Ο Πολεμιστής ντα η Χουρντί Τσσάι

Κι Συρία, ισινέ εκ χουρντί Ισραηλίτισσα σο ισινέ μπουτ ντουρ πι κχερέσταρ. Λιντάας-λα λάκε φαμιλιάταρ ο στρατός ι Συριάκο, ντα ακανά τθερέλας-λα υπηρέτρια η ρομνί εκχέ τζενέσκι σο ισινέ αρχηγός κο στρατός ντα βακέρντιβελας Νεεμάν. Ανταγιά τσσαγιορί ντέλας λατρεία ι Ιεχωβάς, παρόλο σο καέκ οτθέ να κερέλας-λες ανταβά.

Ο Νεεμάν τθερέλας εκ μπέτι νασφαλιπέ πι σωμάστε ντα ντουκχάλας μπουτ. Η χουρντί τσσάι μανγκέλας μπουτ τι βοηθίνελ-λες. Οτθάρ βακερντάς κι ρομνί του Νεεμάν: “Τζανάβα εκχέ τζενές σο μπορίνελα τι κερέλ λατσσές τι ρομές. Κο Ισραήλ, ισί εκ προφήτης ι Ιεχωβάσκο σο βακερένα λέσκε Ελισαιέ. Βοβ μπορίνελα τι κερέλ λατσσές τι ρομές”.

Η ρομνί του Νεεμάν βακερντάς λέσκε οντουλά σο βακερντάας η χουρντί τσσάι. Βοβ ισινέ έτοιμος τι κερέλ τα πάντα για τι αβέλ λατσσές, οτθάρ γκιλό κο κχερ του Ελισαιέ κο Ισραήλ. Ο Νεεμάν, επειδή ισινέ εκ σημαντικός τζενό, πακιάλας ότι ο Ελισαιέ κα κερέλας λέσκε σαρ σαρ. Αλλά αντίς τι κερέλ λέσκε λάφι βοβ ο ίδιος, ο Ελισαιέ μπουτσσαντάς πι υπηρετής για τι κερέλ λάφι κο Νεεμάν ντα τι βακερέλ λέσκε: “Τζα ντα τθοβ-τουτ εφτά φαρ κι Λεν Ιορδάνης. Αζομάν κα αβές λατσσές”.

Ο Νεεμάν μουκχλάς πο μούι ντα βακερντάς: “Αμντίναβας ότι ανταβά προφήτης για τι κερέλ-μαν λατσσές κα βακερέλας ο ναβ πι Ντεβλέσκο ντα κα τσσουβέλας πο βαστά οπρά-μάνταρ. Αλλά βακερέλα μάνγκε τι τζαβ ανταλέ λενιάτε σο ισί κο Ισραήλ. Αλλά αμέν τθεράσα πο λατσσέ λενιά κι Συρία. Σόσκε μα τι τζαβ οτθέ;” Ο Νεεμάν χολιασάλο ντα νασλό κατά κχερ του Ελισαιέ.

Ο υπηρέτες του Νεεμάν βοηθιντέ-λες τι σκεφτίνελ πο λατσσές ντα βακερντέ λέσκε: “Να κα κερέας τα πάντα για τι αβές λατσσές; Ανταβά σο βακερέλα τούκε ο προφήτης ισί μπουτ εύκολος. Σόσκε να κερέσα-λες;” Ο Νεεμάν ασουντάς-λεν. Γκιλό κι Λεν Ιορδάνης ντα τσσουντάς-πες σαστό αντρέ κο πανί εφτά φαρ. Κάνα νικίστιλο κατά πανί κι τελευταία φαρ, αβιλόας ντιπ λατσσές. Ισινέ πφερντό εκτίμηση ντα βουρτισάλο κο Ελισαιέ για τι ευχαριστίνελ-λες. Ο Νεεμάν βακερντάς: “Ακανά τζανάβα ότι ο Ιεχωβά ισί ο αληθινός Ντεβέλ”. Σαρ πακιάσα ότι νιωσάλι η χουρντί Ισραηλίτισσα κάνα ο Νεεμάν βουρτισάλο κχερέ ντα αβιλόας λατσσές;