Η Προσευχή Ανέλα-αμέν Πασέ κο Ντεβέλ

1, 2. Σόσκε πακιάσα ότι η προσευχή ισί εκ ξεχωριστός δώρος, ντα σόσκε χρειαζίντιβελα τι τζανάς σο βακερέλα η Αγία Γραφή ι προσευχιάκε;

Η ΠΦΟΥΒ ισί μπουτ χουρντί ανγκλάλ κο σύμπαν. Όταν ο Ιεχωβά ντικχέλα ι πφουβ, ο τζενέ σο τζουβντιόνα σαρέ κο τθεμά ισί ανγκλά-λέστε σαρ εκ σταγόνα πανί αντρέ εκχέ κουβάστε. (Ψαλμός 115:​15· Ησαΐας 40:​15) Παρόλο σο ισινάμ αζόμ χουρντέ ανγκλάλ κο σύμπαν, ο εδάφια Ψαλμός 145:​18, 19 βακερένα: «Ο Ιεχωβά ισί πασέ σαρέ οντουλέντε σο ρόντενα λέσκε, οντουλέντε σο ρόντενα λέσκε σαρέ πουμαρέ γκίσαρ. Κα κερέλ ο γκι οντουλέ τζενένγκο σο νταρένα λέσταρ, ντα κα ασουνέλ κάνα κα ντεν-λες βίκος για βοήθεια». Σο σουκάρ δώρος ισί ανταβά! Ο Ιεχωβά, Οντουβά σο κερντάς-αμέν ντα ισί ο πιο Ζουρανό, μανγκέλα τι αβέλ πασέ αμέντε ντα μανγκέλα τι ασουνέλ αμαρέ προσευχές. Βα, η προσευχή ισί εκ μπουτ ξεχωριστός δώρος σο ντινάς ο Ιεχωβά κο κάθε εκ αμένταρ.

² Αλλά ο Ιεχωβά κα ασουνέλ-αμέν σάντε άμα κα κεράς λέσαρ λάφι με το τρόπος σο μανγκέλα βοβ. Σαρ μπορίνασα τι κεράς-λες ανταβά; Για τι ντικχάς σο βακερέλα η Αγία Γραφή ι προσευχιάκε.

ΣΟΣΚΕ ΠΡΕΠΕΙ ΤΙ ΠΡΟΣΕΥΧΙΝΤΙΒΕΣ ΚΟ ΙΕΧΩΒΑ;

3. Σόσκε πρέπει τι προσευχίντιβες κο Ιεχωβά;

³ Ο Ιεχωβά μανγκέλα τι προσευχίντιβες λέστε, ή γιαβέρσοϊ τι κερές λέσαρ λάφι. Σαρ τζανάσα-λες ανταβά; Παρακαλίνασα-τουτ, διάβανε ο εδάφια Φιλιππησίους 4:6, 7. Σκέφτινε κον βακερέλα τούκε ανταλά σουκάρ λάφια. Οντουβά σο ισί ο πιο Μπαρό κο σύμπαν πφαμπόλα τούκε μπαγιά ντα μανγκέλα τι βακερές λέσκε σαρ αισθάντιβεσα ντα σο προβλήματα τθερέσα.

4. Όταν προσευχίντιβεσα συνέχεια κο Ιεχωβά, σαρ αβέλα πιο ζουρανί η φιλία σο τθερέσα λέσαρ;

