Ο Τζενέ σο Διαβάνενα Πουτσένα

Καγιά ισί η “τζουβέλ” σο βακερέλα ο εδάφιος Ησαΐας 60:1, ντα σαρ “ιστίλα” ντα “νικιόλα λάταρ φως”;

Ο εδάφιος Ησαΐας 60:1 βακερέλα: «Τι ιστίς, τζουβλίε, τι νικιόλ τούταρ φως, σόσκε το φως αβιλό. Η δόξα ι Ιεχωβάσκι λέλα-πες οπρά-τούτε». Ο λάφια σο ισί πο τελέ σικαβένα ότι η «τζουβέλ» ισινέ η Σιών, ή γιαβέρτουλους η Ιερουσαλήμ, σο ισινέ η πρωτεύουσα κο Ιούδας οντουλά μπρεσά.a (Ησ. 60:14· 62:1, 2) Η πόλη μανγκέλα τι σικαβέλ σαρέ ι λαός. Ο λάφια ι Ησαϊάσκε κερένα-αμέν τι σκεφτίνας ντούι ερωτήσεις: Πρώτον, κάνα ντα σαρ “ιστίντιλι” η Ιερουσαλήμ ντα νικίστιλο λάταρ πνευματικός φως; Δεύτερον, νικιόνα μπαγιά ο λάφια ι Ησαϊάσκε αμαρέ ντιβεσέντε εκχέ πο μπαρέ τροπόσαρ;

Κάνα ντα σαρ “ιστίντιλι” η Ιερουσαλήμ ντα νικίστιλο λάταρ πνευματικός φως; Η Ιερουσαλήμ ντα λάκο ναός αβιλέ καταστροφή ντα ο Ιουδαίοι ισινέ αιχμάλωτοι κι Βαβυλώνα για 70 μπρεσά. Αλλά κάνα ο Μήδοι ντα ο Πέρσες λιντέ ι Βαβυλώνα, σαρέ ο Ισραηλίτες ισινέ ελεύθεροι τι βουρτίνεν πουμαρέ τθεμέστε ντα τι ανέν πάλι ι πάκι λατρεία. (Έσδρ. 1:1-4) Κατά 537 Π.Κ.Χ. (πριν κατά Χριστός), εκ ομάδα πιστέ τζενένγκι κατά 12-ντα φάρες βουρτισάλι παλάλ. (Ησ. 60:4) Αρχισάλε τι κερέν θυσίες ι Ιεχωβάσκε, τι κερέν ο γιορτές ντα τι χτίνεν πάλι ο ναός. (Έσδρ. 3:1-4, 7-11· 6:16-22) Αντικάς η Ιερουσαλήμ, δηλαδή ο λαός ι Ντεβλέσκο αρχισάλο πάλι τι τθερέλ οπρά-πέστε ι δόξα ι Ιεχωβάσκι. Σοράν βον, αβιλέ φως ι τθεμένγκε, σο ισινέ κο πνευματικός καρανίκι.

Όμως, αζομάν νικίστιλο μπαγιά σάντε εκ κομμάτι κατά προφητείες ι Ησαϊάσκε. Ο πο μπουτ Ισραηλίτες τσσιναντέ τι ντεν καν κο Ντεβέλ. (Νεεμ. 13:27· Μαλ. 1:6-8· 2:13, 14· Ματθ. 15:7-9) Πο σοράν, να δεχτιντέ ατζέ-ντα ι Μεσσιάς, ι Ιησού Χριστός. (Ματθ. 27:1, 2) Κο 70 Σ.Κ.Χ. (σοράν κατά Χριστός), η Ιερουσαλήμ ντα λάκο ναός αβιλέ καταστροφή πάλι.

Ο Ιεχωβά βακερντάας ότι κα αβέλας ανταβά μπέτι πράγμας. (Δαν. 9:24-27) Σίγουρα, να ισινέ λέσκο σκοπός τι νικιόν μπαγιά κι Ιερουσαλήμ σαρέ ο κομμάτια κατά προφητείες σο ισί κο κεφάλαιος 60 κο Ησαΐας.

Νικιόνα μπαγιά ο λάφια ι Ησαϊάσκε αμαρέ ντιβεσέντε εκχέ πο μπαρέ τροπόσαρ; Βα, αλλά νικιόνα μπαγιά εκχέ γιαβερέ συμβολικέ τζουβλιάτε​—κι «οπραϊνί Ιερουσαλήμ». Ο απόστολος Παύλος γραφιντάς ανταλέ τζουβλιάκε ότι «ισί αμαρί ντάι». (Γαλ. 4:26) Η οπραϊνί Ιερουσαλήμ ισί ο κομμάτι ι Ντεβλέσκε οργανωσιάκο σο ισί κο ουρανός, ντα αντρέ λέστε ισί ο πιστοί άγγελοι. Λάκε τσσαβέ ισί ο Ιησούς ντα ο 144.000 χρισμέ Χριστιανοί. Ανταλά χρισμέ Χριστιανοί, σαρ ο Παύλος-ντα τθερένα ι ελπίδα τι τζαν κο ουρανός. Ο χρισμέ Χριστιανοί ισί «άγιος λαός»​—ο “Ισραήλ ι Ντεβλέσκο”.​—1 Πέτρ. 2:9· Γαλ. 6:16.

