Να Ατσσικιαρντέ Πουμαρό Λάφι

Ο Ιεχωβά βακερντάς κο Μωυσής: “Έλα μάντε κο βες. Κα γραφίναβ μο νόμοι οπράλ κο πλάκες σο ισί κερντέ μπαρέσταρ ντα κα νταβ-λεν τούτε”. Ο Μωυσής νικλιντάς κο βες ντα μπεσλό οτθέ 40 σαστέ ντιβεσά. Καζόμ ισινέ οτθέ, ο Ιεχωβά γραφιντάς ο Δέκα Εντολές οπράλ σε ντούι πλάκες κερντέ μπαρέσταρ ντα ντινάς-λεν κο Μωυσής.

Αφού νακχλέ κάποια ντιβεσά, ο Ισραηλίτες αμντίνενας ότι ο Μωυσής μουκχλάας-λεν. Ντα βακερντέ κο Ααρών: “Μανγκάσα εκχές τι οδηγίνελ-αμέν. Κερ αμένγκε εκχέ ντεβλές!” Αζομάν ο Ααρών βακερντάς: “Ντεν μάντε τουμαρέ χρυσαφικά”. Οτθάρ λιωντάς λένγκε χρυσαφικά ντα κερντάς εκ χρυσός μοσχάρι. Ο λαός βακερντάς: “Ανταβά μοσχάρι ισί αμαρό Ντεβέλ σο νικαντάς-αμέν κατά Αίγυπτος!” Αρχισάλε τι ντεν λατρεία κο χρυσός μοσχάρι, ντα κερντέ εκ γιορτή. Ισινέ λάθος ανταβά; Βα, επειδή ο λαός ντινάας πο λάφι τι ντελ λατρεία σάντε κο Ιεχωβά. Όμως ακανά να ατσσικιαρντέ πουμαρό λάφι.

Ο Ιεχωβά ντικχλάς σο αβέλας-πες ντα βακερντάς κο Μωυσής: “Γούλι κο λαός. Να ντένα-μαν καν ντα ντένα λατρεία εκχέ ψεύτικε ντεβλέστε”. Ο Μωυσής γουλίστιλο κατά βες, ντα ατσσικιαρέλας πι βαστέντε ο ντούι πλάκες ι μπαρέσκε.

Καζόμ ο Μωυσής τζάλας πο πασέ κο στρατόπεδος, ασούντιβενας γκιλιά. Αζομάν ντικχλάς ι λαός τι κχελέλ ντα τι ντελ λατρεία κο μοσχάρι. Ο Μωυσής χολιασάλο μπουτ. Φουρτιντάς τελέ ο ντούι πλάκες ι μπαρέσκε ντα αβιλέ κομμάτια. Αμέσως καταστραφιντάς ο μοσχάρι. Σοράν πουτσλάς τον Ααρών: “Σαρ κερντάς-τουτ ο λαός τι κερές ανταβά τζουνγκαλό πράγμας;” Ο Ααρών βακερντάς: “Μα χόλιανε. Τζανέσα ι λαός. Μανγκένας εκχέ ντεβλές, ανταλέσκε τσσουντόμ ο χρυσάφι λένγκο αντρέ κι γιακ ντα κερντιλό ο μοσχάρι!” Ο Ααρών να ισινέ τι κερέλ-λες ανταβά. Ο Μωυσής νικλιντάς πάλι κο βες ντα μολιντάς ι Ιεχωβάς τι συγχωρίνελ ι λαός.

Ο Ιεχωβά συγχωριντάς ι τζενέν σο μανγκένας αντράλ πουμαρέ γκίσταρ τι ντεν-λες καν. Ντικχέσα καζόμ σημαντικός ισινέ τι μουκχέν ο Ισραηλίτες ι Μωυσής τι οδηγίνελ-λεν;