Ο Πέτρος Βακερέλα ότι να Τζανέλα ι Ιησούς

Κάνα ο Ιησούς ισινέ πι αποστολόντζαρ κο δωμάτιος για τι κερέν ο Πάσχας, βακερντάς λένγκε: “Σαρέ κα μουκχέν-μαν αντιβές”. Ο Πέτρος βακερντάς: “Όχι με! Ατζέ-ντα άμα σαρέ κα μουκχέν-τουτ, με να κα μουκχάβ-τουτ ποτές”. Αλλά ο Ιησούς βακερντάς κο Πέτρος: “Πριν τι μπασέλ ο μπασνό, κα βακερές τριν φαρ ότι να τζανέσα-μαν”.

Κάνα ο στρατιώτες γκερντέ ι Ιησούς κο κχερ του Καϊάφα, ο πο μπουτ απόστολοι λιντέας-πες ντα νασλέ. Αλλά ντούι λένταρ τσσουντέ-πες αντρέ κο μπουτ τζενέ ντα γκιλέ παλά-λέστε. Εκ λένταρ ισινέ ο Πέτρος. Ντινάς αντρέ κι αυλή κι κχερέσκι σο τθερέλας ο Καϊάφας ντα γκιλό πασέ κι γιακ για τι τατιόλ. Κάνα πελό φως κι Πετρόσκο μούι εκ υπηρέτρια ντικχλάς-λες ντα βακερντάς: “Τζανάβα-τουτ! Ισινάνας γιεκ ι Ιησούσαρ!”

Ο Πέτρος βακερντάς: “Όχι να ισινόμας! Να τζανάβα καλέ πραγμάσκε κερέσα λάφι!” Ντα γκιλό πασέ κι πόρτα. Αλλά χάνικ πο σοράν ντικχλάς-λες εκ γιαβέρ υπηρέτρια ντα βακερντάς κο τζενέ: “Ακαβά ισινέ γιεκ ι Ιησούσαρ!” Ο Πέτρος βακερντάς: “Να τζανάβα οντουλέ τζενές ι Ιησούς!” Εκ γιαβέρ βακερντάς: “Ισινάν εκ λένταρ! Αγαβάβα κατά τρόπος σο κερέσα λάφι ότι ισινάν κατά Γαλιλαία, σαρ ισί ο Ιησούς-ντα”. Αλλά ο Πέτρος χαλάς σοβέλ: “Να τζανάβα-λες!”

Οντιά στιγμή, μπασλό εκ μπασνό. Ο Πέτρος ντικχλάς ι Ιησούς τι βουρτίνελ ντα τι ντικχέλ-λες. Ντινάς-πες γκοντί λέσκε λάφια, νικίστιλο αβρί ντα ροντάς γκίσαρ.

Κο ίδιος σαάτι, ο τζενέ σο ισινέ κο Σάνχεδριν κερένας λάφι για τι δικάνεν ι Ιησούς αντρέ κο κχερ του Καϊάφα. Αποφασιντέας ήδη τι μουνταρέν-λες, ντα ακανά ρόντενας εκ λόγος για τι κερέν-λες ανταβά. Αλλά ναστί αρακχένας καέκ λόγος. Τελικά ο Καϊάφας πουτσλάς ι Ιησούς: “Ισινάν ο Τσσαβό ι Ντεβλέσκο;” Ο Ιησούς βακερντάς: “Βα ισινόμ”. Σοράν ο Καϊάφας βακερντάς: “Να χρειαζίντιβασα γιαβερά αποδείξεις. Λέσκε λάφια τζάνα κόντρα κο Ντεβέλ!” Ο δικαστήριος συμφωνιντάς: “Ακαβά τζενό πρέπει τι μερέλ”. Ντινέ σαμάρια ι Ιησούς, τσσουνγκιαρντέ-λες, πφαντέ λέσκε γιακχά ντα καζόμ νταπένας-λες βακερένας: “Άμα ισινάν προφήτης, βάκερ αμένγκε κον νταπλάς-τουτ!”

Κάνα ντισιλό, γκερντέ ι Ιησούς κι αίθουσα του Σάνχεδριν ντα πουτσλέ-λες πάλι: “Ισινάν ο Τσσαβό ι Ντεβλέσκο;” Ο Ιησούς βακερντάς: “Τουμέν βακερένα ότι ισινόμ”. Αζομάν βακερντέ ότι τζάλα κόντρα κο Ντεβέλ ντα καταδικαντέ-λες. Σοράν γκερντέ-λες κο παλάτι σο μπεσέλας ο Πόντιος Πιλάτος, σο ισινέ εκ Ρωμαίος κυβερνήτης. Σο αβιλό σοράν; Για τι ντικχάς.