Ο Μαθητές Λένα ο Άγιος Πνεύμας

Δέκα ντιβεσά αφού βουρτισάλο ο Ιησούς κο ουρανός, ο μαθητές λέσκε λιντέ ο άγιος πνεύμας. Οντουβά ντιβές ισινέ η Πεντηκοστή κο 33 Κ.Χ, ντα μπουτ τζενέ σαρέ κατά τθεμά γκιλέας οτθέ για τη γιορτή. Περίπου 120 μαθητές ισινέ γκιντιμέ εκχέ κχερέστε. Ξαφνικά, αβιλό κάτι σο κερντάς-λεν τι σαστίνεν. Ο κάθε μαθητής τθερέλας κάτι σαρ γιακ οπράλ πι σορέστε, ντα σαρέ αρχιντέ τι κερέν λάφι διάφορα τσσιμπά. Ντα ασούντιλο εκ θόρυβος σαρ ζουρανί μπαρμπάλ σο πφερντάς ο κχερ.

Τζενέ σο γκιλέας κι Ιερουσαλήμ γιαβερέ τθεμένταρ ασουντέ ο θόρυβος ντα τθαβντισάλε κο κχερ τι ντικχέν σο αβέλας-πες. Ατσσιλέ πουταρντέ μόσαρ κάνα ασουντέ ι μαθητέν τι κερέν λάφι διάφορα τσσιμπά. Βακερντέ: “Ανταλά τζενέ ισί κατά Γαλιλαία. Σαρ αβέλα-πες τι κερέν λάφι αμαρέ τσσιμπέντε;”

Αζομάν ο Πέτρος ντα ο γιαβερά απόστολοι κερντέ λάφι ανγκλάλ κο μπουτ τζενέ. Ο Πέτρος βακερντάς κο τζενέ ότι ο Ιησούς μουλόας ντα ότι ο Ιεχωβά τζουβντιαρντάς-λες κατά μουλέ. Ο Πέτρος βακερντάς: “Ακανά ο Ιησούς ισί κο ουρανός, μπεσέλα δεξιά κατά Ντεβέλ ντα τσσουντάς οπρ’ αμέντε ο άγιος πνεύμας σαρ βακερντάας. Οτθάρ-ντα ασουντέν ντα ντικχλέν ανταλά θαύματα”.

Ο λάφια σο βακερντάς ο Πέτρος ερεσλέ κο γκι κι τζενένγκο, οτθάρ πουτσλέ: «Σο πρέπει τι κεράς;» Βοβ βακερντάς λένγκε: “Μετανιώνεν τουμαρέ αμαρτιένγκε ντα μπολντιόν κο ναβ κι Ιησούσκο. Κα λεν τουμέν-ντα ανταβά δώρος, ο άγιος πνεύμας”. Οντουβά ντιβές, μπολντιλέ 3.000 τζενέ. Από αζομάν, ο μαθητές κι Ιερουσαλήμ αρχιντέ τι αβγατίντιβεν μπουτ σουγκό. Με τη βοήθεια ι άγιε πνευμάσκι, ο απόστολοι κερντέ γιαβερά-ντα κχανγκιριά για τι μπορίνεν τι σικλιαρέν ι νεβέ μαθητέν σαρέ οντουλά σο ντινάς-λεν εντολή ο Ιησούς.