Ο Κορνήλιος Λέλα Άγιος Πνεύμας

Κι Καισάρεια, ισινέ εκ σημαντικός Ρωμαίος, ο Κορνήλιος, σο ισινέ αξιωματικός κο στρατός. Παρόλο σο να ισινέ Ιουδαίος, ο Ιουδαίοι σεβάνενας-λες. Βοηθίνελας αντράλ πι γκίσταρ ι τσορορέν ντα οντουλέν σο τθερένας ανάγκη. Ο Κορνήλιος πακιάλας κο Ιεχωβά ντα συνέχεια προσευχίντιβελας λέστε. Εκ ντιβές, αβιλό ανγκλάλ κο Κορνήλιος εκ άγγελος ντα βακερντάς λέσκε: “Ο Ντεβέλ ασουντάς το προσευχές. Ακανά μπούτσσαβ μουρσέν κι πόλη Ιόππη, οτθέ σο μπεσέλα ο Πέτρος, ντα μανγκ λέσταρ τι αβέλ τούτε”. Αμέσως, ο Κορνήλιος μπουτσσαντάς τρινέ μουρσέν κι Ιόππη, σο ισινέ περίπου 50 χιλιόμετρα πο νότια.

Κι ίδια στιγμή, κι Ιόππη, ο Πέτρος ντικχλάς εκ φαντασία. Ντικχλάς ζώα σο ο Ιουδαίοι να αβέλας-πες τι χαν, ντα ασουντάς εκ φωνή σο βακερέλας λέσκε τι χαλ. Ο Πέτρος να μανγκέλας τι χαλ, ντα βακερντάς: “Με να τθεράβα χαλό ποτές μι ζωγιάτε μαγαριμέ ζώος”. Αζομάν η φωνή βακερντάς λέσκε: “Μα βάκερ ότι ισί μαγαριμέ ανταλά ζώα. Ο Ντεβέλ κερντάς-λεν πάκι”. Επίσης βακερντάς λέσκε: “Τριν μουρσά ισί τι πορτάτε. Τζα παλά-λέντε”. Αζομάν ο Πέτρος γκιλό κι πόρτα ντα πουτσλάς ι μουρσέν σόσκε ισινέ οτθέ. Βον απαντιντέ λέσκε: “Μπουτσσαντάς-αμέν ο Κορνήλιος, εκ Ρωμαίος σο ισί αξιωματικός κο στρατός. Πρέπει τι τζας λέσκε κχερέστε κι Καισάρεια”. Ο Πέτρος βακερντάς οντουλέ μουρσένγκε τι σοβέν οντιά ιράτ λέσκε κχερέστε. Ο γιαβέρ ντιβές, γκιλό λέντζαρ κι Καισάρεια, γιεκ μερικέ πφραλέντζαρ-ντα κατά Ιόππη.

Κάνα ο Κορνήλιος ντικχλάς ι Πετρός, πελό κοτσίντζαρ ανγκλά-λέστε. Αλλά ο Πέτρος βακερντάς: “Ίστι! Με-ντα τζενό ισινόμ σαρ τούτε. Ο Ντεβέλ βακερντάς μάνγκε τι αβάβ τι κχερέστε, παρόλο σο ο Ιουδαίοι να τζάνα κο κχερά κι τζενένγκε σο ισί γιαβερέ τθεμένταρ. Ακανά βάκερ μάνγκε σε παρακαλώ σόσκε ντινάν-μαν βίκος τι αβάβ τι κχερέστε”.

Ο Κορνήλιος βακερντάς κο Πέτρος: “Πριν σταρ ντιβεσά κερντόμ προσευχή κο Ντεβέλ, ντα εκ άγγελος βακερντάς μάνγκε τι νταβ-τουτ βίκος. Μολίναβα-τουτ, σίκλιαρ-αμέν ο λάφια ι Ιεχωβάσκε”. Ο Πέτρος βακερντάς: “Σικλιλόμ ότι ο Ντεβέλ να ξεχωρίνελα ι τζενέν. Δεχτίνελα σαρέ οντουλέν σο μανγκένα τι ντεν-λες λατρεία”. Ο Πέτρος σικλιαρντάς-λεν μπουτ πράγματα ι Ιησούσκε. Αζομάν, ο άγιος πνεύμας αβιλό οπράλ κο Κορνήλιος ντα σαρέ οντουλέντε σο ισινέ λέσαρ, ντα σαρέ μπολντιλέ.