Η Ιερουσαλήμ Καταστραφίντιβελα

Παλάλ γιαβερέστε ο Ιουδαίοι μουκχένας ι Ιεχωβάς ντα ντένας λατρεία ψεύτικε ντεβλέντε. Για μπουτ μπρεσά ο Ιεχωβά προσπαθίνελας τι βοηθίνελ-λεν. Μπουτσσαβέλας μπουτέ προφητέν τι προειδοποιήνεν-λεν, αλλά βον να ασουνένας. Αντίς τι ασουνέν, βον πρασάνας ι προφητέν. Σαρ τσσιναντάς ο Ιεχωβά λένγκι ειδωλολατρία;

Ο βασιλιάς της Βαβυλώνας, ο Ναβουχοδονόσορ, λέλας ο εκ τθεμ σοράν κατά γιαβέρ. Η πρώτη φαρ σο τσσουντάς-πες κι Ιερουσαλήμ, λιντάς αιχμάλωτους ι βασιλιάς Ιωαχίν, ι αρχοντέν, ι πολεμιστέν ντα ι τεχνιτέν ντα γκερντάς-λεν σαριλέν κι Βαβυλώνα. Επίσης λιντάς σαρό ο θησαυρός κατά ναός ι Ιεχωβάσκο. Σοράν ο Ναβουχοδονόσορ κερντάς ι Σεδεκιάς βασιλιάς κο Ιούδας.

Κι αρχή, ο Σεδεκίας ντέλας καν κο Ναβουχοδονόσορ. Αλλά, σοράν, ο τθεμά σο ισινέ ντονταλάι ντα ο ψεύτικοι προφήτες βακερντέ κο Σεδεκίας τι τζαλ κόντρα κι Βαβυλώνα. Όμως, ο Ιερεμίας προειδοποιηντάς-λες: “Άμα κα τζας κόντρα, κα αβέλ μεριπέ, μποκχ ντα νασφαλίματα κο Ιούδας”.

Αφού κυβερνιντάς οχτώ μπρεσά, ο Σεδεκίας αποφασιντάς τι τζαλ κόντρα ντα τι κερέλ τζένγκι με τη Βαβυλώνα. Μανγκλάς βοήθεια κατά στρατός σο τθερέλας η Αίγυπτος. Αζομάν ο Ναβουχοδονόσορ μπουτσσαντάς πι στρατός τι κερέλ επίθεση κι Ιερουσαλήμ, ντα ο στρατός γκιλό ντα πφαντάς ι πόλη ντονταλάι. Ο Ιερεμίας βακερντάς κο Σεδεκίας: “Ο Ιεχωβά βακερντάς ότι άμα κα παραδόνες-τουτ κι Βαβυλώνα, κα γλιτώνες εμ τούι εμ η πόλη. Αλλά άμα να κα κερές-λες ανταβά, ο Βαβυλώνιοι κα πφαμπαρέν ι Ιερουσαλήμ, ντα τουτ κα λεν-τουτ αιχμάλωτος”. Ο Σεδεκίας βακερντάς: “Να κα παραδόναβ-μαν!”

Αφού νακχλό ενάμιση μπρες, ο στρατός σο τθερέλας η Βαβυλώνα περαντάς εκ κομμάτι κατά μπαρέ ντουβάρια σο τθερέλας η Ιερουσαλήμ ντα τσσουντάς γιακ κι πόλη. Ο στρατιώτες πφαμπαρντέ ο ναός, μουνταρντέ μπουτέ τζενέν, ντα λιντέ αιχμάλωτους μπουτέ γιαβερέ τζενέν.

Ο Σεδεκίας νασλό αποτσοράλ κατά Ιερουσαλήμ, αλλά ο Βαβυλώνιοι κυνηγιντέ-λες. Ασταρντέ-λες πασέ κι Ιεριχώ ντα γκερντέ-λες κο Ναβουχοδονόσορ. Ο βασιλιάς τσσουντάς ζορίσαρ ι Σεδεκιάς τι ντικχέλ, καζόμ μουνταρένας λέσκε τσσαβέν. Σοράν, ο Ναβουχοδονόσορ κοριαρντάς ι Σεδεκιάς, τσσουντάς-λες φυλακή, ντα ατσσιλό οτθέ μέχρι σο μουλό. Αλλά ο Ιεχωβά ντινάς πο λάφι κο Ιούδας: “Σοράν από 70 μπρεσά, κα ανάβ-τουμέν τουμαρέ τθεμέστε, κι Ιερουσαλήμ”.

Σο κα αβέλας-πες ι τερνέντζαρ σο ισινέ αιχμάλωτοι κι Βαβυλώνα; Κα ατσσόνας πιστοί κο Ιεχωβά;