⁴ Η προσευχή βοηθίνελα-αμέν τι τθεράς εκ λατσσί φιλία ι Ιεχωβάσαρ. Όταν ο αμαλά βακερένα ο εκ κο γιαβέρ οντουλά σο σκεφτίνενα, ο ανησυχίες σο τθερένα ντα οντουλά σο αισθάντιβενα, λένγκι φιλία αβέλα πιο ζουρανί. Ο ίδιος πράγμας αβέλα-πες όταν προσευχίντιβασα κο Ιεχωβά. Αντρέ κι Αγία Γραφή, ο Ιεχωβά βακερέλα τούκε οντουλά σο σκεφτίνελα, σαρ αισθάντιβελα ντα σο κα κερέλ κο μέλλον. Μπορίνεσα τούι-ντα τι κερές συνέχεια λάφι λέσαρ ντα τι βακερές λέσκε ατζέ-ντα οντουλά σο τθερέσα αντρέ τι γκίστε. Καζόμ κα κερές-λες ανταβά, η φιλία σο τθερέσα ι Ιεχωβάσαρ κα αβέλ ατζέκ πιο ζουρανί.​—Ιακώβου 4:8.

ΣΟ ΠΡΕΠΕΙ ΤΙ ΚΕΡΑΣ ΓΙΑ ΤΙ ΑΣΟΥΝΕΛ-ΑΜΕΝ Ο ΝΤΕΒΕΛ;

5. Σαρ τζανάσα ότι ο Ιεχωβά να ασουνέλα σαρέ ο προσευχές;

⁵ Ασουνέλα ο Ιεχωβά σαρέ ο προσευχές; Όχι. Κο ντιβεσά σο τζουβντιόλας ο προφήτης Ησαΐας, ο Ιεχωβά βακερντάς κο Ισραηλίτες: «Παρόλο σο κερένα μπουτ προσευχές, να ασουνάβα· ρατέσαρ πφερντιλέ τουμαρέ βαστά». (Ησαΐας 1:​15) Ανταλέσταρ αγαβάσα ότι, άμα κεράσα πράγματα σο να μανγκέλα ο Ιεχωβά, βοβ να κα ασουνέλ αμαρέ προσευχές.

6. Σόσκε ισί η πίστη αζόμ σημαντική; Σαρ κα σικαβές ότι τθερέσα πίστη;

⁶ Άμα μανγκάσα τι ασουνέλ ο Ιεχωβά αμαρέ προσευχές, πρέπει τι τθεράς πίστη λέστε. (Μάρκος 11:​24) Ο απόστολος Παύλος βακερέλα: «Χωρίς πίστη να αβέλα-πες κάποιος τι ευχαριστίνελ [ι Ντεβλές], επειδή οντουβά σο πλησιάνελα ι Ντεβλές πρέπει τι πακιάλ ότι βοβ υπαρχίντιβελα ντα ότι κα ανέλ ευλογίες οντουλέντε σο ρόντενα σαρέ πουμαρέ γκίσαρ τι αρακχέν-λες». (Εβραίους 11:6) Αλλά να ερεσέλα σάντε τι βακεράς ότι τθεράσα πίστη. Πρέπει τι σικαβάς ξεκάθαρα αμαρί πίστη, ντα κα κεράς-λες ανταβά άμα ασουνάσα ι Ιεχωβάς κάθε ντιβές.​—Διάβανε Ιακώβου 2:26.

7. (α) Σόσκε πρέπει τι αβάς ταπεινοί ντα τι σικαβάς σεβασμός κάνα προσευχίντιβασα κο Ιεχωβά; (β) Σαρ μπορίνασα τι σικαβάς ότι αμαρέ προσευχές νικιόνα μπαγιά αντράλ αμαρέ γκίσταρ;

⁷ Πρέπει τι αβάς ταπεινοί ντα τι σικαβάς σεβασμός κάνα προσευχίντιβασα κο Ιεχωβά. Σόσκε; Άμα έπρεπε τι κεράς λάφι εκχέ βασιλιάσαρ ή εκχέ προεδρόσαρ, κα κεράας-λες ανταβά με σεβασμός. Αφού ο Ιεχωβά, ο Ντεβέλ, ισί ο πιο Ζουρανό, δεν πρέπει τι σικαβάς ατζέκ πιο μπουτ σεβασμός ντα τι αβάς ατζέκ πιο ταπεινοί κάνα κεράσα λέσαρ λάφι; (Γένεση 17:1· Ψαλμός 138:6) Επίσης, κάνα προσευχίντιβασα κο Ιεχωβά, πρέπει τι βακεράς λέσκε οντουλά σο τθεράσα μπαγιά αντρέ αμαρέ γκίστε, όχι απλώς τι βακεράς κάθε φαρ ο ίδια ντα ο ίδια λάφια.​—Ματθαίος 6:7, 8.