Σαρ “ιστίντιλι” η οπραϊνί Ιερουσαλήμ ντα “νικίστιλο λάταρ φως”; Κερντάς-λες ανταβά αντράλ πι χρισμέ τσσαβέντζαρ σο ισινέ κι πφουβ. Ντικχέν σαρ οντουλά σο νακχαντέ μοιάζενα οντουλέντζαρ σο ισί κο κεφάλαιος 60 κο Ησαΐας.

Ο χρισμέ Χριστιανοί έπρεπε τι “ιστίν” επειδή ισινέ, σαρ τι βακεράς, κο πνευματικός καρανίκι κάνα ο αποστάτες πφερντέ ι κχανγκιρί σοράν κατά μεριπέ ι αποστολόνγκο. (Ματθ. 13:37-43) Αζομάν αβιλέ αιχμάλωτοι κι Μπαρί Βαβυλώνα, σο ισί σαρέ ο ψεύτικες θρησκείες ι ντουνιάσκε. Ο χρισμέ ισινέ αιχμάλωτοι μέχρι “κο τελευταία ντιβεσά ανταλέ ντουνιάσκε”, σο αρχισάλε κο μπρες 1914. (Ματθ. 13:39, 40) Χάνικ πο σοράν ανταλέσταρ, κο 1919, ελευθερωσάλε ντα επειδή αρχισάλε σουγκό τι μουτθαβέν σαρέ πουμαρέ γκίσαρ ο λατσσέ αμπέρια, ισινέ σαρ τι νικιόλας λένταρ πνευματικός φως.b Καζόμ νακχένας ο μπρεσά, τζενέ σαρέ κατά τθεμά αβιλέ κο φως. Αντρέ λέντε ισί οντουλά-ντα σο ατσσιλέ κατά Ισραήλ ι Ντεβλέσκο, δηλαδή ο «βασιλιάδες» σο βακερέλα ο εδάφιος Ησαΐας 60:3.​—Αποκ. 5:9, 10.

Ανγκλ’ αμέντε, ο φως ι Ντεβλέσκο κα νικιόλ κατά χρισμέ Χριστιανοί ατζέ πο μπαρέ τροπόσαρ. Σαρ; Κάνα κα μερέν κι πφουβ, κα αβέν αντρέ κι «Νεβί Ιερουσαλήμ», ή γιαβέρτουλους κα αβέν η μπορί ι Χριστόσκι. Ανταγιά μπορί ισί ο 144.000 σο κα αβέν βασιλιάδες ντα ιερείς γιεκ ι Ιησούσαρ.​—Αποκ. 14:1· 21:1, 2, 24· 22:3-5.

Η Νεβί Ιερουσαλήμ κα κχελέλ σημαντικός ρόλος για τι νικιόλ μπαγιά ο εδάφιος Ησαΐας 60:1. (Ντικχέν Ησαΐας 60:1, 3, 5, 11, 19, 20 με Αποκάλυψη 21:2, 9-11, 22-26) Σαρ η Ιερουσαλήμ κι πφουβ ισινέ ο τθαν σο κυβερνίνενας ο βασιλιάδες κο πουρανό Ισραήλ, αντικάς η Νεβί Ιερουσαλήμ-ντα γιεκ ι Χριστόσαρ κα κυβερνίνεν κο νεβό ντουνιάς. Σαρ “γουλίλα κατά ουρανός, κατά Ντεβέλ” η Νεβί Ιερουσαλήμ; Κερέλα-λες ανταβά κάνα αρχίνελα τι κερέλ πράγματα ι πφουβιάκε. Σαρέ κο τθεμά ο τζενέ σο νταρένα κατά Ντεβέλ «κα πφιρέν κο φως σο κα νικαβέλ η πόλη». Κα ελευθερώντιβεν ατζέ-ντα κατά αμαρτία ντα κατά μεριπέ. (Αποκ. 21:3, 4, 24) Ο αποτέλεσμας κα αβέλ «τι αβέν-πες σαρέ ο πράγματα σαρ ισινέ ανγκλέ», σαρ βακερντάς ο Ησαΐας ντα γιαβερά προφήτες. (Πράξ. 3:21) Ανταβά αρχισάλο τι αβέλ-πες κάνα ο Χριστός αβιλό Βασιλιάς ντα κα τελειώνελ κο τέλος λέσκε Βασιλειάκο σο κα ατσσικιαρέλ χίλια μπρεσά.