Ο Δανιήλ κι Γούρνα σο Ισινέ ο Λιοντάρια

Εκ γιαβέρ βασιλιάς κι Βαβυλώνα ισινέ ο Δαρείος ο Μήδος. Ο Δαρείος ντικχλάς ότι ο Δανιήλ ισινέ ξεχωριστός. Ντινάς-λες εκ μπουτ μπαρί θέση, τι κερέλ κουμάντος ι πο σημαντικέ μουρσέν οντουλέ τθεμέστε. Ανταλά μουρσά ζηλίνενας τον Δανιήλ ντα μανγκένας τι μουνταρέν-λες. Τζανένας ότι ο Δανιήλ κερέλας προσευχή κο Ιεχωβά τριν φαρ κο ντιβές, οτθάρ βακερντέ κο Δαρείος: “Βασιλιά, πρέπει τι νικαβές εκ νόμος σο κα βακερέλ ότι σαρέ πρέπει τι προσευχίντιβεν σάντε τούτε. Κον να ντέλα καν πρέπει τι φουρτίντιβελ εκχέ γουρνάτε σο ισί πφερντί λιοντάρια”. Ανταβά μπεϊντιντάς-λες ο Δαρείος, ντα τσσουντάς ανταβά νόμος.

Κάνα ο Δανιήλ ασουντάς ότι νικίστιλο ανταβά νεβό νόμος, γκιλό πέσκε κχερέ. Ανγκλάλ εκχέ πουταρντέ παραθυρόστε, πελό κοτσίντζαρ ντα κερντάς προσευχή κο Ιεχωβά. Ο μουρσά σο ζηλίνενας-λες ντινέ ούρια αντρέ κο κχερ ντα ασταρντέ-λες τι κερέλ προσευχή. Αζομάν τθαβντισάλε κο Δαρείος ντα βακερντέ: “Ο Δανιήλ να ντέλα-τουτ καν. Κερέλα προσευχή πι Ντεβλέστε τριν φαρ κο ντιβές”. Ο Δαρείος όμως μανγκέλας τον Δανιήλ ντα να μανγκέλας τι μουνταρέλ-λες. Σαρό ο ντιβές πφανγκλάς πο σορό τι αρακχέλ εκ τρόπος για τι σώνελ-λες. Αλλά ούτε βοβ, ο βασιλιάς, ναστί αλλάνελας εκ νόμος σο νικαντάας. Έπρεπε τι ντελ διαταγή κο μουρσά τι φουρτίνεν τον Δανιήλ κι γούρνα σο ισινέ ο άγρια λιοντάρια.

Οντιά ιράτ, ο Δαρείος ανησυχίνελας αζόμ μπουτ ι Δανιηλίσκε σο ναστί σοβέλας. Κο ντίσιπε, τθαβντισάλο κι γούρνα ντα ντινάς βίκος κο Δανιήλ: “Σωντάς-τουτ το Ντεβέλ;”

Αζομάν, ο Δαρείος ασουντάς εκ φωνή. Ισινέ ο Δανιήλ! Ντινάς βίκος κο Δαρείος: “Ο άγγελος ι Ιεχωβάσκο πφαντάς ο μουγιά ι λιονταρίνγκε. Να κερντέ μάνγκε τίποτα”. Ο Δαρείος χαιρισάλο μπουτ! Ντινάς διαταγή τι νικαβέν τον Δανιήλ κατά γούρνα. Ο Δανιήλ να τθερέλας ούτε εκ τσσινιπέ οπρά-πέστε. Αζομάν, ο βασιλιάς ντινάς διαταγή: “Φουρτίνεν ι μουρσέν σο κατηγοριντέ τον Δανιήλ αντρέ κι γούρνα”. Κάνα φουρτιντέ οντουλέ μουρσέν αντρέ κι γούρνα, ο λιοντάρια αμέσως χαλέ-λεν.

Ο Δαρείος μπουτσσαντάς ανταγιά διαταγή πι λαόστε: “Σαρέ πρέπει τι νταρέν κατά Ντεβέλ σο πακιάλα ο Δανιήλ! Βοβ ισί σο σωντάς τον Δανιήλ κατά λιοντάρια”.

Κερέσα προσευχή κο Ιεχωβά τούι-ντα κάθε ντιβές, σαρ κερέλας ο Δανιήλ;