Ο Έσδρας Σικλιαρέλας ο Νόμος ι Ντεβλέσκο

Νακχλέας πασέ 70 μπρεσά από αζομάν σο βουρτισάλεας παλάλ κι Ιερουσαλήμ ο πο μπουτ Ισραηλίτες, αλλά γιαβερά τζουβντιόνας ατζέ γιαβερέ τθανέντε κι Περσική Αυτοκρατορία. Εκ ανταλένταρ ισινέ εκ ιερέας, ο Έσδρας, σο βοβ σικλιαρέλας ο Νόμος ι Ιεχωβάσκο. Ο Έσδρας σικλιλό ότι ο λαός κι Ιερουσαλήμ να κερέλας ο Νόμος. Οτθάρ μανγκέλας τι τζαλ ντα τι βοηθίνελ-λεν. Ο Πέρσης βασιλιάς Αρταξέρξης βακερντάς λέσκε: “Ο Ντεβέλ κερντάς-τουτ γκοντιαβέρ για τι μπορίνες τι σικλιαρές ο Νόμος λέσκο. Τζα ντα λε παλά-τούτε οντουλέν σο μανγκένα τι αβέν”. Ο Έσδρας κερντάς λάφι σαρέ οντουλέντζαρ σο μανγκένας τι βουρτίνεν κι Ιερουσαλήμ. Κερντέ προσευχή κο Ιεχωβά για τι αρακχαβέλ-λεν κο μπαρό ταξίδι λένγκο, ντα σοράν νασλέ.

Σοράν από 4 μασεκά, ερεσλέ κι Ιερουσαλήμ. Ο άρχοντες βακερντέ κο Έσδρας: “Ο Ισραηλίτες να ντινέ καν κο Ιεχωβά ντα παντρισάλε τζουβλίντζαρ σο πακιάνα ψεύτικε ντεβλέντε”. Σο κερντάς ο Έσδρας; Ανγκλάλ κο λαός, πελό κοτσίντζαρ ντα προσευχισάλο: “Ιεχωβά κερντάν αζόμ μπουτ αμένγκε, αλλά αμέν κερντάμ αμαρτία ντα αντικάς γκιλάμ τούσαρ κόντρα”. Ο λαός μετανιωσάλο, αλλά συνεχίνελας τι κερέλ πράγματα σο να ισινέ σωστά. Ο Έσδρας τραμπιντάς πρεσβυτερόν ντα κριτέν για τι ρόντεν ανταλά πράγματα. Ο γιαβερά 3 μασεκά, νασκιαρντέ οντουλέν σο να ντένας λατρεία ι Ιεχωβάς.

Νακχλέ 12 μπρεσά. Αντρέ οντουλέ μπρεσέντε, ο βουτσσέ ντουβάρια ντονταλάι κατά Ιερουσαλήμ κερντιλέ πάλι. Ο Έσδρας γκιντιντάς ι λαός κι πλατεία για τι διαβάνελ λένγκε ο Νόμος ι Ντεβλέσκο. Κάνα πουταρντάς ο βιβλίος, ο λαός ιστίντιλο οπρέ. Ο Έσδρας ντινάς δόξα ι Ιεχωβάς, ντα βον βαντιντέ πουμαρέ βαστά για τι σικαβέν ότι συμφωνίνενα. Σοράν διαβαντάς ντα εξηγιντάς ο Νόμος, ντα ο λαός ασουνέλας προσεκτικά. Αγαντέ ότι νασλέας ντουρ πάλι κατά Ιεχωβά ντα ροντέ. Ο γιαβέρ ντιβές ο Έσδρας διαβαντάς λένγκε κάτι ατζέ-ντα κατά Νόμος. Σικλιλέ ότι ατζεχάνικ κα κερένας ο Μπαρέ Ντιβεσά ι Τσαντιρίνγκε. Αρχισάλε σουγκό τι ετοιμάνεν-πες ι μπαρέ ντιβεσένγκε.

Ο εφτά ντιβεσά ι μπαρέ ντιβεσένγκε, ο λαός ισινέ χαρούμενος ντα ευχαριστίνελας ι Ιεχωβάς ι μπουτέ πραγματένγκε σο νικαντέ ο χωράφια. Ασακέ Μπαρέ Ντιβεσά ι Τσαντιρίνγκε τθερένας τι αβέν κατά ντιβεσά σο τζουβντιόλας ο Ιησούς του Ναυή. Κάνα τελειωσάλε ο μπαρέ ντιβεσά, ο λαός γκιντισάλο ντα προσευχισάλο: “Ιεχωβά, τούι λιντάν-αμέν για μα τι αβάς δούλοι, ντέας-αμέν χαμπέ κι έρημος ντα ντινάν αμένγκε ανταβά σουκάρ τθεμ. Αλλά αμέν παλάλ γιαβερέστε, να ντάας-τουτ καν. Μπουτσσαβέας προφητέν για τι ντεν-αμέν γκοντί, αλλά αμέν να ντάας καν. Τούι όμως κερέας υπομονή αμέντζαρ. Ατσσικιαρντάν το λάφι σο ντινάνας κο Αβραάμ. Ακανά ντάσα αμαρό λάφι ότι κα ντας-τουτ καν”. Γραφιντέ πουμαρί υπόσχεση, ντα ο άρχοντες, ο Λευίτες ντα ο ιερείς τσσουντέ οπρά-λάτε πουμαρί σφραγίδα.