8. Όταν προσευχίντιβασα εκχέ πραγμάσκε, σο γιαβέρ πρέπει τι κεράς;

⁸ Όταν προσευχίντιβασα εκχέ πραγμάσκε, πρέπει τι κεράς ο πιο λατσσό σο μπορίνασα για τι αβέλ-πες οντουβά σο μανγκάσα αμαρέ προσευχιάτε. Για παράδειγμας, μπορεί τι μανγκάς κατά Ιεχωβά τι ντελ-αμέν οντουλά σο χρειαζίντιβασα για τι τζουβντιάς. Όμως, δεν πρέπει τι αβάς τεμπέληδες ντα τι μπεκλεντίνας ότι ο Ιεχωβά κα ντελ-αμέν σαρέ οντουλά σο μανγκάσα χωρίς αμέν τι κεράς τίποτα. Πρέπει τι αβάς μπουτιαρνέ ντα τι δεχτίνας σο-ντα μπουτί μπορίνασα τι κεράς. (Ματθαίος 6:​11· 2 Θεσσαλονικείς 3:​10) Επίσης, άμα προσευχίντιβασα κο Ιεχωβά τι βοηθίνελ-αμέν τι τσσιναβάς τι κεράς κάτι σο ισί λάθος, πρέπει τι νασάς σαρέ κατά πράγματα σο κα μπορίνενας τι τσσουβέν-αμέν κο πειρασμός. (Κολοσσαείς 3:5) Ακανά κα ντικχάς μερικές ερωτήσεις σο τθερένα τι κερέν ι προσευχιάσαρ.

ΕΡΩΤΗΣΕΙΣ ΣΟ ΚΕΡΕΝΑ Ο ΤΖΕΝΕ Ι ΠΡΟΣΕΥΧΙΑΚΕ

9. Κάστε πρέπει τι προσευχίντιβας; Σο σικλιαρέλα-αμέν ο εδάφιος Ιωάννης 14:6 ι προσευχιάκε;

⁹ Κάστε πρέπει τι προσευχίντιβας; Ο Ιησούς σικλιαρντάς πι μαθητέν τι προσευχίντιβεν “αμαρέ Νταντέστε σο ισί κο ουρανός”. (Ματθαίος 6:9) Επίσης βακερντάς: «Με ισινόμ ο ντρομ ντα η αλήθεια ντα η ζωή. Καέκ ναστί αβέλα κο Ντατ άμα να αβέλα μέσω μάνταρ». (Ιωάννης 14:6) Άρα πρέπει τι προσευχίντιβας σάντε κο Ιεχωβά ντα τι κεράς-λες ανταβά κο ναβ κι Ιησούσκο, “μέσω λέσταρ” σαρ βακερντάς ο Ιησούς. Σο μανγκέλα τι βακερέλ τι προσευχίντιβας κο ναβ κι Ιησούσκο; Για τι δεχτίνελ ο Ιεχωβά αμαρέ προσευχές, πρέπει τι σικαβάς ότι αγαβάσα καμπόρ σημαντικός ισί ο ρόλος σο ντινάς ο Ιεχωβά κο Ιησούς. Σαρ σικλιλάμ, ο Ιησούς αβιλό κι πφουβ για τι σώνελ-αμέν κατά αμαρτία ντα κατά μεριπέ. (Ιωάννης 3:​16· Ρωμαίους 5:​12) Επίσης, ο Ιεχωβά τσσουντάς ι Ιησούς τι αβέλ Αρχιερέας, για τι συγχωρίντιβεν αμαρέ αμαρτίες, ντα Κριτής.​—Ιωάννης 5:​22· Εβραίους 6:20.

