίνεν-λεν. Να τθερένας κατέ τι τζαν, ανγκλά-λέντε ισινέ η ντεριάβ ντα παλά-λέντε ι Αιγυπτιόνγκο στρατός. Ντινέ βίκος οπράλ κο Μωυσής ντα βακερντέ: “Κα μεράς! Ισινέ τι μουκχέας-αμέν κι Αίγυπτος”. Αλλά ο Μωυσής βακερντάς λένγκε: “Μα νταρέν. Μπεσέν ντα ντικχέν σαρ κα σώνελ-αμέν ο Ιεχωβά”. Ο Μωυσής ντέλας μπέσα μπαγιά κο Ιεχωβά, αντικάς νανέ;

Ο Ιεχωβά βακερντάς κο Ισραηλίτες τι γκίντεν ο στρατόπεδος. Οντιά ιράτ, ο Ιεχωβά γκερντάς ο σύννεφος ντα τσσουντάς-λες κο μασκάρ κο Αιγύπτιοι ντα κο Ισραηλίτες. Κατά μπάντα ι Αιγυπτιόνγκι ισινέ καρανίκι. Αλλά κατά μπάντα ι Ισραηλιτένγκι ισινέ φως.

Ο Ιεχωβά βακερντάς κο Μωυσής τι βάντελ πο βας οπράλ κατά ντεριάβ. Αζομάν αντάς εκ ζουρανί μπαρμπάλ σο πφούντελας σαρί ιράτ. Η ντεριάβ ιλιάντιλι κο ντούι ντα κο μασκάρ πουτάρντιλο εκ ντρομ. Ο εκατομμύρια Ισραηλίτες πφιρένας οπράλ σουκέ τσικάτε, ενώ ο πανιά ισινέ σαρ ντουβάρι δεξιά ντα αριστερά λένταρ, μέχρι σο ερεσλέ κι γιαβέρ μπάντα.

Ο στρατός ι Φαραώσκο γκιλό παλάλ κο Ισραηλίτες ντα πφιρένας κι σουκί τσικ κι ντεριαβάκι. Αζομάν ο Ιεχωβά κερντάς ο στρατός ι Αιγυπτιόνγκο τι περέλ ο εκ οπράλ κο γιαβέρ. Ο ρόδες νικιόνας κατά άμαξες λένγκε. Ντα ο στρατιώτες ντένας βίκος: “Αϊντίν τι νασάς! Ο Ιεχωβά πολεμίνελα λένγκε”.

Ο Ιεχωβά βακερντάς κο Μωυσής: “Βάντε το βας οπράλ κατά ντεριάβ”. Αμέσως ο ντουβάρια κατά πανί πελέ οπράλ κι Αιγυπτιόνγκο στρατός. Ο Φαραώ ντα σαρέ λέσκε μουρσά μουλέ. Καέκ να τζουβντιλό.

Κατά γιαβέρ μπάντα ι ντεριαβάκι, εκ μπαρό πλήθος τζενένγκο ντέλας δόξα κο Ντεβέλ εκχέ γκιλιάσαρ: “Γκιλιαβέν ι Ιεχωβάσκε, σόσκε ισί πο οπρέ σαριλένταρ. Ι γκραστές ντα οντουλές σο μπεσέλας οπράλ κο γκρας φουρτιντάς κι ντεριάβ”. Καζόμ ο λαός γκιλιαβέλας, ο τζουβλιά κχελένας ντα μπασκιαρένας ο ντέφι. Σαρέ ισινέ μπουτ χαρούμενοι επειδή ακανά ισινέ μπαγιά ελεύθεροι.