Ο Γεδεών Νικιντάς ι Μαδιανιτέν

Καζόμ νακχένας ο μπρεσά, ο Ισραήλ νασλό ντουρ κατά Ιεχωβά ντα ντέλας λατρεία πάλι ψεύτικε ντεβλέντε. Ο Μαδιανίτες εφτά σαστέ μπρεσά τσορένας ο ζώα ι Ισραηλιτένγκε ντα καταστραφίνενας ο χωράφια λένγκε. Για τι γλιτώνεν κατά Μαδιανίτες ο Ισραηλίτες γκεραβένας-πες κο βεσά ντα κο σπηλιές. Μολίνενας ι Ιεχωβάς τι σώνελ-λεν. Οτθάρ, ο Ιεχωβά μπουτσσαντάς εκχέ αγγελός εκχέ τερνέστε σο βακερένας λέσκε Γεδεών. Ο άγγελος βακερντάς λέσκε: “Ο Ιεχωβά τραμπιντάς τουτ για τι αβές ζουρανό πολεμιστής”. Ο Γεδεών πουτσλάς-λες: “Σαρ μπορίναβα με τι σώναβ τον Ισραήλ; Με να ισινόμ τίποτα”.

Σαρ κα αβέλας ο Γεδεών σίγουρος ότι ο Ιεχωβά τραμπιντάας λες; Λιντάς χάνικ κατά μπαλά εκχέ μπρακέσκε, τσσουντάς-λεν τελέ κι πφουβ ντα βακερντάς κο Ιεχωβά: “Άμα κο πρωί ανταλά μπαλά κα αβέν σουσλέ αλλά τελέ ο τθαν κα αβέλ σουκό, κα τζανάβ ότι μανγκέσα με τι σώναβ ι λαός”. Αφού ντισιλό, ντικχλάς ότι ο μπαλά ισινέ σουσλέ ντα ο τθαν τελέ ισινέ σουκό! Αλλά αζομάν ο Γεδεών βακερντάς πάλι κο Ιεχωβά: “Γιαβίν κο πρωί ο μπαλά τι αβέν σουκέ ντα ο τθαν τελέ τι αβέλ σουσλό”. Αφού αβιλό εμ ανταβά, ο Γεδεών αβιλό ντιπ σίγουρος ότι ο Ιεχωβά τραμπιντάας λες. Γκιντιντάς πι στρατός ντα γκιλό τι κερέλ πόλεμος με το Μαδιανίτες.

Ο Ιεχωβά βακερντάς κο Γεδεών: “Κα βοηθίναβ ι Ισραηλιτέν τι νικίνεν. Αλλά επειδή τθερέσα αζόμ μπουτέ στρατιωτέν μπορεί τι αμντίνες ότι νικιντέν τουμαρέ ζοριάσαρ. Οτθάρ, βάκερ: Κον νταρέλα τι τζαλ πι κχερέστε”. Ντα αντικάς, 22.000 στρατιώτες βουρτισάλε πουμαρέ κχερέντε ντα ατσσιλέ 10.000. Σοράν ο Ιεχωβά βακερντάς: “Ατζέ τθερέσα μπουτέ στρατιωτέν. Λε-λεν ντα γκερ-λεν κι λεν. Ντα ατσσίκιαρ σάντε οντουλέν σο να κα περέν μόσαρ κι λεν για τι πιν πανί”. Σάντε 300 μουρσά αρακχαβένας-πες καζόμ πίνας πανί. Ο Ιεχωβά ντινάς πο λάφι ότι ανταλά χάνικ μουρσά κα νικίνενας ι 135.000 Μαδιανιτέν.

Οντιά ιράτ ο Ιεχωβά βακερντάς κο Γεδεών: “Αβιλό ο σαάτι τι κερέν επίθεση κο Μαδιανίτες!” Ο Γεδεών ντινάς πι μουρσέντε σινγκά ντα μπαρέ πιριά σο αντρέ ισινέ γκεραντέ πυρσοί, ντα βακερντάς λένγκε: “Τι ντικχέν-μαν ντα τι κερέν ντιπ οντουβά σο κεράβα με”. Ο Γεδεών πφουντιντάς ι σινγκ, πφανγκλάς πι πιρί, κουνιαντάς πο πυρσός ντα ντινάς βίκος: “Σπαθίς ι Ιεχωβάσκο ντα του Γεδεών!” Ο 300 μουρσά λέσκε κερντέ βον-ντα ο ίδιος. Ο Μαδιανίτες νταρασάλε μπουτ ντα τθάβντενας σαρ ντινιλέ κατάρ τι αβέλ. Αντρέ κι νταρ σο τθερένας αρχισάλε τι μουνταρέν ο εκ ι γιαβερές. Ατζέκ εκ φαρ, ο Ιεχωβά βοηθιντάς ι Ισραηλιτέν τι νικίνεν πουμαρέ ντουσμανίν.