10. Πρέπει τι μπεσάς με εκ συγκεκριμέ τρόπος κάνα προσευχίντιβασα; Εξήγινε.

¹⁰ Πρέπει τι μπεσάς με εκ συγκεκριμέ τρόπος κάνα προσευχίντιβασα; Όχι, ο Ιεχωβά να βακερέλα ότι πρέπει τι περάς κοτσέντζαρ, τι μπεσάς εκχέ καρεκλάτε ή τι αβάς όρθιοι όταν προσευχίντιβασα. Η Αγία Γραφή σικλιαρέλα-αμέν ότι μπορίνασα τι κεράς λάφι ι Ιεχωβάσαρ σαρ-ντα τι μπεσάς, άλλα πρέπει τι κεράς-λες με σεβασμός. (1 Χρονικών 17:​16· Νεεμίας 8:6· Δανιήλ 6:​10· Μάρκος 11:​25) Οντουβά σο τθερέλα πιο μπαρί σημασία ι Ιεχωβάσκε ισί, όχι ο τρόπος σο μπεσάσα κάνα προσευχίντιβασα, αλλά άμα κεράσα λέσαρ λάφι αντράλ αμαρέ γκίσταρ. Μπορίνασα τι προσευχίντιβας ζουρανές ή αντρ’ αμένταρ κάι-ντα τι αβάς ντα κάνα μανγκάσα, είτε αρατί είτε πρωί. Όταν προσευχίντιβασα κο Ιεχωβά, μπορίνασα τι αβάς σίγουροι ότι βοβ κα ασουνέλ-αμέν ατζέ-ντα άμα καέκ γιαβέρ να ασουνέλα-αμέν.​—Νεεμίας 2:​1-6.

11. Καλά ισί μερικά πράγματα σο μπορίνασα τι βακεράς κο Ιεχωβά;

¹¹ Καλέ πραγματένγκε μπορίνασα τι προσευχίντιβας; Μπορίνασα τι προσευχίντιβας ι πραγματένγκε σο ταιριάνενα με το θέλημας ι Ιεχωβάσκο. Η Γραφή βακερέλα: «Σο-ντα τι μανγκάς λέσταρ ντα συμφωνίνελα οντουλέσαρ σο μανγκέλα, βοβ ασουνέλα-αμέν». (1 Ιωάννη 5:​14) Μπορίνασα τι προσευχίντιβας ι πραγματένγκε σο απασχολίνενα-αμέν; Βα. Όταν προσευχίντιβασα κο Ιεχωβά, πρέπει τι κεράς λέσαρ λάφι σαρ κεράσα λάφι εκχέ μπουτ λατσσέ αμαλέσαρ. Μπορίνασα τι βακεράς κο Ιεχωβά σο-ντα ισί αντρέ αμαρέ γκοντιάτε ντα αμαρέ γκίστε. (Ψαλμός 62:8) Μπορίνασα τι προσευχίντιβας τι ντελ-αμέν πο άγιος πνεύμας, σο ισί μπουτ ζουρανό, για τι βοηθίνελ-αμέν τι κεράς ο σωστός. (Λουκάς 11:​13) Μπορίνασα επίσης τι μανγκάς κατά Ιεχωβά σοφία για τι λας λατσσέ αποφάσεις ντα δύναμη για τι αντιμετωπίνας ο δυσκολίες. (Ιακώβου 1:5) Μπορίνασα τι μανγκάς κατά Ιεχωβά τι συγχωρίνελ αμαρέ αμαρτίες. (Εφεσίους 1:3, 7) Πρέπει επίσης τι προσευχίντιβας ι γιαβερένγκε, σαρ για παράδειγμας αμαρέ φαμιλιάκε ντα αμαρέ πφραλένγκε ντα πφενίνγκε σο ισί κι εκκλησία.​—Πράξεις 12:5· Κολοσσαείς 4:12.

