Ο Ιησούς Σικαβέλα-πες κο Ψαράδες

Αφού νακχλέ χάνικ ντιβεσά οτθάρ μπερί σο σικαντάς-πες ο Ιησούς κο απόστολοι, ο Πέτρος γκιλό κι Ντεριάβ κι Γαλιλαία για τι ασταρέλ ματσσέν. Γιεκ λέσαρ γκιλέ ο Θωμάς, ο Ιάκωβος, ο Ιωάννης ντα γιαβερά απόστολοι. Σαρί ι ιράτ να ασταρντέ ούτε εκχέ ματσσές.

Κάνα ντισιλό, ντικχλέ εκχέ μουρσές τι αβέλ ανγκλάλ κι ντεριάβ. Ντινάς βίκος ντουράλ: “Ασταρντέν καεκχέ ματσσές;” Βον βακερντέ: «Όχι». Ο τζενό βακερντάς λένγκε: «Τσσουβέν ο δίχτυ κι δεξιά μπάντα κατά βάρκα». Κάνα κερντέ-λες ανταβά, ο δίχτυ πφερντιλό αζόμ μπουτ ματσσέ σο ναστί ταρτίνενας-λεν οπράλ κι βάρκα. Ο Ιωάννης αζομάν αγαντάς ότι οντουβά μουρς ισί ο Ιησούς, ντα βακερντάς: «Ο Κύριος ισί!» Αμέσως, ο Πέτρος χουτλάς αντρέ κι ντεριάβ για τι τζαλ αβρί σο ισινέ ο Ιησούς. Ο γιαβερά μαθητές γκιλέ οτθέ ι βαρκάσαρ.

Κάνα ερεσλέ αβριάλ κατά ντεριάβ, ντικχλέ ότι ισινέ οτθέ μαντρό αλλά εμ ματσσό σο πεκιόλας οπράλ κο ανγκαρά. Ο Ιησούς βακερντάς λένγκε τι ανέν γιαβερά-ντα ματσσέ οντουλένταρ σο ασταρντέ. Σοράν τσσουντάς-λεν γιεκ ι γιαβερέ ματσσέσαρ ντα ι μαντρέσαρ, ντα βακερντάς λένγκε: “Ελάν τι χαν”.

Αφού χαλέ, ο Ιησούς πουτσλάς ι Πετρός: “Μανγκέσα-μαν πο μπουτ κατά ψάρεμας;” Ο Πέτρος βακερντάς: “Βα, Κύριε, τούι τζανέσα ότι μανγκάβα-τουτ”. Ο Ιησούς βακερντάς: «Πάρβαρ μι μπρακέν». Ο Ιησούς πουτσλάς-λες πάλι: “Πέτρο μανγκέσα-μαν;” Ο Πέτρος βακερντάς: “Κύριε, τζανέσα ότι μανγκάβα-τουτ”. Ο Ιησούς βακερντάς: “Αράκχαβ μι μπρακορέν”. Ο Ιησούς πουτσλάς τρίτη-ντα φαρ. Ο Πέτρος στεναχωρισάλο μπουτ ντα βακερντάς: “Κύριε τούι τζανέσα-λεν σαρέ. Τζανέσα ότι μανγκάβα-τουτ”. Ο Ιησούς βακερντάς: «Πάρβαρ μι μπρακορέν». Σοράν βακερντάς κο Πέτρος: «Μα τσσίναβ τι αβές παλά-μάντε».