Εκ Βασιλεία σο κα Ατσσόλ για Πάντα

Εκ ιράτ ο βασιλιάς Ναβουχοδονόσορας ντικχλάς εκ περίεργος σουνό. Αγχωντάς-λες αζόμ μπουτ σο ναστί σοβέλας. Ντινάς βίκος ι μαγόν σο τθερέλας ντα βακερντάς λένγκε: “Ντικχλόμ εκ σουνό, βακερέν μάνγκε σο μανγκέλα τι βακερέλ”. Ο μάγοι βακερντέ λέσκε: “Βάκερ αμένγκε σο σουνό ντικχλάν βασιλιά”. Αλλά ο Ναβουχοδονόσορας βακερντάς λένγκε: “Όχι! Βακερέν μάνγκε τουμέν σο σουνό ντικχλόμ, άμα να βακερντέν μάνγκε κα μουνταράβ-τουμέν”. Βον βακερντέ πάλι: “Βάκερ αμένγκε σο ντικχλάν ντα αμέν κα βακεράς τούκε σο μανγκέλα τι βακερέλ”. Βοβ βακερντάς: “Σαρέ προσπαθίνενα τι χουχαβέν-μαν. Βακερέν μάνγκε σο σουνό ντικχλόμ!” Βον βακερντέ κο βασιλιάς: “Νανέ καέκ τζενό σο κα μπορίνελας τι κερέλ κάτι ασακό. Ανταβά σο μανγκέσα να αβέλα-πες”.

Ο Ναβουχοδονόσορας νευριασάλο αζόμ μπουτ σο ντινάς εντολή τι μουνταρέν σαρέ ι γκοντιαβέρ μουρσέν ι τθεμέσκε. Αντρέ ανταλέ μουρσέντε ισινέ εμ ο Δανιήλ, ο Σεδράχ, ο Μισάχ ντα ο Αβδενεγώ. Ο Δανιήλ μανγκλάς κατά βασιλιάς τι ντελ-λες χάνικ χρόνος. Αζομάν ο Δανιήλ ντα λέσκε αμαλά κερντέ προσευχή κο Ιεχωβά ντα μανγκλέ λέσταρ τι βοηθίνελ-λεν. Σο κερντάς ο Ιεχωβά;

Εκχέ φαντασιάτε, ο Ιεχωβά σικαντάς κο Δανιήλ σο σουνό ντικχλάας ο Ναβουχοδονόσορας ντα σο μανγκέλας τι σικαβέλ ανταβά σουνό. Ο γιαβέρ ντιβές ο Δανιήλ γκιλό κο υπηρέτης κι βασιλιάσκο ντα βακερντάς λέσκε: “Μα μούνταρ καεκχές κατά γκοντιαβέρ μουρσά. Με μπορίναβα τι εξηγίναβ ο σουνό ι βασιλιάσκο”. Οτθάρ, ο υπηρέτης γκερντάς τον Δανιήλ κο Ναβουχοδονόσορας. Ο Δανιήλ βακερντάς κο βασιλιάς: “Ο Ντεβέλ σικαντάς τούκε σο κα αβέλ κο μέλλον. Άκ’ σο ντικχλάν τι σουνέστε: Ντικχλάν εκ μπουτ μπαρό άγαλμας σο ο σορό λέσκο ισινέ χρυσός, ο γκέσι ντα ο μουσιά ισινέ από ασήμι, ο περ ντα ο τσανγκά ισινέ από χαλκός, ο κοτσά από σίδερος ντα ο πιντρέ από σίδερος ντα τσικ. Σοράν εκ μπαρ νασλό εκχέ βεσέσταρ ντα ντινάς ο άγαλμας κο πιντρέ. Ο άγαλμας αβιλό σκόνη σο λιντάς-λα η μπαρμπάλ. Ο μπαρ αβιλό μπαρό βες σο πφερντάς ι πφουβ”.

Ο Δανιήλ βακερντάς σοράν: “Ανταβά μανγκέλα τι βακερέλ το σουνό: Τι βασιλεία ισί ο χρυσός σορό. Ο ασήμι ισί εκ βασιλεία σο κα αβέλ σοράν τούταρ. Σοράν κα αβέλ εκ τανί σαρ χαλκός, σο κα κερέλ κουμάντος σαρί ι πφουβ. Η γιαβέρ βασιλεία παλάλ ανταλάταρ κα αβέλ ζουρανί σαρ ο σίδερος. Κο τέλος, κα υπαρχίντιβελ εκ ιλιαντί βασιλεία σο εκχέ τθανέστε κα αβέλ ζουρανί σαρ ο σίδερος ντα εκχέ τθανέστε μπίζουρανι σαρ η σουκί τσικ. Ο μπαρ σο αβέλα βες ισί η Βασιλεία ι Ντεβλέσκι. Κα καταστραφίνελ σαρέ ανταλά βασιλείες ντα βόι κα ατσσόλ για πάντα”.

Ο Ναβουχοδονόσορας πελό μόσαρ τελέ ανγκλάλ κο Δανιήλ. Ντα βακερντάς: “Ο Ντεβέλ σικαντάς τούκε ανταβά σουνό. Να υπαρχίντιβελα γιαβέρ Ντεβέλ σαρ λέστε”. Αντίς τι μουνταρέλ τον Δανιήλ, ο Ναβουχοδονόσορας κερντάς-λες τι αβέλ αρχηγός σαρέ ι γκοντιαβέρ μουρσένγκο ντα άρχοντας κι Βαβυλώνα. Μπορίνεσα τι ντικχές σαρ ο Ιεχωβά απαντιντάς κι προσευχή του Δανιήλ;