12. Σο πρέπει τι αβέλ ο πιο σημαντικός αμένγκε κάνα προσευχίντιβασα;

¹² Σο πρέπει τι αβέλ ο πιο σημαντικός αμένγκε κάνα προσευχίντιβασα; Ο Ιεχωβά ντα λέσκο θέλημας. Πρέπει τι ευχαριστίνας-λες αντράλ αμαρέ γκίσταρ σαρέ ι πραγματένγκε σο τθερέλα κερντό αμένγκε. (1 Χρονικών 29:​10-13) Τζανάσα-λες ανταβά επειδή, όταν ο Ιησούς ισινέ κι πφουβ, σικλιαρντάς πι μαθητέν σαρ τι προσευχίντιβεν. (Διάβανε Ματθαίος 6:​9-13) Βοβ βακερντάς ότι πρέπει πρώτα τι προσευχίντιβας τι αγιάντιβελ ι Ντεβλέσκο ναβ, δηλαδή τι σεβάνεν-λες ο τζενέ ντα τι αγαβέν ότι ισί άγιος. Σοράν, ο Ιησούς σικαντάς ότι πρέπει τι προσευχίντιβας τι αβέλ η Βασιλεία ι Ντεβλέσκι ντα τι αβέλ ο θέλημας ι Ιεχωβάσκο σαρί κι πφουβ. Ο Ιησούς βακερντάς ότι, σάντε άμα προσευχισάλαμ ανταλέ μπουτ σημαντικέ πραγματένγκε, μπορίνασα σοράν τι προσευχίντιβας για το ανάγκες σο τθεράσα αμέν. Όταν τσσουβάσα πρώτα αμαρέ προσευχιέντε ι Ιεχωβάς ντα λέσκο θέλημας, σικαβάσα σο τθερέλα πιο μπαρί σημασία αμένγκε.

13. Καζόμ μπαρέ πρέπει τι αβέν αμαρέ προσευχές;

¹³ Καζόμ μπαρέ πρέπει τι αβέν αμαρέ προσευχές; Η Γραφή να βακερέλα. Αμαρέ προσευχές μπορίνενα τι αβέν είτε χουρντέ είτε μπαρέ. Για παράδειγμας, μπορεί τι κεράς εκ χουρντί προσευχή πριν τι χας αλλά τι κεράς εκ πιο μπαρί προσευχή όταν ευχαριστίνασα ι Ιεχωβάς ή όταν βακεράσα λέσκε οντουλά σο απασχολίνενα-αμέν. (1 Σαμουήλ 1:​12, 15) Να μανγκάσα τι κεράς μπαρέ προσευχές απλώς για τι ταρτίνας ι προσοχή ι γιαβερένγκι οπρ’ αμέντε, σαρ κερένας μερικά τζενέ κο ντιβεσά σο τζουβντιόλας ο Ιησούς. (Λουκάς 20:​46, 47) Ι Ιεχωβάσκε να κερένα ιτς εντύπωση ασακέ προσευχές. Οντουβά σο τθερέλα σημασία ι Ιεχωβάσκε ισί τι προσευχίντιβας αντράλ αμαρέ γκίσταρ.

