Ο Θάρρος σο Σικαντάς ο Ιωδαέ

Η Ιεζάβελ τθερέλας εκχέ τσσαγιά σο βακερένας λάκε Γοθολία ντα ισινέ μπουτ γκεραλί, σαρ πι νταγιάτε. Η Γοθολία ισινέ παντριμέ ι βασιλιάσαρ σο τθερέλας ο Ιούδας. Κάνα λάκο ρομ μουλό, αρχισάλο τι κυβερνίνελ λάκο τσσαβό. Αλλά κάνα μουλό λάκο τσσαβό, η Γοθολία κερντάς πο νεαυτός βασίλισσα κο Ιούδας. Σοράν μανγκλάς τι μουνταρέλ σαρέ ι τζενέν σο αστάρντιβενας κατά βασιλιάς ντα κα μπορίνενας τι λεν λάταρ ι βασιλεία, ατζέ-ντα πι αγγονίν. Σαρέ νταρένας λάταρ.

Ο αρχιερέας Ιωδαέ ντα λέσκι ρομνί, η Ιωσαβεέ, τζανένας ότι ανταβά σο κερντάς η Γοθολία ισινέ μπουτ μπέτι. Οτθάρ τσσουντέ σε κίνδυνος πουμαρί ζωή για τι γκεραβέν εκ κατά αγγόνια σο τθερέλας η Γοθολία, εκχέ μαξιμίς σο βακερένας λέσκε Ιωάς ντα μπαριαρντέ-λες κο ναός.

Κάνα ο Ιωάς ισινέ εφτά μπρεσένγκο, ο Ιωδαέ γκιντιντάς σαρέ ι αρχηγόν ντα ι Λευιτέν ντα βακερντάς λένγκε: “Τι αρακχαβέν ο πόρτες ι ναόσκε, ντα μα μουκχέν καεκχές τι ντελ αντρέ”. Σοράν, ο Ιωδαέ κερντάς ι Ιωάς βασιλιάς κο Ιούδας ντα τσσουντάς λέσκε σορέστε εκ στέμμας. Ο λαός ι Ιουδάσκο ντέλας βίκος: “Τι τζουβντιόλ ο βασιλιάς!”

Η βασίλισσα Γοθολία ασουντάς ι τζενέν σο ντένας βίκος ντα τθαβντισάλι κο ναός. Κάνα ντικχλάς ι νεβέ βασιλιάς ντινάς βίκος: «Πφιρνικανό σχέδιος! Πφιρνικανό σχέδιος!» Ο αρχηγοί καπτιντέ ι γκεραλέ βασιλισσά, γκερντέ-λα εκχέ γιαβερέ τθανέστε ντα μουνταρντέ-λα. Αλλά σο αβιλό ι λαόσαρ;

Ο Ιωδαέ βοηθιντάς ι λαός τι κερέλ εκ συμφωνία ι Ιεχωβάσαρ. Ντινέ πουμαρό λάφι τι ντεν λατρεία σάντε Λες. Ο Ιωδαέ τσσουντάς-λεν τι περαβέν ο ναός του Βάαλ ντα τι καταστραφίνεν ο είδωλα. Τσσουντάς ι ιερεόν ντα ι Λευιτέν τι υπηρετίνεν κο ναός για τι μπορίνελ ο λαός τι ντελ πάλι λατρεία οτθέ. Τσσουντάς φρουρόν κο μπαρέ πόρτες τι αρακχαβέν ο ναός για μα τι ντελ αντρέ καέκ τζενό σο να ισινέ πάκι κι Ντεβλέσκε γιακχά. Σοράν, ο Ιωδαέ ντα ο αρχηγοί γκερντέ τον Ιωάς κο παλάτι ντα τσσουντέ-λες τι μπεσέλ κο θρόνος. Ο λαός κο Ιούδας χαιρισάλο μπουτ. Μπορίνενας τι υπηρετίνεν ι Ιεχωβάς, ακανά σο η γκεραλί Γοθολία μουλί ντα να υπαρχίντιβελας η λατρεία του Βάαλ. Ντικχέσα σαρ βοηθιντάς μπουτέ τζενέν ο θάρρος σο σικαντάς ο Ιωδαέ;