Ο Ιησούς Πφιρέλα Οπράλ κο Πανί

Ο Ιησούς κερέλας λατσσές ι νασφαλέν ντα τζουβντιαρέλας ι μουλέν, αλλά εμ κερέλας κουμάντος ι μπαρμπάλ ντα ο μπρισίμ. Αφού προσευχισάλο εκχέ βεσέστε, ο Ιησούς ντικχλάς κάρινγκ κι Ντεριάβ της Γαλιλαίας εκ μπαρί μπαρμπάλ. Ο απόστολοι λέσκε ισινέ κι βάρκα ντα μαρένας-πες τι κερέν κουπίς κόντρα κι μπαρμπάλ. Ο Ιησούς γουλίστιλο οτθάρ ντα αρχιντάς τι πφιρέλ οπράλ κο πανί ντα τι τζαλ κάρινγκ κι βάρκα. Κάνα ο απόστολοι ντικχλέ τι πφιρέλ εκ τζενό οπράλ κο πανί νταρασάλε μπουτ. Αλλά ο Ιησούς βακερντάς λένγκε: “Με ισινόμ. Μα νταρέν”.

Ο Πέτρος βακερντάς: “Κύριε, άμα ισινάν μπαγιά τούι, βάκερ μάνγκε τι αβάβ τούτε”. Ο Ιησούς βακερντάς κο Πέτρος: “Έλα μάντε”. Αντικάς αντρέ κι μπαρμπάλ, ο Πέτρος γουλίστιλο κατά βάρκα ντα πφιρντάς κάρινγκ κο Ιησούς οπράλ κο πανί. Αλλά καζόμ τζάλας πο πασέ λέστε, ο Πέτρος ντικχλάς ι μπαρμπάλ ντα νταρασάλο. Αγαντάς ότι σιγά σιγά βουλιάνελας. Ο Πέτρος ντινάς βίκος: “Κύριε, σώνε-μαν!” Ο Ιησούς ασταρντάς λέσκο βας ντα βακερντάς λέσκε: “Σόσκε χασαρντάν τι σιγουριά; Κάι ισί τι πίστη;”

Ο Ιησούς ντα ο Πέτρος νικίστιλε οπράλ κι βάρκα ντα αμέσως η μπαρμπάλ τσσινάντιλι. Μπορίνεσα τι σκεφτίνες σαρ νιωσάλε ο απόστολοι; Βον βακερντέ: «Μπαγιά ισινάν Τσσαβό ι Ντεβλέσκο».

Να ισινέ σάντε ανταγιά φαρ σο ο Ιησούς κερντάς κουμάντος ο καιρός. Εκ γιαβέρ φαρ, κάνα ο Ιησούς ντα ο απόστολοι τζάνας ι βαρκάσαρ κι γιαβέρ μπάντα κι ντεριαβάκι, ο Ιησούς τσσουντάς-πες τι σοβέλ παλάλ κι βάρκα. Καζόμ σοβέλας, ασταρντάς εκ ζουρανί μπαρμπάλ. Ο κύματα ντένας οπράλ κι βάρκα ντα πφερντιλίας πανί. Ο απόστολοι τζανγκαντέ ι Ιησούς ντα βακερντέ λέσκε: “Δάσκαλε, κα μεράς! Βοήθινε-αμέν!” Ο Ιησούς ιστίντιλο ντα βακερντάς κι ντεριάβ «Ηρέμινε!» Αμέσως, η μπαρμπάλ ντα η ντεριάβ ηρεμισάλε. Ο Ιησούς βακερντάς πι αποστολόνγκε: “Κατέ ισί τουμαρί πίστη;” Βον βακερντέ ο εκ ι γιαβερέσκε: «Ατζέ-ντα η μπαρμπάλ ντα η ντεριάβ ντένα-λες καν». Ο απόστολοι σικλιλέ ότι, άμα κα ντένας σαρί πουμαρί μπέσα κο Ιησούς, να κα χρειαζίντιβελας τι νταρέν καεκχέ πραγμάσκε.