14. Καζόμ φαρ πρέπει τι προσευχίντιβας, ντα σο σικλιαρέλα-αμέν ανταβά ι Ιεχωβάσκε;

¹⁴ Καζόμ φαρ πρέπει τι προσευχίντιβας; Ο Ιεχωβά μανγκέλα τι κεράς λέσαρ λάφι μπουτ φαρ. Η Γραφή βακερέλα αμένγκε ότι δεν πρέπει “τι τσσιναβάς τι κεράς προσευχή” ντα ότι πρέπει τι “προσευχίντιβας συνέχεια”. (Ρωμαίους 12:​12· 1 Θεσσαλονικείς 5:​17· 1 Τιμόθεο 5:5) Ο Ιεχωβά ισί πάντα έτοιμος τι ασουνέλ-αμέν. Μπορίνασα τι ευχαριστίνας-λες κάθε ντιβές σο σικαβέλα αμένγκε αγάπη ντα ντέλα-αμέν μπουτ πράγματα. Μπορίνασα επίσης τι μανγκάς λέσταρ τι οδηγίνελ-αμέν ντα τι ντελ-αμέν ζορ ντα παρηγοριά. Άμα εκτιμίνασα μπαγιά ο προνόμιος σο τθεράσα τι προσευχίντιβας κο Ιεχωβά, να κα χασαράς καέκ ευκαιρία τι κεράς λέσαρ λάφι.

15. Σόσκε πρέπει τι βακεράς «αμήν» κο τέλος εκχέ προσευχιάκο;

¹⁵ Σόσκε πρέπει τι βακεράς «αμήν» κο τέλος εκχέ προσευχιάκο; Η λέξη «αμήν» μανγκέλα τι βακερέλ «σίγουρα» ή «αντικάς τι αβέλ-πες». Ισί εκ τρόπος για τι σικαβάς ότι οντουλά σο βακεράσα κι προσευχή ισί μπαγιά αντράλ αμαρέ γκίσταρ. (Ψαλμός 41:​13) Η Γραφή σικλιαρέλα-αμέν επίσης ότι ισί λατσσό τι βακεράς «αμήν», είτε αντρ’ αμένταρ είτε ζουρανές, κο τέλος εκχέ προσευχιάκο σο κερέλα εκ γιαβέρ τζενό για τι σικαβάς ότι συμφωνίνασα οντουλέντζαρ σο βακέρντιλε.​—1 Χρονικών 16:​36· 1 Κορινθίους 14:16.

ΣΑΡ ΑΠΑΝΤΙΝΕΛΑ Ο ΝΤΕΒΕΛ ΑΜΑΡΕ ΠΡΟΣΕΥΧΙΕΝΤΕ

16. Απαντίνελα μπαγιά ο Ιεχωβά αμαρέ προσευχιέντε; Εξήγινε.

¹⁶ Απαντίνελα μπαγιά ο Ιεχωβά αμαρέ προσευχιέντε; Βα, απαντίνελα. Η Γραφή βακερέλα ότι βοβ “ασουνέλα προσευχή”. (Ψαλμός 65:2) Ο Ιεχωβά ασουνέλα ντα απαντίνελα κο προσευχές σο κερένα αντράλ πουμαρέ γκίσταρ εκατομμύρια τζενέ, ντα κερέλα-λες ανταβά με μπουτ τρόπους.

17. Σαρ χρησιμοποιήνελα ο Ιεχωβά πι αγγελόν ντα πι υπηρετόν κι πφουβ για τι απαντίνελ αμαρέ προσευχιέντε;

¹⁷ Ο Ιεχωβά χρησιμοποιήνελα πι αγγελόν ντα πι υπηρετόν κι πφουβ για τι απαντίνελ αμαρέ προσευχιέντε. (Εβραίους 1:​13, 14) Υπαρχίντιβενα μπουτ παραδείγματα τζενένγκε σο μανγκλέ βοήθεια κατά Ντεβέλ για τι μπορίνεν τι αγαβέν ι Γραφή, ντα μετά από χάνικ, γκιλέ λένγκε Μάρτυρες του Ιεχωβά. Η Αγία Γραφή σικαβέλα ότι ο άγγελοι βοηθίνενα κο έργος σο αβέλα-πες για τι βακέρντιβεν ο «λατσσέ αμπέρια» σαρί κι πφουβ. (Διάβανε Αποκάλυψη 14:6) Επίσης, μπουτ αμένταρ τθεράσα κερντό προσευχή κο Ιεχωβά για εκ συγκεκριμέ πρόβλημας ή ανάγκη σο τθεράας ντα σοράν λιντάμ ι βοήθεια σο χρειαζίντιβαας εκχέ πφραλέσταρ ή εκχέ πφενιάταρ κατά Χριστιανική εκκλησία.​—Παροιμίες 12:​25· Ιακώβου 2:16.

