Η Ελισάβετ Μπιανέλα Εκχέ Μαξιμίς

Νακχλέ, 400 ντα πο μπουτ μπρεσά από αζομάν σο λατσσάρντιλε πάλι ο ντουβάρια κι Ιερουσαλήμ. Πασέ κι πόλη, τζουβντιόλας εκ ιερέας σο βακερένας λέσκε Ζαχαρίας ντα λέσκι ρομνί, η Ελισάβετ. Ισινέ μπουτ μπρεσά παντριμέ αλλά να τθερένας τσσαβέν. Εκ ντιβές σο ο Ζαχαρίας πφαμπαρέλας θυμίαμας κο αγιαστήριος κι ναόσκο, γκιλό λέσκε ο άγγελος Γαβριήλ. Ο Ζαχαρίας νταρασάλο, αλλά ο Γαβριήλ βακερντάς λέσκε: “Μα ντάρα. Ανάβα τούκε λατσσέ αμπέρια κατά Ιεχωβά. Τι ρομνί, η Ελισάβετ, κα μπιανέλ τσσαβές ντα λέσκο ναβ κα αβέλ Ιωάννης. Ο Ιεχωβά τραμπιντάς ι Ιωαννής για τι κερέλ εκ ξεχωριστή μπουτί”. Ο Ζαχαρίας πουτσλάς: “Σαρ αβέλα-πες τι πακιάβ-τουτ; Με ντα μι ρομνί να αβέλα-πες τι κεράς τσσαβές επειδή ισινάμ πφουρέ”. Ο Γαβριήλ βακερντάς: “Ο Ντεβέλ μπουτσσαντάς-μαν για τι βακεράβ τούκε ανταλά αμπέρια. Αλλά επειδή να πακιαντάν-μαν, να κα μπορίνες τι κερές λάφι μέχρι τι μπιάντιβελ ο μαξίμι”.

Ο Ζαχαρίας ισινέ αντρέ κο αγιαστήριος πο μπουτ σαάτι από ότι κερέλας συνήθως. Οτθάρ, κανά νικίστιλο αβρί, ο τζενέ σο μπεκλεντίνενας αβριάλ μανγκένας τι σικλιόν σο αβιλό. Ο Ζαχαρίας ναστί κερέλας λάφι. Μπορίνελας σάντε τι κερέλ νοήματα πι βαστέντζαρ. Αζομάν ο τζενέ αγαντέ ότι ο Ζαχαρίας λιντάς εκ αμπέρι κατά Ντεβέλ.

Ο ντιβεσά νακχένας, η Ελισάβετ ατσσιλί κχαμνί ντα μπιαντάς εκχέ τσσαβές, ντιπ αντικάς σαρ βακερντάς ο άγγελος. Ο αμαλά ντα ο τζενέ λάκε γκιλέ τι ντικχέν ι μαξιμίς. Χαιρίνενας μπουτ λάκε. Η Ελισάβετ βακερντάς: “Κα νικαβάβ λέσκε Ιωάννη”. Βον βακερντέ: “Να τθεράσα καεκχές κι φαμιλί ανταλέ ναβέσαρ. Τι νικαβέν λέσκε Ζαχαρία, σαρ βακερένα λέσκε νταντέσκε-ντα”. Αλλά ο Ζαχαρίας γραφιντάς ακαλά λάφια: “Ιωάννης κα νικαβάς λέσκε”. Ντα οντουβά σαάτι, ο Ζαχαρίας κερντάς λάφι πάλι! Σαρί κι Ιουδαία σικλιλέ ι χουρντέσκε, ντα ο τζενέ βακερένας: “Σο κα αβέλ κίμπιριμ ανταβά τσσαβορό κάνα κα μπαριόλ;”

Αζομάν ο Ζαχαρίας πφερντιλό άγιος πνεύμας ντα βακερντάς ακαγιά προφητεία: “Τι ντιντιόλ δόξα κο Ιεχωβά. Βοβ ντινάς πο λάφι κο Αβραάμ ότι κα μπουτσσαβέλας εκχές σο κα αβέλας ο Μεσσίας, για τι σώνελ-αμέν. Ο Ιωάννης κα αβέλ προφήτης ντα κα ετοιμάνελ ο ντρομ ι Μεσσιάσκε”.

Αβιλό κάτι μπουτ ξεχωριστός κι Μαρία-ντα, σο ισινέ τζενέ με την Ελισάβετ. Κα ντικχάς-λες ανταβά κο γιαβέρ μάθημας.