18. Σαρ χρησιμοποιήνελα ο Ιεχωβά πο άγιος πνεύμας ντα ι Γραφή για τι απαντίνελ κο προσευχές;

¹⁸ Ο Ιεχωβά χρησιμοποιήνελα πο άγιος πνεύμας για τι απαντίνελ αμαρέ προσευχιέντε. Όταν μανγκάσα λέσταρ βοήθεια για τι ντας-λεν πέρα εκχέ προβλημάσαρ, βοβ μπορεί τι χρησιμοποιήνελ πο άγιος πνεύμας για τι οδηγίνελ-αμέν ντα για τι ντελ-αμέν ζορ. (2 Κορινθίους 4:7) Ο Ιεχωβά χρησιμοποιήνελα επίσης ι Γραφή για τι απαντίνελ αμαρέ προσευχιέντε ντα για τι βοηθίνελ-αμέν τι λας σοφές αποφάσεις. Όταν διαβάνασα ι Γραφή, μπορεί τι αρακχάς εδάφια σο κα βοηθίνεν-αμέν. Ο Ιεχωβά μπορεί επίσης τι κερέλ εκχέ τζενές κι συνάθροιση τι ντελ εκ απάντηση σο τθεράας ανάγκη τι ασουνάς ή εκχέ πρεσβυτερός κι εκκλησία τι βακερέλ αμένγκε κάτι σουκάρ αντράλ κατά Αγία Γραφή.​—Γαλάτες 6:1.

19. Σόσκε μπορεί τι αμντίνας ότι ο Ιεχωβά να απαντιντάς ατζέκ αμαρέ προσευχιέντε;

¹⁹ Όμως, ισί φαρ σο μπορεί τι σκεφτίνας: “Σόσκε να απαντιντάς ατζέκ ο Ιεχωβά μι προσευχιέντε;” Τι ντες-τουτ γκοντί ότι βοβ τζανέλα κάνα ντα σαρ κα απαντίνελ αμαρέ προσευχιέντε. Τζανέλα σο τθεράσα ανάγκη. Μπορεί τι χρειαζίντιβελ τι συνεχίνας τι προσευχίντιβας για τι σικαβάς καμπόρ μανγκάσα τι αβέν-πες οντουλά σο βακεράσα λέσκε ντα καμπόρ μπαρί πίστη τθεράσα λέστε. (Λουκάς 11:​5-10) Μπάζιμ, ο Ιεχωβά απαντίνελα αμαρέ προσευχιέντε με τρόπος σο να μπεκλεντίνασα. Για παράδειγμας, μπορεί τι προσευχίντιβασα για εκ δύσκολος πρόβλημας. Όμως, αντίς τι νασκιαρέλ ο πρόβλημας, ο Ιεχωβά μπορεί τι ντελ-αμέν ι ζορ τι νταϊντίνας.​—Διάβανε Φιλιππησίους 4:13.

20. Σόσκε πρέπει τι προσευχίντιβας συνέχεια κο Ιεχωβά;

²⁰ Σο σουκάρ ντα σο μπαρό προνόμιος τθεράσα τι προσευχίντιβας κο Ιεχωβά! Μπορίνασα τι αβάς σίγουροι ότι βοβ κα ασουνέλ-αμέν. (Ψαλμός 145:​18) Ντα καζόμ πιο μπουτ προσευχίντιβασα κο Ιεχωβά αντράλ αμαρέ γκίσταρ, αζόμ πιο ζουρανί κα αβέλ αμαρί φιλία λέσαρ.